ასლან ბჟანია გადადგა. დე ფაქტო პარლამენტმა მის გადადომას მხარი უკვე დაუჭირა
ასლან ბჟანია გადადგა
აფხაზეთის დე ფაქტო რესპუბლიკის პარლამენტის დეპუტატებმა პრეზიდენტ ასლან ბჟანიას გადადგომას მხარი დაუჭირეს. კენჭისყრაში 31 დეპუტატი მონაწილოებდა, მათგან 28-მ ბჟანიას გადადგომას მხარი დაუჭირა, ერთი წინააღმდეგი იყო, ორი ბიულეტენი კი ბათილად იქნა ცნობილი.
დე ფაქტო რესპუბლიკის პრეზიდენტის მოვალეობას ვიცე-პრეზიდენტი ბადრა გუნბა შეასრულებს, პრემიერ-მინისტრის პოსტზე კი პარლამენტის ყოფილი სპიკერი ვალერი ბგანბა დაინიშნა.
მრავალათასიანი საპროტესტო აქცია აფხაზეთში 15 ნოემბერს დილით დაიწყო, მაშინ, როდესაც პარლამენტს რუსეთ-აფხაზეთის საინვესტიციო შეთანხმების რატიფიცირების საკითხი უნდა განეხილა. ოპოზიცია და საზოგადოების დიდი ნაწილი ამ ფაქტს იდეის გაჩენის მომენტიდან კატეგორიულად აპროტესტებს.
აფხაზეთში ამ შეთანხმებას კაბალურად მიიჩნევენ და ირონიულად „ოლიგარქების სარგებელს“ უწოდებენ.
თავდაპირველად აქციის მონაწილეები, ადგილობრივი ოპოზიცია და მათი მხარდამჭერები ითხოვდნენ პარლამენტს არ მოეხდინა ამ შეთანხმების რატიფიცირება.
მოგვიანებით დემონსტრანტებმა სამთავრობო შენობები დაიკავეს და ბჟანიას გადადგომა მოითხოვეს.
ბჟანია ოპოზიციას და აქციის მონაწილეებს უყენებდა ულტიმატუმს, დაეტოვებინათ სამთავრობო შენობები. ამბობდა, რომ ის დანიშნავდა ახალ არჩევნებს და შემდეგ გადადგებოდა.
ოპოზიცია ამ შეთავაზებას არ დათანხმდა.
ბჟანიას გადადგომის შესახებ ინფორმაცია დღეს, 19 ნოემბერს, დილით გაავრცელა მისმა პრესსამსახურმა. განცხადების თანახმად, ბჟანიამ გადადგომა გადაწყვიტა „ქვეყანაში სტაბილურობის და კონსტიტუციური წესრიგის შენარჩუნების მიზნით“.
ამის შემდეგ ჩაინიშნა პარლამენტის სხდომა, სადაც განსახილველი ერთადერთი საკითხი იყო – ბჟანიას გადადგომა.
ასლან ბჟანია გადადგა
