"ანქვაბმა ქართველებს იარაღი გადასცა" - აფხაზეთში პრემიერის წინააღმდეგ კამპანია დაიწყო
ანქვაბი, იარაღი და ქართველებისთვის და ცილისწამების საქმე
აფხაზეთში პრემიერმინისტრის, ალექსანდრ ანქვაბის გარშემო ახალი სკანდალია. თავდაპირველად, 70 წლის იუბილესთან დაკავშირებით, იგი დაჯილდოვდა უმაღლესი ჯილდოთი – პირველი ხარისხის ორდენით „ახძ-აფშა“ („პატივი და დიდება“). ამას მაშინვე აღშფოთება მოჰყვა ვეტერანთა ორგანიზაცია “არუას” მხრიდან – ორგანიზაციის ლიდერები აცხადებენ, რომ ანქვაბი დამნაშავეა აფხაზეთის ომის დროს ქართული მხარისთვის იარაღის მიწოდებაში. საპასუხოდ, ხელისუფლებამ ცილისწამების საქმე გაიხსენა.
მას შემდეგ, რაც ანქვაბის დაჯილდოება დაემთხვა მის 70 წლის იუბილეს, პრეზიდენტ ასლან ბჟანიას, ალბათ, არც კი წარმოედგინა, რომ ეს გამოიწვევდა კრიტიკის ასეთ ნიაღვარს. დიდი ალბათობით, ის მხოლოდ აფხაზეთის ხელისუფლებაში პოპულარულ „საბჭოთა რიტუალს“ ასრულებდა – ცნობილი ადამიანებისთვის „მრგვალ“ თარიღებზე სახელმწიფო ჯილდოების გადაცემას.
მაგრამ ვეტერანებმა ამ საკითხთან დაკავშირებით სპეციალური განცხადება გაავრცელეს და თქვეს, რომ „ანქვაბი არ არის ასეთი ჯილდოს ღირსი, რადგან ის უმწიკვლო რეპუტაციის მქონე ადამიანებს უნდა გადაეცეს.“
განცხადებაში დეტალურად არის ჩამოთვლილი მიზეზები, რის გამოც ვეტერანები ერთ-ერთ უძველეს აფხაზ პოლიტიკოსს მაღალი ჯილდოს ღირსად არ თვლიან.
- აფხაზეთის მოქმედი პრემიერი და ყოფილი პრეზიდენტი – უმდიდრესთა სიაში
- მოსაზრება: აფხაზეთში კრიზისი გარდაუვალია – მნიშვნელოვანია, როგორ შეხვდება მას ხელისუფლება
- სოხუმი: ოპოზიცია ითხოვს ჩინოვნიკების დამნაშავეებად გამოცხადებას რუსეთთან დადებული ხელშეკრულების გამო
აფხაზეთში შეიარაღების მთელი არსენალი ქართველების კონტროლის ქვეშ გადავიდა
“არუა” ამტკიცებს, რომ აფხაზეთის ომის დასაწყისში ანქვაბმა – რომელიც იმ დროს აფხაზეთის შინაგან საქმეთა მინისტრი იყო – მთელი იარაღი აფხაზეთის კგბ-ს უფროსს, ავთანდილ იოსელიანს გადასცა. ვინაიდან ის ეროვნებით ქართველი იყო, ფაქტობრივად, იარაღი, ქართულ მხარესთან მივიდა.
განცხადების ავტორები იხსენებენ, რომ აღნიშნულ ფაქტზე შემდგომში აღიძრა სისხლის სამართლის საქმე და გამოძიების დროს დადასტურდა გადაცემის ფაქტი. თუმცა, იურისტები მომხდარს მხოლოდ უფლებამოსილების ბოროტად გამოყენებად აფასებდნენ.
იცოდა თბილისის გეგმების შესახებ აფხაზეთში ჯარების გაგზავნაზე, მაგრამ არ გაგვაფრთხილა
არის კიდევ ერთი ბრალდება. “არუა” თავის განცხადებაში ამტკიცებს, რომ აფხაზეთის პირველმა პრეზიდენტმა ვლადისლავ არძინბამ საჯაროდ დაადანაშაულა ალექსანდრ ანქვაბი იმის გამო, რომ მან იცოდა საქართველოს მხრიდან აფხაზეთში შეჭრის შესახებ, მაგრამ არ გააფრთხილა ქვეყნის პოლიტიკური ხელმძღვანელობა.
