აზერბაიჯანის სასამართლომ Abzas Media-ს ჟურნალისტები პატიმრობაში დატოვა
აბზას მედიის საქმე
Abzas Media-ს საქმეზე დაკავებული ჟურნალისტი, ჰაფიზ ბაბალი ითხოვს, რომ პროსამთავრობო მედიამ წაშალოს მისი რეპუტაციას შემლახავი სტატიები. თუ მოთხოვნა ერთ კვირაში არ დაკმაყოფილდება, ჟურნალისტი ამ გამოცემებს უჩივლებს.
პროსამთავრობო ვებგვერდი qafqazainfo.az აქვეყნებს სტატიას სახელწოდებით “ახალი დეტალები ჰაფიზ ბაბალის საქმეში“. მიუხედავად იმისა, რომ სტატიაში ახალი დეტალები არ არის, ჟურნალისტი საერთაშორისო საგრანტო ორგანიზაციებთან თანამშრომლობასა და შეკვეთილი მასალების დამზადებაში დაადანაშაულეს. მოგვიანებით ეს პუბლიკაცია ასევე გაავრცელეს ვებგვერდმა ikisahil.az-მა, ATV არხმა და სხვა პროსახელისუფლებო მედიასაშუალებებმა.
ჟურნალისტმა განაცხადა, რომ მას არ აქვს რაიმე პირდაპირი თუ ირიბი კავშირი ამ მასალებში აღნიშნულ ორგანიზაციებთან:
‘არ მიმიღია ბრძანებები არც ერთი საერთაშორისო და ადგილობრივი ორგანიზაციისგან, ასევე ცალკეული პირებისგან, არ ჩამიტარებია რაიმე დაკვეთით გამოძიება და არ დამიწერია სტატიები.
კატეგორიულად უარვყოფ ჩემ შესახებ სრულიად ცრუ და ცილისმწამებელ მასალებს, რომლებიც არანაირ კავშირში არ არის სიმართლესთან და მიმართულია ჩემი, როგორც გამომძიებელი ჟურნალისტის საქმიანი რეპუტაციის შელახვისა და საზოგადოების წინაშე ჩემი დისკრედიტაციისკენ“, – ნათქვამია სააგენტოს რედაქციაში გაგზავნილ ჟურნალისტის განცხადებაში.
ჰაფიზ ბაბალი ითხოვს ამ მასალების ამოღებას შვიდი სამუშაო დღის ვადაში, წინააღმდეგ შემთხვევაში, მისი თქმით, ის გადადგამს გარკვეულ სამართლებრივ ნაბიჯებს.
ჰაფიზ ბაბალი გამომძიებელი ჟურნალისტია, რომელიც ცნობილია აზერბაიჯანის უმაღლეს სამთავრობო ელიტაში კორუფციული დანაშაულების საგამოძიებო მასალებით. ის გასული წლის 13 დეკემბერს ონლაინ გამოცემა Abzas Media-ის საქმეზე დააკავეს. სწორედ ამ გამოცემაში გამოქვეყნდა მისი ბოლო სტატიები.
ეს იყო ბოლო დაკავება ამ საქმეზე. გასული წლის 20 ნოემბრიდან დააკავეს გამოცემის დირექტორი ულვი ჰასანლი, მისი მოადგილე მუჰამედ კეკალოვი, მთავარი რედაქტორი სევინჯ ვაგიფგიზი და რეპორტიორი ნარგიზ აბსალამოვა. ყველა მათგანს ბრალი ედება აზერბაიჯანის სისხლის სამართლის კოდექსის 206.3.2 მუხლით (კონტრაბანდა, რომელიც ჩადენილია პირთა ჯგუფის მიერ).
სასამართლოს გადაწყვეტილებით, Abzas Media-ს საქმეში მონაწილე ყველა პირის და ზოგიერთი მათგანის ნათესავის საბანკო ანგარიშები დაყადაღებულია. დაბლოკილთა შორისაა ასევე მათი დედების, ულვი ჰასანლისა და სევინჯ ვაგიფგიზის საპენსიო ანგარიშები.
ისინი თავს უდანაშაულოდ მიიჩნევენ და აცხადებენ, რომ მათი დაკავება პირდაპირ კავშირშია მათ ჟურნალისტურ საქმიანობასთან.
ხუთი ჟურნალისტიდან არც ერთს არ აქვს ნათესავებთან შეხვედრის ან ტელეფონით კომუნიკაციის უფლება.
“თქვენ ალბათ იცით, რომ ჩვენ – სევინი ვაგიფგიზი, ნარგიზ აბსალამოვა, ჰაფიზ ბაბალი, მუჰამედ კეკალოვი და მე – სრულ იზოლაციაში ვართ. ჩვენთვის დაუშვებელია სატელეფონო ზარები ან შეხვედრები ოჯახების წევრებთან. აკრძალულია ჩვენი ადვოკატებისთვის, ასევე ომბუდსმენისთვის დარეკვა და ახლობლებისთვის წერილების მიწერა. წიგნები ჩვენი ოჯახებიდანაც არ დაუშვეს. რომ შეეძლოთ, ალბათ ახლობლების მოტანილი საკვების გარეშეც დაგვტოვებდნენ. მათ უბრალოდ არ უნდათ, რომ ჩვენ ვიშიმშილოთ, ამიტომ ახლა სახლიდან გვაძლევენ საჭმელს.
ხელისუფლების დამოკიდებულება ჩვენ მიმართ უფრო მკაცრია, ვიდრე სამხედრო ტყვეების მიმართ. მათ თვეში ერთხელ მაინც აძლევენ ოჯახებთან ტელეფონით საუბრის უფლებას, ჩვენ კი ამის საშუალებაც არ გვაქვს. ამის მიზეზი აშკარაა. ხელისუფლება სძულს და მტრულად გამოხატავს თავის დამოკიდებულებას თავისუფალი ჟურნალისტების მიმართ – ვინც სიმართლეს ამბობს“, – წერს ულვი ჰასანლი ციხიდან.
10 იანვარს სააპელაციო პროცესი გაიმართა ულვი ჰასანლის, სევინჯ ვაგიფგიზისა და ჰაფიზ ბაბალას დაკავების შინაპატიმრობით შეცვლაზე – არც ერთი საჩივარი არ დაკმაყოფილდა.
სევინი ვაგიფგიზიმ სასამართლო სხდომაზე სიტყვით გამოსვლისას განაცხადა, რომ მოსამართლისგან სამართლიან გადაწყვეტილებას არ ელოდა. მისი თქმით, აზერბაიჯანში მოსამართლეები გადაწყვეტილებებს არ იღებენ კანონებზე დაყრდნობით, არამედ უბრალოდ ასრულებენ ხელისუფლების ბრძანებებს.
„აზერბაიჯანში ჟურნალისტიკა დანაშაულად ითვლება. ამიტომ მე, როგორც ჟურნალისტი, ციხეში ვარ.“ – თქვა სევინი ვაგიფგიზიმ.
