სამი არგუმენტი, რატომ არის კარტოგრაფების საქმე პოლიტიკური. არასამთავრობოების პოზიცია

არასამთავრობო ორგანიზაციები აქვეყნებენ განცხადებას, სადაც აღნიშნულია, რომ საქართველო-აზერბაიჯანის საზღვრის საქმე პოლიტიკურად მოტივირებულია და რუსულ კვალს შეიცავს

______________________________________________

საქართველოში მოქმედი თოთხმეტი ყველაზე ავტორიტეტული არასამთავრობო ორგანიზაცია სპეციალურ განცხადებას ავრცელებს, სადაც აღნიშნულია, რომ საქართველო-აზერბაიჯანის საზღვრის თაობაზე დაწყებული გამოძიება, რომლის ფარგლებშიც ორი ადამიანი უკვე დაკავებულია, პოლიტიკურად მოტივირებული საქმის ეჭვს აჩენს.

“მიგვაჩნია, რომ გამოძიების დაწყების დრო, წინასაარჩევნო კონტექსტი, გამოძიების პროცესში შერჩევითი მიდგომის ნიშნები და მმართველი პარტიის ლიდერების უდანაშაულობის პრეზუმფციის დარღვევით გაკეთებული პოპულისტური განცხადებები აჩენს ეჭვს, რომ გამოძიება პოლიტიკურ მოტივაციებს ემსახურება და მიმართულია საქართველოს მოქალაქეებისთვის მცდარი წარმოდგენების შექმნისა და პოლიტიკური ოპონენტების დისკრედიტაციისაკენ”, — წერია განცხადებაში.

● საქართველო აზერბაიჯანისთვის ტერიტორიების უკანონო დათმობას იძიებს. გახმაურებული საქმის დეტალები

● უძველესმა სამონასტრო კომპლექსმა შესაძლოა საქართველო და აზერბაიჯანი ერთმანეთს დაუპირისპიროს

● აზერბაიჯანული ნაღმები საქართველოში

ხელმომწერებს მოჰყავთ კონკრეტული არგუმენტები, თუ რატომ ტოვებს საქმე პოლიტიკურად მოტივირებულის შთაბეჭდილებას:

შიდაპოლიტიკური კონტექსტი – რატომ არის ეს საქმე წინასაარჩევნო ფანდი? სამი არგუმენტი

1. გამოძიების დრო: გამოძიება, რომელიც საქართველოს მოქალაქეებისთვის უკიდურესად სენსიტიურ თემას ეხება, უმნიშვნელოვანეს საპარლამენტო არჩევნებამდე რამდენიმე დღით ადრე დაიწყო.

წერილში აღნიშნულია, რომ ეს პირველი შემთხვევა არ არის, როდესაც არჩევნებამდე ცოტა ხნით ადრე, “ქართული ოცნების” ხელისუფლება გახმაურებულ გამოძიებებს იწყებს.

მაგალითად, 2013 წლის საპრეზიდენტო არჩევნებამდე ორი კვირით ადრე საქართველოს პროკურატურამ განაცხადა, რომ ახალი გარემოებები გამოიკვეთა ყოფილი პრემიერ-მინისტრის ზურაბ ჟვანიას გარდაცვალების საქმეზე.

მოგვიანებით, ამ საქმეზე დააკავეს სასამართლო-სამედიცინო ექსპერტი ლევან ჩიჩუა, რომელმაც გამოძიების მტკიცებით, ზურაბ ჟვანიასა და რაულ უსუპოვის გვამების გამოკვლევისას გამოიჩინა გულგრილობა და სრულყოფილად არ აღწერა გვამებზე არსებული დაზიანებები. ჩიჩუა რვათვიანი პატიმრობის შემდეგ უდანაშაულოდ სცნო უზენაესმა სასამართლომ.

2018 წლის საპრეზიდენტო არჩევნების წინ, პროკურატურამ გახსნილად გამოაცხადა ბიზნესმენ ბადრი პატარკაციშვილის მკვლელობის მომზადების საქმე.

ამ საქმეებზე პოლიტიკოსებისა და ოფიციალური უწყებების საჯარო განცხადებები ქმნიდა შთაბეჭდილებას, რომ ხელისუფლების მთავარი ინტერესი არა საქმის გამოძიება, არამედ ოპონენტებისთვის წინასაარჩევნო პერიოდში ზიანის მიყენება იყო.

