აქცია "უცხოური აგენტების კანონპროექტის" წინააღმდეგ. ფოტოები
აქცია აგენტების კანონპროექტის წინააღმდეგ
ე.წ. უცხოური აგენტების შესახებ კანონპროექტების განხილვას აპროტესტებენ დღეს პარლამენტთან ჟურნალისტები, სამოქალაქო სექტორის წარმომადგენლები და პოლიტიკოსები.
აქციის მთავარი ლოზუნგი იყო “არა რუსულ კანონს!”
აქციაზე შეკრებილები აცხადებდნენ, რომ ხელისუფლება მიზანმიმართულად ცდილობს საქართველოს ევროპული ინტეგრაციის შეფერხებას. აღნიშნული კანონის მიღების შემთხვევაში საქართველოში დაიწყება კრიტიკული მედიის და არასამთავრობო ორგანიზაციების შევიწროება ზუსტად ისე, როგორ ეს რუსეთში მოხდა, აცხადებდნენ აქციის მონაწილეები.
- ჩხუბი და ხმაური პარლამენტში: სხდომა, სადაც “აგენტების კანონს” განიხილავენ, დეპუტატებს ძალით დაატოვებინეს
- პარლამენტმა, სადაც”აგენტების შესახებ კანონს” გახილავენ, აკრედიტაცია შეუჩერა კრიტიკულ ჟურნალისტებს
მიტინგი პარლამენტთან დილის 9 საათზე დაიწყო. ზუსტად მაშინ, როდესაც პარლამენტის შენობაში იურიდიული კომიტეტის სხდომა გაიხსნა, რომელზეც აღნიშნულ კანონს განიხილავდნენ.
აქციის მონაწილეები საყვირებით და ტრანსპარანტებით იყვნენ შეიარაღებული. ისინი სკანდირებდნენ – “არა რუსულ კანონს!”, “მოღალატეებო!”, “საქართველო ევროპაა!”
იურიდიულ საკითხთა კომიტეტის სხდომა ხმაურის ფონზე მიმდინარეობდა. “ქართული ოცნების” და მისი სატელიტი პარტიის “ხალხის ძალის” დეპუტატებს ოპონირებას უწევდნენ ოპოზიციონერები და ასევე არასამთავრობო ორგანიზაციების წარმომადგენლები, რომლებიც სხდომაზე იყვნენ მიწვეულნი. მანდატურებმა სხდომა ძალის გამოყენებით დაატოვებინეს ოპოზიციონერ დეპუტატებს წესრიგის დარღვევის გამო.
- რას ნიშნავს კანონი უცხოელი აგენტების შესახებ, რომელსაც “ქართული ოცნება” იღებს. რა ვიცით ამ დროისთვის
მანამდე პარასკევს, 3 მარტს, კანონპროექტს მწვანე შუქი აუნთეს საგარეო საქმეთა და თავდაცვის საპარლამენტო კომიტეტებზე.
შემდეგი ნაბიჯი უკვე კანონპროექტის პარლამენტის პლენარულ სხდომაზე გასვლა იქნება. თუმცა, როდის მოხდება ეს, უცნობია. ბიუროს სხდომა, სადაც “აგენტების” კანონპროექტის პლენარულზე გასვლის დრო უნდა განესაზღვრათ დღეს 15:00 საათზე უნდა გამართულიყო, თუმცა გადაიდო.
“უცხოელი აგენტების რეგისტრაციის” და “უცხოური გავლენის გამჭვირვალობის” შესახებ კანონპროექტი “ქართული ოცნების” სატელიტის, “ხალხის ძალის” მიერაა ინიციირებული.
