Amnesty International-ი საქართველოს მოუწოდებს არ გადასცეს თურქეთს დემირელის კოლეჯის მმართველი

Amnesty International-ი საქართველოს მოუწოდებს არ გადასცეს დემირელის სკოლის დაკავებული მმართველი მუსტაფა ემრე ჩაბუქი თურქეთს. ამ საქმესთან დაკავშირებით ვრცელი განცხადება ორგანიზაციამ 28 მაისს გაავრცელა. ორგანიზაციის მოსაზრებით, ჩაბუქი თურქეთში შესაძლოა წამების, სასტიკი, არაადამიანური და ღირსების შემლახავი მოპყრობის მსხვერპლი გახდეს.

ორგანიზაცია საქმით დაინტერესებულ პირებს მოუწოდებს გაგზავნონ შესაბამისი წერილები საქართველოს პრემიერ-მინისტრ გიორგი კვირიკაშვილისა და იუსტიციის მინისტრ თეა წულუკიანის სახელზე, რათა საქართველომ შეასრულოს საერთაშორისო ვალდებულებები და არ მოახდინოს დეპორტაცია, ექსტრადიცია ან სხვა ფორმით მუსტაფა ჩაბუქის დაბრუნება ქვეყანაში, სადაც მას, შესაძლოა, საფრთხე დაემუქროს.

Amnesty International-ის განცხადებაში აღნიშნულია, რომ 2016 წლის შემდეგ, თურქეთის მთავრობა ზეწოლას ახორციელებს მოკავშირეებზე, რათა მათ ფეთულა გიულენის სავარაუდო მხარდამჭერები დააკავონ.

მუსტაფა ემრე ჩაბუქს თბილისის საქალაქო სასამართლომ წინასაექსტრადიციო 3-თვიანი პატიმრობა 25 მაისს შეუფარდა. თურქული მხარე მას ტერორისტულ ორგანიზაციასთან თანამშრომლობას ედავება. ის თბილისში სწორედ თურქული მხარის მოთხოვნით 24 მაისს დააკავეს.

ჩაბუქის გათავისუფლების მოთხოვნით, ონლაინ-პეტიცია ვრცელდება, რომელსაც ამ დროისთვის 500-ზე მეტი მოქალაქე აწერს ხელს. პეტიციის ხელმომწერები აცხადებენ, რომ ჩაბუქი უდანაშაულოა და თურქეთის ბრალდებები – უსაფუძვლო. ისინი საქართველოს პრეზიდენტს, პარლამენტის თავმჯდომარეს და იუსტიციის მინისტრს მიმართავენ.