2. მმართველი პარტიის რიტორიკა: ივერი მელაშვილისა და ნატალია ილიჩოვას დაკავების შემდეგ, ხელისუფლების ლიდერებმა მიმდინარე საქმეზე უდანაშაულობის პრეზუმფციის პრინციპის დარღვევით, გააკეთეს პოლიტიზებული და პოპულისტური განცხადებები. ეს განცხადებები იმ დროს გაკეთდა, როდესაც დაკავებულ პირებს ბრალი ოფიციალურად არც კი ჰქონდათ წარდგენილი.

3. შერჩევითი მიდგომა გამოძიების პროცესში. პროკურატურის ინფორმაციით, ბრალდება საქართველო-აზერბაიჯანის საზღვრის დელიმიტაცია-დემარკაციის სახელმწიფო კომისიის საქმიანობის 2005 – 2007 წლების პერიოდს შეეხება. აღნიშნულ პერიოდში საგარეო საქმეთა მინისტრად მუშაობდა საქართველოს ამჟამინდელი პრეზიდენტი სალომე ზურაბიშვილი. გამოძიებას ზურაბიშვილი არც კი დაუკითხავს.

გეოპოლიტიკური კონტექსტი და შესაძლო რუსული კვალი

არასამთავრობო ორგანიზაციების წარმომადგენლები მიიჩნევენ, რომ წინასაარჩევნო კონტექსტთან ერთად, ასევე მნიშვნელოვანია გაირკვეს აღნიშნული საქმის გეოპოლიტიკური, რეგიონული კონტექსტიც – რატომ გააქტიურდა ეს თემა მაშინ, როდესაც რეგიონში აზერბაიჯანსა და სომხეთს შორის საომარი მოქმედებები მიდის.

● რუსული ფული ქართულ არჩევნებში – რა დაუგეგმეს რუსმა კონსულტანტებმა ქართველ “პატრიოტებს”

● ხატის მოგზაურობა – როგორ ურთიერთობდნენ ქართველები აფხაზებთან მოსკოვის გავლით. ვიდეო

არასამთავრობო ორგანიზაციები საქმეში რუსულ კვალზე საუბრობენ და ამას რამდენიმე არგუმენტით ხსნიან:

1. რუკები რუსი ბიზნესმენისგან: მედიაში გავრცელებული ინფორმაციით, ტოპოგრაფიული რუკები თავდაცვის სამინისტროს რუსულ სპეცსამსახურებთან დაახლოებულმა ბიზნესმენმა დავით ხიდაშელმა მიაწოდა. თავად ხიდაშელი ადასტურებს, რომ თავდაცვის სამინისტროს რუკები მან მიაწოდა. მედიის ინფორმაციით, ხიდაშელმა ეს დოკუმენტები რუსეთის საგარეო დაზვერვის საიდუმლო ოფიცრის, ოლეგ მუბარაშკინის დახმარებით მოიპოვა.

2. პრორუსული პოლიტიკოსების წინმსწრები განცხადებები: არასამთავრობო ორგანიზაციების აზრით, რუსულ კვალთან დაკავშირებული არგუმენტია ისიც, რომ გამოძიების დაწყებას წინ უძღოდა “საქართველოს პატრიოტთა ალიანსის” ლიდერის, დეპუტატ ირმა ინაშვილის მიერ 11 ივნისს პარლამენტის პლენარულ სხდომაზე გაკეთებული განცხადება, რითაც ის სახელმწიფო საზღვრის დელიმიტაციისა და დემარკაციის სამთავრობო კომისიის საქმიანობაზე გამოძიების დაწყებას ითხოვდა. “პატრიოტთა ალიანსის” რუსულ სპეცსამსახურებთან კავშირის შესახებ საგამოძიებო ჟურნალისტური პლატფორმა, „დოსიე“ მიუთითებდა, თუმცა პროკურატურამ ამ ფაქტებთან დაკავშირებით გამოძიება არც კი დაიწყო. 

