კახეთში მაჩვზღარბა გადაიღეს. სამცხე-ჯავახეთში გენოციდის 108-ე წელი აღნიშნეს. ამბები რეგიონებიდან
ამბები საქართველოს რეგიონებიდან
ქარელში რუსმა სამხედროებმა საქართველოს ორი მოქალაქის დაკავება სცადეს
21 აპრილს ქარელის მუნიციპალიტეტის სოფელ ჭვრინისის მიმდებარედ, რუსეთის საოკუპაციო ძალებმა საქართველოს ორი მოქალაქის უკანონოდ დაკავება სცადეს. გამოცემა Qartli.ge უსაფრთხოების სამსახურზე დაყრდნობით წერს, რომ რუსეთის საოკუპაციო ძალის წარმომადგენლებმა ტერიტორია ქართველი პოლიციელების გამოჩენის შემდეგ დატოვეს.
ვრცლად: qartli.ge
რიკოთზე მუშები გაიფიცნენ
იმერეთში, რიკოთის ავტობანის მშენებლობაზე დასაქმებული მძღოლები გაიფიცნენ. გაფიცული 20-მდე ადამიანია. ისინი დღიური ანაზღაურების გაზრდას და უსაფრთხო სამუშაო პირობებს ითხოვენ. ახლა მათი ხელფასი დღეში 33 ლარია.
“12-ტონიანი მანქანით დაგვაქვს 50-60 ტონა, უსაფრთხოების ნორმები საერთოდ არ არის დაცული. ძალიან რთულ მონაკვეთზე ვმუშაობთ, არის მეწყრული ზონები, როცა დაგვიძახებენ უპრობლემოდ მივდივართ, რომ არ გაჩერდეს მგზავრობა და გზა არ დაიკეტოს. ჩვენი მხრიდან პრობლემა არ არის, პრობლემას ქმნის თვითონ კომპანია”, – ამბობს გამოცემა “ქუთაისიპოსტთან” ერთ-ერთი დასაქმებული.
ვრცლად: kutaisipost.ge
ახალციხეში აღნიშნეს 108 წელი სომეხთა გენოციდიდან
23 აპრილს, ახალციხეში, სომეხთა გენოციდიდან 108-ე წელი აღნიშნეს. ადგილობრივი სომეხი მოსახლეობა სომხური ტაძრის ეზოში შეიკრიბა, ლამპრები აანთო და შეძახილით – “აღიარე!” ქალაქში მსვლელობა მოაწყო. ტაძრიდან შეკრებილებმა გენოციდის მსხვერპლთა მემორიალთან გადაინაცვლეს.
შეძახილით „აღიარე“ სომხები თურქეთსა და მსოფლიოს 1915 წელს ოსმალეთის იმპერიაში სომეხთა მასობრივი გენოციდის აღიარებისაკენ მოუწოდებენ. ახალციხეში მცხოვრები სომეხი მოსახლეობა ამ დღეს ყოველ წელს აღნიშნავს.
ვრცლად: sknews.ge
ნინოწმინდაში სომეხთა გენოციდის ამსახველი ფოტოების გამოფენა მოაწყეს
სომეხთა გენოციდის 108-ე წლისთავი აღნიშნეს ნინოწმინდაშიც, სადაც მცხოვრებთა უმრავლესობა ეთნიკურად სომეხია. ნინოწმინდის კულტურის ცენტრში სპეციალური ფოტოგამოფენა მოეწყო. ფოტოებზე გენოციდის ამსახველი მოვლენები იყო აღბეჭდილი.
სომხების გენოციდი ოსმალეთის იმპერიაში 1915 წელს დაიწყო და 1923 წლამდე გაგრძელდა. ამ პერიოდში დაახლოებით 1,5 მილიონი სომეხი დაიღუპა.
ვრცლად: nor.ge
მარნეულში რამაზანის დღესასწაულისთვის გაჭირვებულ ოჯახებს პროდუქტები დაურიგეს
მარნეულში, სოფელ ქუთლიარში, რამაზანის დღესასწაულთან დაკავშირებით, გაჭირვებულ ოჯახებს პროდუქტები დაურიგეს. დახმარება სოფლის მაცხოვრებლების მიერ დაფუძნებული „ქუთლიარის ქველმოქმედების ფონდის“ მიერ განხორციელდა.
ფონდის წევრებმა რადიო მარნეულთან საუბრისას განაცხადეს, რომ ასეთი დახმარებები ყოველ წელს ხორციელდება და მომავალშიც გაგრძელდება.
ვრცლად: marneulifm.ge
კასპში, სოფელ ხოვლეში, ნაგვის ურნები არ აქვთ
კასპში, სოფელ ხოვლეში ნაგვის ურნების დადგმას ითხოვენ. მოსახლეობა ამბობს, რომ სოფელში სტიქიური ნაგავსაყრელები მომრავლდა. რადიო “მოზაიკასთან” ადგილობრივები ამბობენ, რომ სოფლის ყველა უბანი ნაგვით არის სავსე და ზაფხულში სოფელში გავლა შეუძლებელი გახდება.
ვრცლად: mozaikanews.ge
როგორ ცხოვრობს ხალხი სოფელ ხოვლეში, ამ თემაზე ნახეთ “ჯემნიუსის” დოკუმენტური ფილმი:
გორში, მეჯვრისხევში შარშან აშენებული საბავშვო ბაღი ჯერ ისევ უფუნქციოა
გორში, სოფელ მეჯვრისხევში, ამ დრომდე არ ამოქმედებულა საბავშვო ბაღი, რომელიც სამი წელი შენდებოდა. გორის სკოლამდელი აღზრდის სააგენტოში რადიო “მოზაიკას” ვერ უპასუხეს კითხვაზე, როდის იგეგმება ბაღის ამოქმედება.
