არჩევნები აფხაზეთში: მმართველი პარტიის კანდიდატი და ოპოზიციის ლიდერი კრემლის ერთგულებაში ეჯიბრებიან ერთმანეთს

აფხაზეთის პრეზიდენტობის კანდიდატები

2025 წლის თებერვალში აფხაზეთში ვადამდელი საპრეზიდენტო არჩევნები გაიმართება, რომელშიც მონაწილეობას ხუთი პოლიტიკოსი აპირებს. ესენი არიან დღევანდელი ხელისუფლების კანდიდატი, ოპოზიციის ლიდერი და სამი “ჩრდილოვანი კანდიდატი“. მათ შორის არ არის აშკარა ფავორიტი, რომელსაც შეუძლია არჩევნების პირველივე ტურში გამარჯვება.

დე ფაქტო აფხაზეთს საპრეზიდენტო არჩევნებამდე სასწრაფო რეფორმების გატარებას სთავაზობენ

საზოგადოების ნაწილის აზრით, აფხაზეთში კონსტიტუციის რეფორმები რაც შეიძლება სწრაფად, საპრეზიდენტო არჩევნებამდე უნდა განხორციელდეს.

სახელისუფლებო კანდიდატი ე.წ. ვიცე-პრეზიდენტი ბადრა გუნბა იქნება.

გუნბასთვის მთავარი და, ალბათ, ერთადერთი აშკარა კოზირი მოსკოვის პირდაპირი მხარდაჭერაა. პირველად მრავალი წლის განმავლობაში, კრემლმა შეცვალა მიდგომა აფხაზეთის არჩევნების მიმართ. როგორც წესი, მათთვის მნიშვნელობა არ ჰქონდა, ვინ იჯდა პრეზიდენტის სავარძელში, რადგან აფხაზეთში ნებისმიერი პოლიტიკოსი აპრიორი მზადაა იმეგობროს მოსკოვთან, მაგრამ ამჯერად ფსონი პირველად იდება ერთ კონკრეტულ კანდიდატზე.

ცხადია, ეს დაკავშირებულია აფხაზეთის ნოემბრის მოვლენებთან, როდესაც ოპოზიციამ სამთავრობო შენობები დაიკავა და აიძულა ასლან ბჟანია გადამდგარიყო, შემდეგ კი მათი ზეწოლით პარლამენტმა არ მოახდინა რუსულ-აფხაზური საინვესტიციო შეთანხმების რატიფიცირება. ამან კრემლი სერიოზულად დააეჭვა აფხაზური ოპოზიციის ლოიალობასა და პრორუსულ დამოკიდებულებაში. სწორედ ამიტომ, კრემლი ახლა ღიად უჭერს მხარს ბადრა გუმბას და არა ოპოზიციის კანდიდატს, ადგურ არძინბას.

• მორიგი აფხაზური რევოლუცია. რა იქნება შემდეგ? | ასტამურ ტანია და ინალ ხაშიგი
• კომენტარი აფხაზეთიდან: არა ანტირუსული აქტი, არამედ პასუხი ბჟანიას პოლიტიკაზე

თუმცა, თავად არძინბა ყველანაირად ცდილობს ხაზი გაუსვას, რომ ისიც მაქსიმალურად პრორუსულია.

“მე და ჩემი გუნდი რუსეთის მოქალაქეები ვართ. მთელი ჩვენი გუნდი შედგება აქტიური ადამიანებისგან, რომლებიც პირველი დღიდან აქტიურად იყვნენ ჩართულნი სპეციალურ სამხედრო ოპერაციაში. ჩვენ ვიყავით ერთ-ერთი პირველები, ვინც სოხუმში, სტადიონზე, რუსეთის ფედერაციის მიერ გატარებული საგარეო პოლიტიკური ხაზის მხარდასაჭერად აქცია გამართა. უკრაინაში აფხაზეთიდან უკვე 50-ზე მეტმა ადამიანმა დათმო სიცოცხლე.

ვლადიმირ პუტინი აფხაზეთში აღიქმება, როგორც ზენაციონალური ლიდერი. ჩვენ რუსული გეოპოლიტიკის კვალდაკვალ ვართ და არსად გადახვევას არ ვაპირებთ“, – ციტირებს რუსული “ნეზავისიმაია გაზეტა“ არძინბას სიტყვებს.

"აფხაზეთსა და რუსეთს შორის ურთიერთობების გაუარესებაში პრეზიდენტია დამნაშავე" – ინტერვიუ აფხაზური ოპოზიციის ერთ-ერთ ლიდერთან

ადგურ არძინბა: „ხელისუფლებაში მოსვლის შემდეგ ასლან ბჟანიამ მაშინვე დაიწყო საქართველოსთან ფლირტი“

თუ გუნბა და არძინბა პოლიტიკურ პოლუსებს წარმოადგენენ, მაშინ პრეზიდენტობის დანარჩენ სამ პრეტენდენტებს ცენტრისტები შეიძლება ვუწოდოთ.

ესენი არიან:

• აფხაზეთის ყოფილი სავაჭრო წარმომადგენელი რუსეთში ოლეგ ბარციცი;
• აფხაზეთის კონტროლის პალატის ყოფილი ხელმძღვანელი რობერტ არშბა;
• და აფხაზეთის სახალხო პარტიის ლიდერი შამილ აძინბა.

ისინი არ არიან ფავორიტები საპრეზიდენტო რბოლაში, მაგრამ, მიუხედავად ამისა, შესაძლოა, გუნბასაც და ადგურ არძინბასაც ხმების მნიშვნელოვანი პროცენტი წაართვან. აქედან გამომდინარე, ექსპერტების უმეტესობა თანხმდება, რომ არჩევნების პირველ ტურში ვერც ერთი კანდიდატი ვერ მიიღებს 50%-ზე მეტს.

თუმცა, აფხაზურ საზოგადოებაში საპროტესტო განწყობის დონის და მთლიანობაში სიტუაციის არაპროგნოზირებადობის გათვალისწინებით, შესაძლებელია, რომ პირველი ტურის შედეგების მიხედვით, ამ “აუტსაიდერების“ ჯგუფიდან ერთ-ერთმა “ფავორიტი” კანდიდატი უკან მოიტოვოს.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო