"ამ ტემპით, ჩვენ სიღარიბისთვის ვართ განწირულები“ - მოსაზრება აფხაზეთის 2026 წლის ბიუჯეტის პროექტზე
აფხაზეთის 2026 წლის ბიუჯეტი
აფხაზეთის ე.წ. მინისტრთა კაბინეტმა დაამტკიცა 2026 წლის სახელმწიფო ბიუჯეტის პარამეტრები.
2026 წლის ბიუჯეტის მთლიანი ოდენობაა:
- შემოსავალი – 19 მილიარდ 14 მილიონ 559,4 ათასი რუბლი [233,9 მილიონი აშშ დოლარი];
- ხარჯები – 19 მილიარდ 440 მილიონ 641,9 ათასი რუბლი [239,2 მილიონი აშშ დოლარი];
- ბიუჯეტის დეფიციტი – 426 მილიონ 82,5 ათასი რუბლი [5,24 მილიონი აშშ დოლარი].
ამჟამად, კანონპროექტს “2026 წლის რესპუბლიკური ბიუჯეტის შესახებ“ ე.წ. პრეზიდენტი ბადრა გუნბა განიხილავს, რომელიც, სავარაუდოდ, მას პარლამენტს წარუდგენს.
ბიუჯეტის შემოსავლების ნაწილი მოდის რუსეთის ფინანსურ დახმარებებზე – 5,5 მილიარდი რუბლი [67,65 მილიონი აშშ დოლარი].
ამ მაჩვენებლების განხილვის შემდეგ, აფხაზი ეკონომისტი ახრა არისტავა სამწუხარო დასკვნამდე მიდის, რომ ამ ტემპით, აფხაზეთის მოსახლეობის უმრავლესობა განწირულია სიღარიბეში ცხოვრებისთვის მომავალი წლების განმავლობაში.
ახრა არისტავა:
“რესპუბლიკის საკუთარი ბიუჯეტის შემოსავლების 2026 წლის ზრდა პრეზიდენტის მიერ დასახულ მიზნებს ვერ აკმაყოფილებს. ის მხოლოდ 800 მილიონ რუბლს [9.84 მილიონი დოლარი] შეადგენს, რაც 2025 წლის ბიუჯეტთან შედარებით 10%-ზე ოდნავ მეტია.
ეს, პირველ რიგში, იმით არის განპირობებული, რომ არც ეკონომიკის სამინისტრომ და არც ფინანსთა სამინისტრომ არ შემოგვთავაზეს რაიმე მნიშვნელოვანი რეფორმა. მაშ, როგორ აპირებენ ისინი, რეფორმებისა და ცვლილებების გარეშე, საჯარო სექტორში ხელფასების გაორმაგებას და მათ საშუალოდ 45,000 რუბლამდე [554 დოლარი] აყვანას მომდევნო წლებში?
ეს მიზანი პრეზიდენტმა დაისახა და მთავრობათაშორის კომისიაზე გააჟღერა. როგორ აპირებს მთავრობის ეკონომიკური ბლოკი ამ საკითხის მოგვარებას და მოქალაქეების ცხოვრების ხარისხის გაუმჯობესებას, თუ ბიუჯეტის შემოსავლების ზრდა ინფლაციის დონის ტოლია?
ამ ტემპით, ჩვენ კიდევ ათი წელი სიღარიბეში დავრჩებით. რუსული სიღარიბის შკალის მიხედვით, სიღარიბე განისაზღვრება, როგორც თვეში 30 000 რუბლზე [370 აშშ დოლარი] ნაკლები შემოსავალი. ხოლო აფხაზეთში ყველა საჯარო სექტორის მუშაკისთვის ეს მაჩვენებელი უფრო დაბალია.
მე მჯერა, რომ ბიუჯეტი გადახედვას საჭიროებს და პრეზიდენტის ადმინისტრაციამ პროექტი მინისტრთა კაბინეტს უნდა დაუბრუნოს.”
