"ავტოსტატის" მონაცემებით საქართველოდან რუსეთში 34.6 ათასი ავტომობილი შევიდა, საქსტატის თანახმად - მხოლოდ რვა
“ავტოსტატის” მონაცემები
საქართველო რუსეთისთვის ავტომობილების მიწოდების ერთ-ერთ მთავარ წყაროდ ყალიბდება, მიუხედავად ოფიციალური აკრძალვებისა და ერთმანეთთან შეუთავსებელი სტატისტიკური მონაცემებისა. რუსული ანალიტიკური სააგენტო “ავტოსტატის“ შეფასებით, 2024 წლის დასაწყისიდან საქართველოდან რუსეთში 34.6 ათასი მეორადი მსუბუქი ავტომობილი შევიდა, მაშინ როდესაც საქართველოს ოფიციალური სტატისტიკა იმავე პერიოდში მხოლოდ რვა ავტომობილის ექსპორტს ასახავს.
ეს მონაცემები რუსული სააგენტოს დირექტორმა, სერგეი ცელიკოვმა, საკუთარ Telegram-არხზე გამოაქვეყნა. მისი თქმით, აღნიშნული მაჩვენებელი წინა წლის 11 თვესთან შედარებით სამჯერ მეტია (+218%) და ამოღებულია რუსეთის “ელექტრონული პასპორტების სისტემიდან“, რომლის მონაცემებიც საჯაროდ ხელმისაწვდომი არ არის.
ცელიკოვი ამტკიცებს, რომ საქართველოდან მესამე ქვეყნებისთვის, მათ შორის ყირგიზეთისა და ყაზახეთისთვის, ექსპორტად გაგზავნილი ავტომობილების მნიშვნელოვანი ნაწილი რეალურად რუსეთის ბაზარზე ხვდება, რაც დასავლეთის სანქციების გვერდის ავლის ერთ-ერთ მექანიზმად განიხილება.
“ავტოსტატის“ მიხედვით, მხოლოდ ნოემბერში საქართველოდან რუსეთში 4,778 მეორადი ავტომობილი (სამ წელზე მეტი ასაკის) შევიდა — ეს გასული წლის ნოემბერთან შედარებით 3.3-ჯერ მეტია (+227%). ყველაზე მოთხოვნადი ბრენდებია: BMW, Toyota, Volkswagen, Hyundai და KIA, ხოლო მოდელებს შორის ლიდერობენ BMW X5, Chevrolet Equinox და BMW X7. სტატისტიკა ახალ ავტომობილებს არ მოიცავს.
ამ სურათს მკვეთრად ეწინააღმდეგება საქართველოს სტატისტიკის ეროვნული სამსახურის მონაცემები, რომლის თანახმადაც, იანვარ–ოქტომბერში საქართველოდან რუსეთში ექსპორტირებული იყო მხოლოდ რვა მსუბუქი ავტომობილი, საერთო ღირებულებით 139,300 აშშ დოლარი.
ამავე დროს, ოფიციალური მონაცემებით, საქართველოდან ავტომობილების რეექსპორტი მკვეთრად გაიზარდა სხვა მიმართულებებით: ყირგიზეთში წელს რეექსპორტის ღირებულებამ 1.1 მილიარდ დოლარს გადააჭარბა (35,225 ავტომობილი), ხოლო ყაზახეთში — 639 მილიონ დოლარს (37,093 ავტომობილი).
2023 წელს საქართველომ აკრძალა ავტომობილების რეექსპორტი რუსეთსა და ბელარუსში, თუმცა არ შეზღუდა ამ ქვეყნების მოქალაქეების სახელზე ავტომობილების რეგისტრაცია. შედეგად, დოკუმენტებში საბოლოო დანიშნულების ქვეყნებად ხშირად ყაზახეთი ან ყირგიზეთი ფიქსირდება. მედიის ცნობით, ავტომობილები საბაჟო-გამშვებ პუნქტ “ლარსის“ გავლით გადის და საბოლოოდ რუსეთის ბაზარზე ხვდება.
2024 წლის გაზაფხულზე საქართველომ დამატებითი ნაბიჯი გადადგა და რუსეთსა და ბელარუსზე ავტომობილების რეექსპორტი ამ ქვეყნების მოქალაქეებისთვისაც აკრძალა, როგორც დასავლური სანქციების დაცვის დემონსტრირება. თუმცა ავტოდილერები მალევე გადავიდნენ ალტერნატიულ სქემებზე, რამაც ოფიციალურ სტატისტიკასა და რეალურ ნაკადებს შორის არსებული წინააღმდეგობა კიდევ უფრო თვალსაჩინო გახადა.
