Amnesty International: დაუყოვნებლივ გათავისუფლდეს ყველა დაკავებული დემონსტრანტი
Amnesty International-ის განცხადება
საერთაშორისო ადამიანის უფლებადამცველი ორგანიზაცია Amnesty International მოუწოდებს საქართველოს ხელისუფლებას, დაუყოვნებლივ გაათავისუფლოს ყველა, ვინც საქართველოში გამოხატვის თავისუფლებისა და შეკრების უფლების მშვიდობიანი გამოყენების გამო დააკავეს.
ამასთან, ორგანიზაცია განცხადებაში წერს, რომ გასული წლის 30 დეკემბერს “ქართულმა ოცნებამ “დრაკონული კანონი შემოიღო, რომელიც პოლიციას, მათ შორის, სამართალდარღვევის შესაძლო ჩადენის აღკვეთის მიზნით პრევენციული დაკავების უფლებას აძლევს.
Amnesty International ხაზს უსვამს, რომ ბათუმში დაკავებული აქტივისტები მათე ცენტერაძე და ციალა ქათამიძე, ახლახან მიღებული კანონით დააკავეს, რომელიც საჯარო შენობებზე საპროტესტო სტიკერების გაკვრას კრძალავს.
“საქართველოს ხელისუფლებამ დაუყოვნებლივ უნდა გაათავისუფლოს ყველა პირი, რომლებიც გამოხატვის თავისუფლებისა და შეკრების უფლების მშვიდობიანი გამოყენების გამო დააკავეს და ჩაატაროს სწრაფი, საფუძვლიანი და მიუკერძოებელი გამოძიება პოლიციის მიერ ძალის უკანონო და არაპროპორციული გამოყენების შესახებ
[დრაკონული კანონები] ფაქტობრივად პროტესტის სიმბოლური აქტების კრიმინალიზებასაც კი ახდენს, როგორიცაა სტიკერების გაკვრა საჯარო შენობებზე. ეს ზომები მიზანმიმართულად გამოიყენება მშვიდობიანი დემონსტრანტების მიზანში ამოსაღებად და მათი ხმების ჩასახშობად”. – ამბობს აღმოსავლეთ ევროპისა და ცენტრალური აზიის საკითხებში Amnesty International-ის დირექტორის მოადგილე, დენის კრივოშეევი.
ამავდროულად, Amnesty International-ი აღნიშნავს, რომ 11-სა და 12 იანვარს, თბილისსა და ბათუმში 20-ზე მეტი ადამიანი, მათ შორის, აქტივისტები, ჟურნალისტები და ოპოზიციის წარმომადგენლები დააკავეს, რომლებიც სოლიდარობას უცხადებდნენ მანამდე დაკავებულ დემონსტრანტებს.
ორგანიზაცია აზუსტებს, რომ “ბათუმელებისა” და “ნეტგაზეთის” დამფუძნებელი მზია ამაღლობელი კი 12 იანვარს ორჯერ დააკავეს. პირველად ადმინისტრაციული დარღვევისთვის – კედელზე პოსტერის გაკვრის გამო, მეორედ კი როგორც სისხლის სამართლის საქმით ეჭვმიტანილი.
გარდა ამისა, Amnesty International ხაზს უსვამს, რომ 2024 წლის დეკემბერში წამებისა და სხვა არასათანადო მოპყრობის არაერთი შემთხვევისა და პოლიციის სისასტიკის შესახებ ასობით ცნობის მიუხედავად, არც ერთი სამართალდამცავი ან ნიღბიანი ძალადობრივი ჯგუფის წევრი გამოვლენილი ან პასუხისგებაში მიცემული არ არის.
● 11-12 იანვარს პოლიციის მხრიდან უკანონო დაკავებები ხდებოდა როგორც თბილისში, ასევე ბათუმში. სულ დღის მანძილზე დააკავეს 16 ადამიანი – 7 ბათუმში და 9 თბილისში. მათგან გამოუშვეს მხოლოდ ელენე ხოშტარია და გიორგი კირთაძე, რადგან მათ დეპუტატის სტატუსი აქვთ, დანარჩენები გადაყვანილები არიან დროებით მოთავსების იზოლატორებში.
● 11 იანვარს ბათუმში ადმინისტრაციული წესით 10-ზე მეტი პირი, ხოლო სისხლის სამართლის წესით 1 პირი დააკავეს, ხოლო თბილისში კი ადმინისტრაციული წესით დააკავეს 1 პირი.
● სულ არჩევნების შემდგომ დღემდე სახელმწიფომ ადმინისტრაციული წესით 480-ზე მეტი, ხოლო სისხლის სამართლის წესით – 43 პირი დააკავა.
● “ბათუმელებისა“ და “ნეტგაზეთის“ დამფუძნებელი და დირექტორი, მზია ამაღლობელი 12 იანვარს ბათუმის პოლიციის მთავარ სამმართველოსთან გამართულ ხალხმრავალ აქციაზე დააკავეს.
● პროპაგანდისტული ტელეკომპანია „იმედის“ მიერ გავრცელებულ უხმო კადრებში ჩანს, რომ მზია ამაღლობელი სახეში ხელს არტყამს პოლიციის უფროსს, ირაკლი დგებუაძეს. თავად ჟურნალისტმა სახალხო დამცველის წარმომადგენელს უთხრა, რომ დაკავებამდე სამართალდამცავები ძალიან უჭერდნენ ხელზე, რის გამოც ხელი ძლიერად აიქნია და უნებურად პოლიციელს მოარტყა.
