კადიროვის ხელისუფლებამ მოსამართლის ცოლი გაიტაცა. მორიგი დაუჯერებელი ამბავი ჩეჩნეთიდან
რეპრესიები ჩეჩნეთში
რუსეთის შემადგენლობაში შემავალი ჩრდილოკავკასიური რესპუბლიკის, ჩეჩნეთის ხელისუფლებამ – საკუთარი სახლიდან ძალით გაიყვანა ყოფილი ჩეჩენი ფედერალური მოსამართლის აბუბაქარ იანგულბაევის ცოლი და ჩეჩენი უფლებადამცველის დედა – ზარემა მუსაევა.
ქალის გატაცება არა ჩეჩნეთში, არამედ რუსულ ქალაქ ნიჟნი ნოვგორორში მოხდა, სადაც ოჯახი ბოლო პერიოდში ცხოვრობდა.
გატაცებული ქალი ჩეჩნეთში ჩაიყვანეს.
ფაქტს ჩეჩნეთის მეთაური გამოეხმაურა. კადიროვმა პირდაპირ თქვა, რომ გატაცებული ქალის ვაჟი ოპოზიციურ ტელეგრამ-არხს მართავს და მთელი ოჯახის სასტიკად დასჯის პირობას დებს. საქმის დეტალებს «Новая газета» აქვეყნებს.
______________________
ფედერალური მოსამართლის, საიდ იანგულბაევის სახლში, ქალაქ ნიჟნი ნოვგოროდში ჩეჩნეთის პოლიციის წარმომადგენლები 20 იანვარს მივიდნენ.
იანგულბაევის ვაჟი აბუბაქარ იანგულბაევი „წამების საწინააღმდეგო კომიტეტის“ ჩრდილოკავკასიური ფილიალის ყოფილი თანამშრომელია.
ძალოვანები მოსამართლის დაკავება ვერ მოახერხეს, მისი ცოლი, 59 ქალი კი დაკავების პროცესში სცემეს და მან გონება დაკარგა.
„ის კარტოფილის ტომარასავით ჩამოათრიეს კიბეზე, მას თხელი კაბა და შიშველ ფეხზე ჩუსტები ეცვა“, – განაცხადა ადვოკატმა ნატალია დობრონრავოვამ, რომელიც ამ მოვლენების თვითმხილველი გახდა.
- ჩეჩნეთის ხელისუფლებამ ადამიანს კამერის წინ საკუთარი თავის წამება აიძულა
- ვინ კლავს ევროპაში ჩეჩნებს, რომლებიც რამზან კადიროვს აკრიტიკებენ?
პოლიციელებმა მუსაევა, რომელსაც მეორე ტიპის დიაბეტი აქვს გაურკვეველი მიმართულებით წაიყვანეს ტანსაცმლის, აუცილებელი წამლებისა და ინსულინის გარეშე.
დაკავების მიზეზი გახდა ის, რომ საიდ იანგულბაევი და მისი მეუღლე თაღლითობის საქმეზე მოწმის სახით უნდა დაკითხონ, რისთვისაც ისინი ჩეჩნეთში უნდა გადაეყვანათ.
იანგულბაევის ფედერალური მოსამართლის სტატუსი მის ხელშეუხებლობას უზრუნველყოფს და ასეთ დადგენილებას უკანონოდ აქცევს. მეტიც, იანგულბაევის ოჯახში ამბობენ, რომ მათი ოჯახის არც ერთ წევრს არ მიუღია არანაირი ცნობა სასამართლოში დაკითხვაზე დაბარების შესახებ.
მოგვიანებით, ჩეჩენმა ომბუდსმენმა მანსურ სოლტაევმა გამოაქვეყნა მუსაევასთან საუბრის ვიდეო, სადაც ქალი ამბობს, რომ წამალი უყიდეს და მასზე არანაირი ძალადობა არ ყოფილა.
მუსაევას ვაჟი, აბუბაქარ იანგულბაევი მომხდარს „ჯოჯოხეთს“ უწოდებს.
