აშშ-ის კონგრესის კომიტეტმა დაამტკიცა კანონპროექტი, რომლითაც საქართველოს შესაძლოა დახმარების 15% შეუჩერდეს

აშშ-ის კონგრესის წარმომადგენელთა პალატის ასიგნაციების კომიტეტმა დაამტკიცა კანონპროექტი, რომლის თანახმადაც საქართველოს უჩერდება ვაშინგტონის მიერ 2021 წელს საქართველოსთვის გამოყოფილი დახმარების – 15 პროცენტი. მომავალ წელს დახმარების სახით 132 მლნ აშშ დოლარი იყო გამოყოფილი, შესაბამისად, აქედან 20 მილიონ დოლარს საქართველო არ მიიღებს.

დახმარების შემცირების მიზეზი გახდა ის, რომ საქართველოს მთავრობა არ დგამს ეფექტურ ნაბიჯებს “მთავრობის ფუნქციონირებასა და კანონებისა და რეგულაციების გამოყენებაში ოლიგარქების არაფორმალური გავლენის შესაზღუდად”, დემოკრატიული ინსტიტუტების გაძლიერების, კორუფციასთან ბრძოლისა და კერძო სექტორისთვის კანონის უზენაესობის უზრუნველსაყოფად.

აშშ-ისთვის უმნიშვნელოვანეს საბიუჯეტო კანონპროექტში ასეთი მწვავე ჩანაწერების გაკეთება განგაშის საფუძველია ოპოზიციისთვის და სამოქალაქო სექტორისთვის – ისინი მიიჩნევენ, რომ საქართველოსთვის ამერიკის ფინანსური დახმარების შესაძლო შეზღუდვა „ქართული ოცნების“ ხელისუფლებისა და ბიძინა ივანიშვილის ცუდი მმართველობის შედეგია. ხელისუფლება კი ამ შეზღუდვას ვაშინგტონში ოპოზიციის  და კომპანია “ფრონტერას” ლობისტურ საქმიანობას უკავშირებს.

• ივანიშვილის კავშირი რუსეთის მთავრობასთან, დასავლური ბიზნესის შევიწროება – რას წერენ სენატორები აშშ-ს სახელმწიფო მდივანს
• 2013 წლიდან ჩვენ ვხედავთ მზარდ ანტიამერიკულ განწყობას – “ფრონტერა”

კანონპროექტის თანახმად, დაფინანსების სრულად მისაღებად საქართველოს მთავრობა ვალდებულია:

● გაატაროს ეფექტიანი საარჩევნო რეფორმა. 

● უზრუნველყოს სასამართლოს დამოუკიდებლობა, მათ შორის, საკანონმდებლო თუ აღმასრულებელი ხელისუფლების ჩარევისგან.

● უზრუნველყოს  ხელისუფლების ანგარიშვალდებულება და გამჭვირვალობა, მათ შორის, საჯარო ინფორმაციაზე ხელმისაწვდომობის თავისუფალი წვდომა. 

● დაიცვას სამოქალაქო საზოგადოების, ოპოზიციური პოლიტიკური პარტიების უფლებები და მედიის დამოუკიდებლობა. 

● შეზღუდოს მთავრობის ფუნქციონირებასა და კანონებისა და რეგულაციების გამოყენებაში ოლიგარქების არაფორმალურ გავლენას. 

პროექტის მიღებას მხარი კომიტეტის 29 წევრმა დაუჭირა, წინააღმდეგი იყო 21. 

ასიგნებების კომიტეტის დამტკიცების შემდეგ, კანონს კენჭი აშშ-ის წარმომადგენელთა პალატამ უნდა უყაროს. კენჭისყრა სავარაუდოდ, აგვისტოში გაიმართება. 

კანონპროექტში აღნიშნულია, რომ დახმარების შეჩერება არ შეეხება იმ პროგრამებს, რომლებიც ხელს უწყობენ დემოკრატიას, კანონის უზენაესობის, სამოქალაქო საზოგადოების, მედიის განვითარებას ან მიმართულია გენდერული ნიშნით ძალადობის შემცირებაზე.

კანონპროექტში ასევე აღნიშნულია, რომ აქტით გათვალისწინებული არანაირი დახმარება არ იქნება გამოყოფილი იმ ქვეყნის ცენტრალური ხელისუფლებისთვის, რომელიც სახელმწიფო მდივნის მიერ განისაზღვრება როგორც ქვეყანა, რომელიც სხვა ქვეყნის ტერიტორიულ მთლიანობას ხელყოფს.

საქართველოსთან მიმართებაში ეს ეხება აფხაზეთსა და სამხრეთ ოსეთს.