ვრცლად: mozaikanews.ge
კარალეთში ჯერ ისევ ვერ დაასრულეს 2020 წელს დაწყებული საბავშვო ბაღის მშენებლობა
გორში, კარალეთში, ვერ დაასრულეს საბავშვო ბაღის მშენებლობა, რომელიც ჯერ კიდევ, გასული წლის დეკემბერში უნდა დასრულებულიყო. გამოცემა qartli.ge წერს, რომ მშენებელ კომპანიას სამუშაოების დასრულების თარიღი რამდენჯერმე გადაუწიეს. ბოლო ხელშეკრულებით, დასრულების ვადად 28 თებერვალი იყო განსაზღვრული. ამავე გამოცემის ცნობით, ეს ბაღი 2020 წლიდან შენდება.
ვრცლად: qartli.ge
კახეთში ხალხმა ფული შეაგროვა ეროვნული გმირის, გიორგი ანწუხელიძის ბიუსტის დასადგმელად
კახეთში, სოფელ ქვემო ალვანში, ადგილობრივებმა 27 ათასი ლარი შეაგროვეს ეროვნული გმირის, გიორგი ანწუხელიძის ბიუსტის დასადგმელად. ქვემო ალვანი გმირის მშობლიური სოფელია, ამიტომ, ბიუსტსაც ამ სოფელში დადგამენ. ბიუსტზე მუშაობა უკვე დაიწყო თუშმა მოქანდაკე ბადრი თავბერიძემ.
გიორგი ანწუხელიძე საქართველოს ჯარში მსახურობდა. ის 2008 წლის აგვისტოში საოკუპაციო ძალებმა ცხინვალში წამებით მოკლეს. სიკვდილის შემდეგ კი მას საქართველოს ეროვნული გმირის წოდება მიენიჭა.
ვრცლად: speqtri.ge
ლაგოდეხში ფოტომახემ მაჩვზღარბა გადაიღო
ლაგოდეხის დაცულ ტერიტორიებზე ფოტომახემ მაჩვზღარბა დააფიქსირა. ამ ტერიტორიაზე რეინჯერებს მაჩვზღარბას ეკლები რამდენჯერმე უნახავთ, მაგრამ ეს არის პირველი შემთხვევა, როდესაც ცხოველიც ნახეს.
მაჩვზღარბა გავრცელებულია ახლო აღმოსავლეთში, ირანიდან სამხრეთ ჩინეთამდე, ინდოეთში, სიცილიასა და ცეილონზე. ასევე გვხვდება სამხრეთ-აღმოსავლეთი აზიის ცალკეულ რეგიონებში, შუა აზიასა და ამიერკავკასიაში. გამოცემა “კახეთის ხმა” წერს, რომ საქართველოში მაჩვზღარბა აზერბაიჯანიდან შემოვიდა 2000-იანების დასაწყისში.
ვრცლად: knews.ge
ქუთაისელი მოჭადრაკე გოგო მსოფლიო ჩემპიონი გახდა
ქუთაისელი მოჭადრაკე ანასტასია კირთაძე საბერძნეთის როდოსზე მიმდინარე მსოფლიო სასკოლო ჩემპიონატის გამარჯვებული გახდა. მან 9-იდან 7,5 ქულით, მსოფლიოს სასკოლო ჩემპიონატზე, 15 წლამდე ასაკის გოგონათა შორის, დამაჯერებლად გაიმარჯვა.
აღსანიშნავია, რომ 2011 წლის შემდეგ ქართველი მოჭადრაკე მსოფლიოს ახალგაზრდული ჩემპიონატის გამარჯვებული პირველად გახდა.
ვრცლად: kutaisipost.ge
თელაველი სპორტსმენი კარატეში ევროპის ჩემპიონი გახდა
თელავში მცხოვრებმა ავთანდილ პარწიკანაშვილმა კარატეში ევროპის ჩემპიონის ტიტული მოიპოვა. კიოკუშინ კარატეს ევროპის ღია ჩემპიონატი IFK ვერსიით 21-23 აპრილს, ერევანში გაიმართა. ჩემპიონატში ევროპისა და შუა აზიის 14 ქვეყნის 225 სპორტსმენი მონაწილეობდა.
ვრცლად: knews.ge
ახალციხელმა ტაეკვანდოელებმა სომხეთში ოქროს მედლები აიღეს
ახალციხელმა ტაეკვან-დოს სპორტსმენებმა ნინო გონგაძემ და იასონ გელაშვილმა, სომხეთში, ღია საერთაშორისო ტურნირზე, ოთხი ოქროს მედალი აიღეს. ნინო და იასონი სამცხე-ჯავახეთის სახელმწიფო უნივერსიტეტის ტაეკვან-დოს გუნდის წევრები არიან. ნინო მწვრთნელია, იასონი მისი მოსწავლე.
ნინო გონგაძე ვეტერინარიის ფაკულტეტის მეორე კურსზე სწავლობს და პარალელურად ახალგაზრდებს კორეულ საბრძოლო ხელოვნებას ასწავლის. იგი ტაეკვანდოში შავი ქამრის მფლობელი და მსოფლიო ჩემპიონია.
ვრცლად: sknews.ge
ამბები საქართველოს რეგიონებიდან