„სიტყვები არ მაქვს. არ მჯერა, რომ ასეთი რამ შეიძლება ხდებოდეს რუსეთში. დედაჩემს ვიცნობ და ახლა, ვიდეოზე ის ძალიან მძიმე მდგომარეობაშია“, – აქვეყნებს მის სიტყვებს „წამების საწინააღმდეგო კომიტეტი“. გუშინ, აბუბაქარ იანგულბაევმა ტელეარხ „Дождь“-ის ეთერში განაცხადა, რომ დროებით დატოვა რუსეთი.
კადიროვი: „მთელ ოჯახს არ აქვს პატივი და ღირსება“
ჩეჩნეთის მეთაურმა რამზან კადიროვმა კომენტარი გააკეთა მუსაევას დაკავებაზე და ფაქტობრივად დაადასტურა, რომ ამის მიზეზი გახდა მისი უკმაყოფილება ოპოზიციური ტელეგრამ-არხით, რომელსაც, ჩეჩნეთის ხელისუფლების აზრით, აბუბაქარ იანგულბაევი მართავდა.
„როგორც არ უნდა იყოს, ვაცხადებ, რომ ამ ოჯახს ადგილი ელოდება ან ციხეში ან კი მიწაში. და ეს უკვე ჩემზე აღარაა დამოკიდებული. ვიცი საზოგადოებაში არსებული განწყობა. სანამ თუნდაც ერთი ჩეჩენია ცოცხალი, მანამდე ამ ოჯახის წევრები ცხოვრებით თავისუფლად ვეღარ დატკბებიან, იმდენად შელახეს ჩვენი ხალხის თითოეული წარმომადგენლის პატივი. ეს ყოველთვის გახსოვდეთ იანგულბაევებო“, – დაწერა კადიროვმა თავის ტელეგრამ-არხზე.
მოგვიანებით ჩეჩნეთის მეთაურმა დაწერა, რომ ზარემა მუსაევა გროზნოში გადაყვანის შემდეგ „თავს დაესხა პოლიციის თანამშრომელს და ლამის თვალი გამოთხარა“, „რითაც უკვე ნამდვილად დაიმსახურა პატიმრობის რეალური ვადა“.
ჩეჩნეთის მეთაურის თქმით, „ჩეჩნეთის რესპუბლიკიდან ჩასული პოლიციელების ოპერატიული ღონისძიებები შეთანხმებული იყო ადგილობრივ კოლეგებთან და მათი ყველა ქმედება კანონმდებლობის შესაბამისად განხორციელდა“.
„თითოეულმა იანგულბაევმა ხელი დაიბინძურა ტელეგრამ-არხის საზიზღარი პუბლიკაციებით. მთელ ოჯახს არ აქვს პატივი და ღირსება. საკუთარი თავის პატივისმცემელი არც ერთი ადამიანი არ დაჯდება არხზე და მორჩილად არ მოუსმენს, როგორ ამცირებს შერჩევითი ლანძღვითა და შეურაცხყოფით მთელ მის ერს და მით უფრო, არ დაეხმარება ამ გარეწრებს ფულის გამომუშავებაში“, – დაამთავრა კადიროვმა.
ამავდროულად, რუსეთის ხელისუფლებას ურჩევნია უბრალოდ „არ დაიჯეროს“ მომხდარი. რუსეთის პრეზიდენტის პრესმდივანმა დმიტრი პერსკოვმა „უცნაური“ უწოდა ინფორმაციას ფედერალური მოსამართლის მეუღლის გატაცების შესახებ.
„ზოგადად, ფანტასტიკური ისტორიაა, რა თქმა უნდა, გვირჩევნია უბრალოდ არ დავიჯეროთ ასეთი ცნობები, რომელიც ყოველგვარი მტკიცებულებების გარეშე ვრცელდება. ძალიან სიცრუით სავსე დროში ვცხოვრობთ“, – განაცხადა პესკოვმა.