„შემდეგ ანქვაბი მინისტრის თანამდებობიდან გაათავისუფლეს და ის მრავალი წლის განმავლობაში არ ჩასულა აფხაზეთში საზოგადოების წნეხის გამო“, – ნათქვამია განცხადებაში.
ქართველებს მასიურად დაურიგეს აფხაზეთის მოქალაქეობა
ბრალდების კიდევ ერთი პუნქტი ეხება ალექსანდრ ანქვაბის პრეზიდენტობის პერიოდს – 2011 წლიდან 2014 წლამდე.
ანქვაბს, როგორც განცხადების ავტორები აცხადებენ, „არ სურდა მნიშვნელოვანი სახელმწიფო პრობლემების გადაჭრა და არალეგალურად, მასიურად არიგებდა აფხაზეთის მოქალაქეობას, რათა ორი ვადით დარჩენილიყო ხელისუფლებაში – საქართველოს მოქალაქეების ხარჯზე.“
ამ ქმედებებმა, “არუას” თქმით, 2014 წლის მაისში სოხუმი ყველაზე ღრმა პოლიტიკურ კრიზისამდე მიიყვანა. ამის შემდეგ პარლამენტმა სახელმწიფოს მეთაური თანამდებობიდან გაათავისუფლა.
ცილისწამების საქმე პრემიერმინისტრის წინააღმდეგ
აფხაზეთის სამართალდამცავმა უწყებებმა მიიჩნიეს, რომ განცხადების ტექსტი ცილისწამების ნიშნებს შეიცავს. 4 იანვარს “არუას” ლიდერები თემურ გულია და თემურ ნადარაია გენერალური პროკურატურის სახელით შინაგან საქმეთა სამინისტროში დაიბარეს. მათ დაადასტურეს, რომ განცხადება მათ მიერ იყო დაწერილი და გავრცელებული.
ახლა “არუას” ხელმძღვანელები ცილისწამების ფაქტებზე გენერალური პროკურატურის ოფიციალურ ბრალდებას ელოდებიან.
კომენტარი
ცნობილი აფხაზი ჟურნალისტი იზიდა ჭანია სიტუაციას კომიკურს უწოდებს.
„პროკურატურას არ სურს განიხილოს ოპოზიციის ბრალდებები პრეზიდენტის მიმართ კონსტიტუციისა და კანონების დარღვევაში. ისინი ცალსახად ვერ ხედავენ რა ზიანი მიაყენა აფხაზეთის ეკონომიკას პრემიერმინისტრმა ალექსანდრ ანქვაბმა. აჭგუარას ელექტროგადამცემი ხაზის შეკეთებისას კორუფციის დამადასტურებელი დოკუმენტების ნამდვილობასაც ვერ ხვდებიან. არ პასუხობენ ასლან ბჟანიას „მოწამვლის“, პასპორტების უკანონო გაცემის და ა.შ. საქმეზე გამოძიების ჩატარების მოთხოვნებს.
მაგრამ პროკურატურა დროს, ძალისხმევას და რესურსს არ იშურებს ოპოზიციის ლიდერების ცილისწამებაში ცნობაზე – შინაგან საქმეთა ყოფილი მინისტრის, ალექსანდრ ანქვაბის მონაწილეობას სახელმწიფო უსაფრთხოების სამსახურის ყოფილი თავმჯდომარის, ავთანდილ იოსელიანისთვის იარაღის გადაცემაში.
ამ საქმეს თავად გენერალური პროკურატურაც იძიებდა.
ამიტომ, კითხვები გულიას და ნადარაიას მიმართ კი არა მივმართოთ – ან აფხაზეთის დანარჩენ მოსახლეობის მიმართ, რომელთა მეხსიერება ჯერაც არ მომკვდარა – არამედ გენერალური პროკურატურის არქივის მიმართ, რომელშიც უნდა ინახებოდეს ამ საქმის მასალები – მათ შორის თავად ალექსანდრ ანქვაბის ჩვენებაც.
თუ ეს დოკუმენტები არ არის გენერალურ პროკურატურაში, მაშინ გამოძიება უნდა ჩატარდეს არა ცილისწამების ფაქტზე, არამედ სამსახურებრივი დანაშაულის – დოკუმენტების გაქრობის ფაქტზე.
