აზერბაიჯანი მორიგი ლოკდაუნის მოლოდინშია

მორიგი ლოკდაუნის გამოცხადება აზერბაიჯანში, მედიასა და სოციალურ ქსელებში განხილვის მთავარი თემაა. პოლიტიკოსები, ექიმები და რიგითი მოქალაქეები საკარანტინო რეჟიმის გამკაცრებასთან დაკავშირებით თავიანთ მხარდამჭერ და საწინააღმდეგო არგუმენტებს გვიზიარებენ.

• 13 მარტს საქართველო კორონავირუსის ვაქცინის პირველ პარტიას მიიღებს. ეს AstraZeneca იქნება
• პანდემიამ აზერბაიჯანელი სპორტსმენები ტაქსის მძღოლებად და ფოსტალიონებად აქცია

მეორე კვირაა, აზერბაიჯანული საზოგადოება ქვეყანაში საკარანტინო რეჟიმის მორიგი გამკაცრების მოლოდინში ცხოვრობს. ამას ხელს უწყობს ჭორების მუდმივი გავრცელება და ქვეყანაში მთავარი დღესასწაულის – ნოვრუზის მოახლოება.

ჭორები, რომელსაც ადასტურებს ექსპერტების მოსაზრებები

ჯერ კიდევ მარტის დაწყებამდე, მედიაში გავრცელდა ინფორმაცია, რომლის თანახმადაც, 13 მარტს, მინისტრთა კაბინეტთან არსებული ოპერატიული შტაბი ბრიფინგს გამართავს და 15 მარტიდან, მორიგ ლოკდაუნს გამოაცხადებს.

საკვირველია არა იმდენად ჯერ კიდევ გამოუცხადებელი ღონისძიებების ზუსტი თარიღები, რამდენადაც ის, რომ ბევრი ექსპერტი ადასტურებს ამ ინფორმაციას.

ცხრა დღე – 20-დან 28 მარტის ჩათვლით, აზერბაიჯანში, ნოვრუზის დღესასწაულის გამო უქმედ ცხადდება.

„სადღესასწაულო დღეებში, შესაძლებელია შემზღუდავი ზომების დაწესება ხალხმრავალი თავშეყრის ადგილებში“, – ამბობს აზერბაიჯანის პარლამენტის დეპუტატი, მუშფიგ მამედლი.

„მომავალი, ხანგრძლივი დასვენების განმავლობაში, შეიძლება, საზოგადოებრივი ტრანსპორტის მოძრაობა შეიზღუდოს. ასევე, შეიძლება აკრძალვა დაწესდეს სახლიდან 65 წელზე უფროსი ასაკის პირების გასვლაზე“, – აღნიშნა ექიმმა, აზერბაიჯანის სამედიცინო უნივერსიტეტის დოცენტმა, ადალეტ რუსტამმა.

კარანტინის მოწინააღმდეგეთა ხმები

მითითებული თარიღის მოახლოებასთან ერთად, ზოგიერთმა პოლიტიკოსმა ხისტი განცხადებების გაკეთება დაიწყო სავარაუდო საკარანტინო ზომებთან დაკავშირებით.

„ფასები წინასადღესასწაულო დღეებში იზრდება. მაგრამ მოქალაქეები ვერ იღებენ ადეკვატურ ხელფასებს. არასწორია ყველაფრის დაკეტვა. ამბობენ, რომ ჩაიკეტება გზები რეგიონებში. მაგრამ ამ 10 დღის განმავლობაში, ადამიანებს საშუალება ექნებოდათ, თავიანთ ნათესავებთან წასულიყვნენ.

უნდა ვიფიქროთ პოლიციელებზეც. ისინი არ ზომავენ ტემპერატურას, არამედ მხოლოდ უყურებენ, აქვს თუ არა ამა თუ იმ პიროვნებას სახლიდან გამოსვლის ნებართვა. და აი, გამოდის, რომ დაავადებულმა ადამიანებმა შეიძლება ადვილად დააინფიცირონ სამართალდამცველები.

უნდა გავაძლიეროთ ვაქცინაციის ზომები. ზოგიერთ ქვეყანაში უკვე მწვანე პასპორტებს იღებენ ვაქცინირებულთათვის. ასეთი ზომები ჩვენც უნდა მივიღოთ“, – აღნიშნა აზერბაიჯანის პარლამენტის დეპუტატმა, ფაზილ მუსტაფამ.

ხუმრობები კარანტინის თემაზე

აზერბაიჯანულ საზოგადოებაში ცოტა ვინმე თუ ენდობა რიცხვებს, რომლებსაც ყოველდღიურად აქვეყნებს ოპერატიული შტაბი კოროვონავირუსით ინფიცირებულებსა და გამოჯანმრთელებულებთან დაკავშირებით.

„ოპერატიული შტაბის შეხვედრა:

— რამდენ ინფიცირებულს გამოვაცხადებთ ხვალ?

— 703-ს.

— არა, ეს ჩემი მანქანის ნომერია. ადამიანები შეიძლება დაეჭვდნენ.

— მოდი, მაშინ ვთქვათ 777.

— ეს რა რიცხვია? პირდაპირ, როგორც ქოროღლის შესახებ ეპოსში. მას ჰყავდა 7777 მებრძოლი, ჩვენ – 777 ინფიცირებული. 

— იქნებ 801 ვთქვათ? ისედაც ცოტა დრო დარჩა ბრიფინგამდე. 

—კარგი აზრია. შევთანხმდით, ხვალ, 801-ს ვიტყვით.

მეჩვენება, რომ ამ რიცხვებს ოპერატიული შტაბიდან სწორედ ასე აცხადებენ“, – დაწერა Facebook-ის საკუთარ გვერდზე ოპოზიციური პარტია „რესპუბლიკური ალტერნატივის“ ერთ-ერთმა ლიდერმა, ნატიკ ჯაფარლიმ.