აზერბაიჯანის დიდ ქალაქებში სკოლები ისევ ჩაკეტეს

ჯემნიუსი

ბაქო

დაძაბული ეპიდემიოლოგიური ვითარების გამო ბაქოსა და აზერბაიჯანის რიგ სხვა დიდ ქალაქებში 5 აპრილიდან სკოლები დისტანციურ სწავლებაზე გადადიან. როდის აღდგება გაკვეთილები საკლასო ოთახებში, არ ზუსტდება.

5 აპრილიდან გაურკვეველ დრომდე

ორშაბათიდან, 5 აპრილიდან, საშუალო სკოლები ბაქოში, განჯაში, შაქისა და სუმგაითში, ასევე აფშერონის რაიონში, სწავლების დისტანციურ ფორმაზე გადადიან კორონავირუსით ინფიცირების დონის ზრდის გამო. ასეთი გადაწყვეტილება მიიღო აზერბაიჯანის განათლების სამინისტრომ. ღიად რჩება საკითხი, როდის განაახლებენ სკოლები ჩვეულ სამუშაო რეჟიმს.

ამასთან, არ ზუსტდება, რამდენი დღით გადადიან სკოლები ონლაინსწავლებაზე. სამინისტროში დასძინეს, რომ ეს გადაწყვეტილება არ ეხება უმაღლეს და სკოლამდელ სასწავლო დაწესებულებებს. საბავშვო ბაღებში სწავლების თაობაზე გადაწყვეტილება უნდა მიიღონ შესაბამისი დასახლებული პუნქტების აღმასრულებელმა ორგანოებმა.

რაც შეეხება უმაღლეს სასწავლებლებს, დღეისათვის დასწრებული სწავლება მიმდინარეობს მხოლოდ იმ სპეციალობებზე, რომლებიც სტუდენტების უშუალო მონაწილეობას მოითხოვს (ინჟინრები, ექიმები და ა.შ.).

საზოგადოების ნახევარი ონლაინსწავლების მომხრეა

30 მარტს, აზერბაიჯანის განათლების სამინისტრომ გამოაცხადა საზოგადოებრივი აზრის გამოკითხვის ჩატარების შესახებ, ზოგადსაგანმანათლებლო სკოლებში სასწავლო პროცესის ორგანიზების ფორმასთან დაკავშირებით.

ორი დღის განმავლობაში გამოკითხვაში მონაწილეობა მიიღო 50 ათას ადამიანზე მეტმა, ნათქვამია უწყების განცხადებაში.

რესპონდენტების თითქმის ნახევარმა (45,7%-მა) მხარი დაუჭირა ყველა კლასის ონლაინსწავლებაზე გადასვლას.

გამოკითხულთა 19,5%-მა აღნიშნა, რომ ონლაინსწავლებაზე გადასვლა მიზანშეწონილია იმ რეგიონებში, სადაც კორონავირუსით ინფიცირების დონე ქვეყანაში არსებულ საშუალო დონეზე მაღალია, გამოკითხულთა 17,2%-მა სურვილი გამოთქვა, ყველაფერი უცვლელად დარჩეს, ანუ სწავლა სასწავლო დაწესებულებებში გაგრძელდეს. მხოლოდ რესპონდენტთა 6,3-მა პროცენტმა დაუჭირა მხარი V-IX კლასების მოსწავლეების ონლაინსწავლებაზე გადასვლას.

პედაგოგების ვაქცინაცია გრძელდება

მარტის დასაწყისიდან აზერბაიჯანში მიმდინარეობს 50 წელზე უფროსი ასაკის საშუალო სკოლების პედაგოგთა ვაქცინაცია. ამ დრომდე, COVID-19-ის საწინააღმდეგო ვაქცინით აცრილია ყველა მასწავლებლის 55%-ზე მეტი, განაცხადეს განათლების სამინისტროში.

ამავე დროს, მთელ ქვეყანაში, უფასოდ და ნებაყოფლობით აცრა შეუძლია 40 წელზე უფროსი ასაკის ყველა მოქალაქეს, მათ შორის, განათლების სფეროს მუშაკებს.

კომენტარები

სოციალური ქსელების აზერბაიჯანული სეგმენტის მომხმარებლები აქტიურად განიხილავენ განათლების სამინისტროს გადაწყვეტილებას სკოლების კარანტინზე ჩაკეტვასთან დაკავშირებით. აი, ზოგიერთი დამახასიათებელი კომენტარი:

„ვფიქრობთ დღევანდელ დღეზე და ვანადგურებთ ჩვენს მომავალს“.

„მაშ, სხვა რეგიონებში რა, დაე გაგრძელდეს მათი ინფიცირება?“

„ნუ, არ უნდა ამ ხალხს სწავლა და შეეშვით“.