Apple-მა კორონავირუსის გამო, 9 თებერვლამდე ჩინეთში ყველა მაღაზია დახურა

Apple-მა სიცოცხლისთვის სახიფათო კორონავირუსის სწრაფად გავრცელების გამო, 9 თებერვლამდე, ჩინეთში თავისი ყველა, 42-ვე მაღაზია დახურა.

კომპანიის ოფიციალური ჩინური ვებგვერდი, მაღაზიების მისამართების ძიებისას გაფრთხილებას იძლევა, რომ ისინი დახურულია „ჯანდაცვის სფეროში არსებული სიტუაციისა და პროფილაქტიკური ღონისძიებების გამო“.

გამოცემა Bloomberg-ის ცნობით, კორონავირუსის ეპიდემიის გამო Apple-ს შეიძლება პრობლემები შეექმნას ახალი მოწყობილობების გამოშვებაში – იმიტომ, რომ ორი უმსხვილესი ფაბრიკა, სადაც iPhone-ებს აწყობენ, დაახლოებით, 500 კილომეტრში არის ქალაქ უხანიდან, სადაც დაავადების პირველი შემთხვევები დაფიქსირდა.

Bloomberg-ი წერს, რომ ეს მანძილი არც ისე დიდია და დაავადების გავრცელების საფრთხე იქ საკმაოდ მაღალია.

ეპიდემიასთან დაკავშირებულ აქტუალურ მოვლენებს შეგიძლიათ თვალი ადევნოთ ამ ონლაინ-რუკაზე.

ამ დროისთვის, ოფიციალური მონაცემებით, კორონავირუსით გარდაიცვალა 305 ადამიანი – 346 დაავადებული კი გამოჯანმრთელდა. საერთო ჯამში, ინფიცირებულია 14 ათასი ადამიანი.

ამასთან, კორონავირუსი უკვე გავრცელდა, როგორც მინიმუმ 15 ქვეყანაში. ჯანდაცვის მსოფლიო ორგანიზაციამ ჩინეთში ეპიდემიის გამო, საგანგებო მდგომარეობა გამოაცხადა.