"დიახ, ვკვდებით, როგორც ქვეყანა". დაკავებული მსახიობის, ანდრო ჭიჭინაძის დედა შვილზე და მის ბრძოლაზე. VIDEO

ანდრო ჭიჭინაძის საქმე

პროევროპული საპროტესტო აქციების მონაწილე, 28 წლის მსახიობი ანდრო ჭიჭინაძე 5 დეკემბერს, შინაგან საქმეთა სამინისტროს თანამშრომლებმა საკუთარ ბინაში დააკავეს.

მსახიობის დედა, ლიკა გუნცაძე უყვება JAMnews-ს შვილის დაკავებაზე, მის ბრძოლაზე და იმაზე, თუ რატომ გახდა ანდრო რეჟიმის სამიზნე:

ანდრო ჭიჭინაძის საქმე, თბილისის საქალაქო სასამართლოს მოსამართლე თამარ მჭედლიშვილმა 7 დეკემბერს, პროევროპული აქციებისას დაკავებული კიდევ ხუთი პირის სისხლის სამართლის საქმესთან ერთად განიხილა.

გამოძიება მათ ჯგუფურ ძალადობაში მონაწილეობას, სისხლის სამართლის კოდექსის 225-ე მუხლის მეორე ნაწილით ჩადენილ დანაშაულს ედავება, რაც სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.

ანდრო ჭიჭინაძის ბრალზე საუბრისას, პროკურორმა თქვა: „ანდრო ჭიჭინაძე მონაწილეობდა ჯგუფურ ძალადობაში. 2024 წლის 29 ნოემბერს იმყოფებოდა საპროტესტო აქციაზე, ჯოხს ისროდა სამართალდამცავების მიმართულებით, რითაც საფრთხეს უქმნიდა მათ ჯანმრთელობას“.

რაიმე კონკრეტული მტკიცებულება, რომელიც დაადასტურებდა ანდრო ჭიჭინაძის მძიმე დანაშაულს, სასამართლოზე წარმოდგენილი არ ყოფილა:
“აქვთ მხოლოდ რაღაც ჯოხის მოქნევის კადრი – არც ჩანს ვის მოხვდა, სად მოხვდა, სად დავარდა, საქმეში არც დაზარალებულია, ფაქტობრივად, არანაირი მტკიცებულება არ არის,” – ამბობს ჭიჭინაძის ადვოკატი თორნიკე მიგინეიშვილი.

თბილისსა და საქართველოს სხვა ქალაქებში პროევროპული პროტესტები მას შემდეგ დაიწყო, რაც 28 ნოემბერს საქართველოს პრემიერ-მინისტრმა, ირაკლი კობახიძემ განაცხადა, რომ “ქართული ოცნების” ხელისუფლებამ მიიღო გადაწყვეტილება 2028 წლის ბოლომდე შეაჩეროს ევროკავშირში გასაწევრიანებლად მოლაპარაკები. საერთოდ ჯამში, 28 ნოემბრიდან დღემდე სამართალდამცავებმა მშვიდობიანი პროტესტის 400-ზე მეტი მონაწილე დააკავეს. დაკავებულთა შორის არ არიან პოლიციელები, მათ შორის ისინიც, ვინც ჟურნალისტებზე პირდაპირ ეთერში მუშაობის დროს იძალადეს.

დაკავებულთა დიდი ნაწილს ადმინისტრაციულ სამართალდარღვევებს ედავებიან. 30-ზე მეტ ადამიანს კი სისხლის სამართლის საქმე და რამდენიმეწლიანი პატიმრობა ემუქრება. მათ შორისაა მსახიობი ანდრო ჭიჭინაძე.

