აზერბაიჯანელი კინორეჟისორი გამოვიდა მოწოდებით, "თამამად ჩაცმული ქალები გააუპატიურონ"
კინორეჟისორმა თურალ საფაროვი, რომელიც აზერბაიჯანში ცნობილია ფსევდონიმით „პანთურალი“, ჩაწერა ვიდეო, სადაც ხალხს მოუწოდებდა “შილიფად ჩაცმული ქალები გააუპატიურონ”.
„მოგიწოდებთ ყველას, გააუპატიუროთ შილიფად ჩაცმულები… სადაც არ უნდა შეხვდეთ“, – ამბობს რეჟისორი.
ამ მოწოდებამ სოციალური ქსელების აზერბაიჯანულ სეგმენტში „აფეთქების ეფექტი“ გამოიწვია. მასზე რეაქცია ჰქონდა სოციალური ქსელების ფაქტობრივად ყველა აქტიურ მომხმარებელს. უმრავლესობამ დაგმო რეჟისორის მოწოდება, მაგრამ მისი მხარდამჭერებიც გამოჩნდნენ. ერთ-ერთი ასეთი აღმოჩნდა პოპულარული მომღერალი ნადირ გაფარზადე. ის შილიფად ჩაცმული ქალების წინააღმდეგ „მორალის ჯიჰადის“ მოწოდებითაც კი გამოვიდა.
- “მასწავლებელმა მითხრა, მსუქანი ხარ, ეს კაბა არ გიხდებაო”. სამი გოგოს ამბავი, რომლებსაც წონის გამო ჩაგვრა განუცდიათ
- ქალების პლაჟი დაღესტანში: ისტორია და სკანდალები
სოციალურ ქსელებში დაწყებულ მღელვარებაზე ფაქტობრივად მაშინვე მოახდინა რეაგირება შინაგან საქმეთა სამინისტრომ. მათ განაცხადეს, რომ პოლიცია სწავლობს პანთურალის მოწოდებას.
ამის შემდეგ სოციალურ ქსელებში პანთურალის მორიგი ვიდეომიმართვა გავრცელდა, რომელშიც მან საზოგადოების წინაშე ბოდიში მოიხადა. თურალ საფაროვმა აღიარა, რომ შეცდომა დაუშვა და აზერბაიჯანელი ხალხისგან პატიება ითხოვა.
გენდერის სპეციალისტები და აქტივისტები JAMnews-თან ინტერვიუში ამბობენ, რომ ცნობადი სახისგან მსგავში შინაარსის განცხადებები სახიფათოა.
გენდერის სპეციალისტი გულნარა მეხტიევა აღნიშნავს, რომ კინორეჟისორი სექსუალური ძალადობისა და გაუპატიურების ღია მოწოდებით გამოვიდა.
მეხტიევა ამბობს, „რომ მსგავსი გამოსვლები და ძალადობის მხარდაჭერა საზოგადოებრივი აზრის ფორმულირებას ახდენს”.
“ის საჯარო პირია, ბევრი თაყვანისმცემელი ჰყავს. მის მოსაზრებას ბევრი ადამიანი უსმენს და იზიარებს. ეს უნდა შეფასდეს, როგორც დანაშაული. ასეთი ადამიანები უნდა დაგმოს საზოგადოებამ და ასეთი შემთხვევების წინააღმდეგ კანონმდებლობა უნდა გამკაცრდეს. თუნდაც ის კანონები უნდა გამოიყენონ, რომელიც უკვე არსებობს“.
მეხდიევას აზრით, ბოდიშის მოხდა კარგი ნაბიჯი იყო, თუმცა არასაკმარისი.
“მან ბოდიში მოიხადა, მაგრამ ეს შეიძლება მისი საკუთარი ინიციატივა იყო და ბოდიში სასჯელის სახედ არ მიმაჩნია. არსებობს ისეთი დანაშაულები, რომლებიც ვერანაირი ბოდიშით ვერ გადაიფარება. ბოდიშის მოხდის ტრადიციის კულტივაციის ნაცვლად, ადამიანებს რეალური სასჯელი უნდა დაეკისროთ. მხოლოდ ასე შეწყვეტენ ისინი ასეთი რაღაცების გაკეთებას. ისეთი ადამიანების გამოსვლა, როგორიც პანთურალია, ქალებზე კონტროლის დაკარგვის შიშიდან გამომდინარეობს“, – აღნიშნა მეხტიევამ.
სოციალურ ქსელებში, ერთი დღის განმავლობაში აურაცხელი კომენტარი გაკეთდა თურალ საფაროვის მიმართვის თემაზე. აბსოლუტური უმრავლესობა აკრიტიკებს კინორეჟისორს, მაგრამ არიან მისი მხარდამჭერებიც.
ერთ-ერთი მათგანი, ვინც მხარს უჭერს პანთურალის მოსაზრებას, წერს:
„ვნახოთ, რა იქნება 4-5 წლის შემდეგ. გუშინ ქალაქში ვსეირნობდი. 11-13 წლის გოგონებს არაფრით არ აქვთ დაფარული მხრები და მუცელი. ისე სეირნობენ, თითქოს არაფერი მომხდარა. და როდესაც 18 წელი შეუსრულდებათ, უკვე ბავშვით ხელში შეუერთდებიან ფემინისტებს“.
სოციალურ ქსელ Instagram-ში, გვერდმა Femkulis პანთურალის წინააღმდეგ საჩივრის კამპანია დაიწყო. დროის მოკლე მონაკვეთში, თითქმის 10 ათასმა ადამიანმა დატოვა კომენტარში საკუთარი მონაცემი და გამოთქვა სურვილი, ხელი მოაწეროს კოლექტიურ სარჩელს სასამართლოში თურალ საფაროვის წინააღმდეგ.
იურისტი ვაფა რუსტამი საკითხს იურიდიული მხრიდან მიუდგა. მისი თქმით, პანთურალს საკმარისი რაოდენობის მკითხველი ჰყავს და ამიტომ მისი გამოსვლა უნდა შეფასდეს, როგორც სერიოზული სამართალდარღვევა.
“სერიოზული უფლებადარღვევაა, რომლის შედეგადაც, ნებისმიერი შილიფად ჩასმული ქალი შეიძლება ძალადობის მსხვერპლი გახდეს. თურალ საფაროვის ვიდეომიმართვა პირდაპირ არის მიმართული ადამიანის უფლებების დარღვევისკენ. სიტყვის თავისუფლებას თავისი მკაფიო საზღვრები აქვს და თავისუფლების ამ გამოხატულებამ, არ უნდა დაარღვიოს სხვების უფლებები, მაგრამ თუკი არღვევს, მაშინ სიტყვის თავისუფლებაზე ლაპარაკი არ შეიძლება იყოს.
პანთურალი ქალების სექსუალური დისკრიმინაციის აგიტაციას ახდენს, იყენებს გამოთქმებს, რომელიც ამცირებს და შეურაცხყოფს ქალებს. ამ კონკრეტულ მიმართვაში ამის ერთ-ერთი მაგალითია მისი სიტყვა – „შენ რა, სულელი ხარ?“ – ეს არის მტრობით სავსე გამოსვლა და მიმართულია ქალების წინააღმდეგ.
