"არ მიიღოთ ანტი-ლგბტქ კანონი" - ევროსაბჭოს კომისარი საქართველოს პარლამენტს მიმართავს
ანტი-ლგბტ კანონი
ევროსაბჭოს კომისარმა ადამიანის უფლებათა საკითხებში, მაიკლ ო’ფლაჰერთიმ საქართველოს პარლამენტის თავმჯდომარეს, შალვა პაპუაშვილს ოფიციალური წერილი 6 სექტემბერს გაუგზავნა, რომელშიც ევროპელი მაღალჩინოსანი პარლამენტის წევრებს მოუწოდებს, არ მიიღონ ანტი-ლგბტ კანონი “ოჯახური ღირებულებებისა და არასრულწლოვანების დაცვის შესახებ”.
როგორც წერილშია აღნიშნული, კანონპროექტი უზრუნველყოფს ლგბტქ ადამიანების დისკრიმინაციის სამართლებრივ საფუძველს და ეწინააღმდეგება ადამიანის უფლებათა ევროპულ კონვენციას.
ადამიანის უფლებათა კომისრის განცხადებით, ევროპულმა სასამართლომ არაერთხელ დაადგინა, რომ ისეთი ზომები, როგორიცაა შეკრების აკრძალვა და ლგბტქ პირებთან დაკავშირებული ინფორმაციის გავრცელების შეზღუდვა, დისკრიმინაციულია და არღვევს ამ ადამიანების შეკრების თავისუფლების უფლებას:
კანონპროექტი ლგბტქ ადამიანების წინააღმდეგ დისკრიმინაციას სამართლებრივ საფუძველს უქმნის, რაც შეუსაბამოა ადამიანის უფლებათა ევროპულ კონვენციასთან
ო’ფლაჰერთი ასევე აცხადებს, რომ კანონპროექტში სექსუალურ ორიენტაციისა და გენდერული იდენტობის პარალელურად ინცესტის ხსენება აძლიერებს ლგბტქ ადამიანების მიმართ სტიგმატიზებას და დისკრიმინაციას.
„მე ასევე პატივისცემით ვთხოვ პარლამენტის წევრებს, თავი შეიკავონ რიტორიკის გამოყენებისგან, რომელიც ლგბტქ პირების სტიგმატიზებას ახდენს, მათ შორის თანაბარი უფლებების მოპოვების მიზნით ლეგიტიმური ძალისხმევის „პროპაგანდად“ წარმოჩენისგან“, – ნათქვამია წერილში.
4 სექტემბერს საქართველოს პარლამენტმა მეორე მოსმენით ჰომოფობიურ და პროპაგანდისტულ კანონპროექტს მხარი დაუჭირა. კანონპროექტის განხილვასა და კენჭისყრას არ დაესწრო ოპოზიცია.
ევროკავშირის უმაღლესი წარმომადგენლის პრეს-სპიკერის, პიტერ სტანოს განცხადებაში ნათქვამია, რომ ევროკავშირი გმობს „ოჯახური ღირებულებების და არასრულწლოვანთა დაცვის შესახებ” საკანონმდებლო პაკეტის მეორე მოსმენით ნაჩქარევად მიღებას.
განცხადებაში აღნიშნულია, რომ პაკეტი ძირს უთხრის საქართველოს მოსახლეობის ფუნდამენტურ უფლებებს და მოსახლეობის ნაწილის სტიგმატიზაციისა და დისკრიმინაციის გაძლიერების საფრთხეს ქმნის.
რა წერია კანონპროექტში
● ქართულ ოცნებას სურს კანონში ჩაწეროს, რომ დაუშვებელია ქორწინების ალტერნატიული კავშირის რეგისტრირება, რომელიც არ იქნება კავშირი ქალს და კაცს შორის. ასევე, ქვიარ ადამიანებს არ შეეძლებათ არასრულწლოვანის შვილად აყვანა. აღსანიშნავია, რომ ამ ორი უფლებით საქართველოში ქვიარები ვერც ახლა სარგებლობენ, რადგან კანონი ისედაც აწესებს შეზღუდვებს.
● გარდა ამისა, ცვლილებები კიდევ უფრო აუარესებს ტრანსგენდერი ადამიანების უფლებებს, რადგან ზღუდავს სამედიცინო სერვისებზე ხელმისაწვდომობას, ტრანზიციას (სქესის შეცვლის პროცედურას), ასევე, ზღუდავს პირადობის დამადასტურებენ დოკუმენტებში გენდერული იდენტობის შესაბამისი სქესის ჩანაწერს.
● ცვლილებები ზღუდავს გამოხატვის თავისუფლებასაც. შალვა პაპუაშვილის განმარტებით, დაუშვებელი იქნება საგანმანათლებო დაწესებულებაში ისეთი ინფორმაციის გავრცელების ხელშეწყობა, “რომელიც მიმართულია ადამიანის თავისი სქესისგან განსხვავებული სქესის მიკუთვნების, ერთი და იმავე სქესის წარმომადგენლებს შორის ურთიერთობის, ან ინცესტის პოპულარიზაციისკენ”.
● ამასთან, დაუშვებელი იქნება ამგვარი ინფორმაციის გავრცელება ტელევიზიების მხრიდანაც. სავარაუდოდ, აქ იგულისხმება ფილმებიდან კონკრეტული სცენების ამოჭრა ან მათი დაფარვა.
● კანონის მიღების შემთხვევაში, აიკრძალება საჯარო შეკრება და მანიფესტაციაც, “რომელიც მიმართული არის ადამიანის თავისი სქესისგან განსხვავებული სქესის მიკუთვნების, ერთი და იმავე სქესის წარმომადგენლებს შორის ურთიერთობის, ან ინცესტის პოპულარიზაციისკენ”.
აღნიშნული კანონპროექტით ქართული ოცნება ამტკიცებს, რომ “ოჯახური ღირებულებების დაცვა” სურს, თუმცა რეალურად ლგბტქ თემის უფლებებს ზღუდავს და ცენზურას აწესებს. ჰომოფობიურ კანონპროექტზე კრიტიკული დასკვნა მოამზადა ვენეციის კომისიამაც.