4 დეკემბერს, დაკავებამდე ერთი დღით ადრე, რუსთაველის გამზირზე მიმდინარე პროევროპულ აქციაზე ანდრო ჭიჭინაძესთან ინტერვიუ ჩაწერა ონლაინ გამოცემა On.ge-მ:

„მე ვდგავარ ჩემს მეგობრებთან ერთად ევროპული მომავლისთვის და მგონია, რომ აუცილებელია, დღეს ყველა სფერო გაიფიცოს, იმისთვის, რომ ევროპულ მომავალს არ შეექმნას საფრთხე. აუცილებელია, რომ ამ მთავრობას ყველანაირად შევუშალოთ ხელი და გაფიცვა ალბათ ერთ-ერთი ყველაზე მნიშვნელოვანი ხერხია ამისთვის და ყველაფერი უნდა გავაკეთოთ იმისთვის, რომ მთავრობას, რომელიც არის აბსოლუტურად არალეგიტიმური, მაქსიმალურად შევუშალოთ ხელი და ერთხელ და სამუდამოდ ვუთხრათ, რომ ჩვენ არ შევეგუებით იმას, რა პოლიტიკასაც დღეს ისინი აწარმოებენ“.

ასევე 4 დეკემბერს ანდრო ჭიჭინაძემ სოციალურ ქსელში გამოაქვეყნა პოსტი – „გავიფიცე“.

ანდრო ჭიჭინაძის დაკავების შემდეგ სოციალურ ქსელში, ერთმანეთის მიყოლებით ავრცელებენ პოსტებს მსახიობები და ამბობენ, რომ ისინი გაიფიცნენ.

დღეს საქართველოში თეატრალური ცხოვრება თითქმის შეჩერებულია – მსახიობებმა და რეჟისორებმა სცენიდან ქუჩაში გადაინაცვლეს და საერთო პროტესტს შეუერთდნენ. ეს პროტესტი საქართველოში ერთ თვეზე მეტია გრძელდება. თეატრების ნაწილი, მათ შორის, სახელმწიფო „ახალი თეატრი“ და მუნიციპალური „სამეფო უბნის თეატრი“ გაფიცულია: დარბაზები ცარიელია, სპექტაკლები არ ტარდება.

ზოგადად, მსახიობები, რეჟისორები და თეატრისა და კინო ინდუსტრიის წარმომადგენლები განსაკუთრებით აქტიურად არიან ჩართულები ბოლო დროის საპროტესტო გამოსვლებში. მათი ხმა ხმამაღლა ისმოდა ე.წ. აგენტების კანონის წინააღმდეგ გამოსვლების დროსაც. მაშინ თეატრალური სპექტაკლების ბოლოს მსახიობებს სცენაზე გამოჰქონდათ ბანერები “არა რუსულ კანონს” და “არა რუსულ მთავრობას”. კულტირუს მუშაკები ასევე დიდი ხნის განმავლობაში ბოიკოტში იმყოფებოდნენ კულტურის ყოფილ მინისტრთან, თეა წულუკიანთან, რომელიც “ქართული ოცნების” ერთ-ერთი ყველაზე ოდიოზური სახეა.

კულტურის მუშაკების ასეთი აქტიურობა და ასევე ახალგაზრდებში მათი ავტორიტეტი გახდა იმის მიზეზი, რომ რეჟიმი კულტურის ახალგაზრდა წარმომადგენლებს განსაკუთრებით ებრძვის, მიიჩნევენ დამკვირვებლები.

28 წლის ანდრო ჭიჭინაძე ვასო აბაშიძის სახელობის ახალი თეატრის მსახიობია. მას შესრულებული აქვს არაერთი კინოროლიც, მათ შორის, ფილმებში „შინდისი“, „და მერე გათენდა“, „იუნკერები“, „სოხუმი“.

ქართველი მსახიობის დაკავების ფაქტს გამოეხმაურა ევროპის კინოაკადემია, რომელიც მოუწოდებს საქართველოს ხელისუფლებას, “დაუყოვნებლივ და უპირობოდ” გაათავისუფლოს ანდრო ჭიჭინაძე:

“როგორც ჩანს, ეს დაკავება ხელისუფლების უფრო ფართო ძალისხმევის ნაწილია მშვიდობიანი პროტესტის ჩახშობისა და საზოგადოების დაშინების მიზნით, რაც სერიოზულ შეშფოთებას იწვევს საქართველოში გამოხატვის თავისუფლებისა და ხელოვანების უსაფრთხოების გამო”, – წერია კინოაკადემიის 13 დეკემბრის განცხადებაში.

ანდრო ჭიჭინაძის საქმე , ანდრო ჭიჭნაძის დედა ლიკა გუნცაძე , მსახიობების პროტესტი , ახალი ამბები , გაფიცვა