რეკომენდაციები ხელისუფლებას: “შეწყდეს წინასაარჩევნოდ სენსიტიური თემებით მანიპულირება”

არასამთავრობო ორგანიზაციები მოუწოდებენ ხელისუფლებას, შეწყვიტოს წინასაარჩევნოდ მოსახლეობისათვის სენსიტიური თემებით მანიპულირება, შეისწავლოს საქართველოს შიდა საქმეებში რუსეთის სპეცსამსახურებისაგან ჩარევის რისკები და გამოძიებაში რუსეთთან დაკავშირებული პირების ჩართულობის საკითხი. ასევე, უზრუნველყოს ივერი მელაშვილისა და ნატალია ილიჩოვას სამართლიანი სასამართლო პროცესი და არ დაუშვას უდანაშაულო პირთა უფლებების დარღვევა.

• არასამთავრობო ორგანიზაციები, რომლებიც აღნიშნული დასკვნის დაწერაში მონაწილეობდნენ: საერთაშორისო გამჭვირვალობა-საქართველო; ღია საზოგადოების ფონდი; სამართლიანი არჩევნებისა და დემოკრატიის საერთაშორისო საზოგადოება; მედიის განვითარების ფონდი; საზოგადოება და ბანკები; კვლევითი ჟურნალისტიკისა და ადვოკატირების ცენტრი; ადამიანის უფლებათა ცენტრი; ეკონომიკური პოლიტიკის კვლევის ცენტრი; საქართველოს რეფორმების ასოციაცია; საქართველოს ატლანტიკური საბჭო; ადამიანის უფლებების სწავლებისა და მონიტორინგის ცენტრი; სამოქალაქო განვითარების სააგენტო; საქართველოს ახალგაზრდა იურისტთა ასოციაცია; საქართველოს გაეროს ასოციაცია.

კარტოგრაფების საქმე. მოკლედ

მოკლედ საქმის არსი შემდეგშია: გამოძიების თანახმად, სააკაშვილის დროს მომუშავე საქართველო-აზერბაიჯანის დელიმიტაცია-დემარკაციის სახელმწიფო კომისიამ გადამალა მნიშვნელოვანი რუკა, რის შედეგადაც ტერიტორიების გარკვეული ნაწილი (3 500-მდე ჰა ფართობის მიწა), რომლებიც წესით საქართველოს კუთვნილებაა, აზერბაიჯანულ მხარეს გადაეცა.

პროკურატურამ ამ საქმის ძიება 17 აგვისტოს დაიწყო. საქმეში ერთადერთი მტკიცებულებაა – 1938 წელს გამოცემული რუკა. ამ რუკაზე (სხვა რუკებისგან განსხვავებით) მიწების გარკვეული ნაწილი საქართველოს მხარესაა. საუბარია საქართველოსა და აზერბაიჯანს შორის არსებულ სადავო ტერიტორიაზე – დავით გარეჯის სამონასტრო კომპლექსზე.

პროკურატურის ინფორმაციით, კომისიის წევრი ბრალდებული ექსპერტები საზღვრების დელიმიტაციის პროცესში ხელმძღვანელობდნენ 1970-80-იან წლებში გამოცემული რუკებით, “რაც არსებითად ეწინააღმდეგება ჩვენი ქვეყნის ისტორიულ საზღვარს, მათ შორის დავით გარეჯთან მიმართებაში,” – წერია პროკურატურის განცხადებაში.

რუკის ასლი, რომელზეც მთელი საქმეა აგებული, ქართულმა მხარემ რუსეთში მოღვაწე ბიზნესმენისგან მიიღო. ხოლო, რუკის დედანი, როგორც გამოძიება ამბობს, ნატალია ილიჩოვას სახლში ჩხრეკისას იპოვეს.

მელაშვილი და ილიჩოვა არ აღიარებენ დანაშაულს და აბსურდულს უწოდებენ მას. ისინი ამ საქმეს პოლიტიკას და არჩევნებს უკავშირებენ. მათი თქმით, რუკა, რომელზეც არის საუბარი, ხარვეზიანი იყო და მისი არსებობა არანაირ საიდუმლოს არ წარმოადგენდა.

პოლიტიზებულს უწოდებენ საქმეს ოპოზიცია, ექსპერტები და არასამთავრობო ორგანიზაციების წარმომადგენლები. არჩევნებამდე 24 დღით ადრე, პრეზიდენტ სააკაშვილის დროს მოქმედი კომისიის საქმიანობის ბუნდოვანი გამოძიების მიზანი სააკაშვილის და მისი პარტიის “ნაციონალური მოძრაობის” დისკრედიტაციაა, ფიქრობენ დამკვირვებლები.