შსს: ალეკო ელისაშვილმა სასამართლოს კანცელარიის შენობის დაწვა სცადა
ალეკო ელისაშვილმა სასამართლოს დაწვა სცადა
შინაგან საქმეთა სამინისტროს მტკიცებით, პარტია “ლელო – ძლიერი საქართველოს” ერთ-ერთმა ლიდერმა, ალეკო ელისაშვილმა თბილისის საქალაქო სასამართლოს კანცელარიის შენობის დაწვა სცადა. უწყების კადრებში ჩანს, რომ ის ნაცემია.
უწყების განმარტებით, 29 ნოემბერს, გამთენიისას, შენიღბულმა ელისაშვილმა ჩაქუჩის გამოყენებით ჩაამსხვრია თბილისის საქალაქო სასამართლოს კანცელარიის შენობის გარე ფასადის მინა, შეაღწია სასამართლოს კანცელარიის შიდა სივრცეში, სადაც პერიმეტრზე ბენზინი დაასხა, მათ შორის, საკანცელარიო ნივთებზე, ტექნიკაზე, დოკუმენტაციაზე და შენობის დაწვა სცადა.
“მას შემთხვევის ადგილზევე წაასწრეს სასამართლოს მანდატურის სამსახურის წარმომადგენლებმა, რომლებსაც ელისაშვილმა თანნაქონი ცეცხლსასროლი იარაღის გამოყენებით წინააღმდეგობა გაუწია და ფიზიკური შეურაცხყოფა მიაყენა. გაწეული წინააღმდეგობის მიუხედავად, ალექსანდრე ელისაშვილი მანდატურებმა ადგილზევე დააკავეს.
დაპირისპირებისას მიღებული დაზიანებებით, მანდატურის სამსახურის ერთ-ერთი წარმომადგენელი სამედიცინო კლინიკაშია გადაყვანილი. დაკავებისას, გაწეული წინააღმდეგობის გამო, დაზიანებები მიიღო ალექსანდრე ელისაშვილმაც. პოლიციამ დანაშაულის ჩადენის იარაღები ნივთმტკიცებად ამოიღო .” – ნათქვამია შსს-ს განცხადებაში.
ადვოკატის განმარტება
ალეკო ელისაშვილის ადვოკატის, გიორგი რეხვიაშვილის თქმით, ალეკო ელისაშვილი ამბობს, რომ ქმედება ჩაიდინა პროტესტის გამოსახატად უსამართლო სასამართლოს მიმართ და ერთადერთი იმას ნანობს, რომ რამდენიმე წამი დააკლდა საქმის ბოლომდე მისაყვანად. მისივე განმარტებით, ელისაშვილმა შაბათი დღე აირჩია, რომ არავინ დაზიანებულიყო.
“მომეცა საშუალება დაკავებიდან 10 საათის შემდეგ დიღმის იზოლატორში შევხვედროდი ალეკო ელისაშვილს. მას აღენიშნება სახეზე მძიმე დაზიანებები, არის სასტიკად ნაცემი. ახლა გადმოგცემთ ალეკო ელისაშვილის პოზიციას და განცხადებას გავაკეთებ მისი სახელით, მან ეს ქმედება ჩაიდინა პროტესტის გამოსახატად, ეს ერთ-ერთი საშუალება იყო. მან პროტესტი გამოხატა უსამართლო სასამართლოს მიმართ. “ცეცხლი ოლიგარქიას“ და “ცეცხლი უსამართლო სასამართლოს“ – ეს სიტყვები გადმომცა, ერთადერთი იმას ნანობს, რომ რამდენიმე წამი დააკლდა საქმის ბოლომდე მისაყვანად.
“ეს არის რეალურად მისგან გააზრებული პროტესტის ფორმა. მნიშვნელოვანია აღვნიშნოთ, რომ აირჩია შაბათი დღე, დილის საათები, რომ არავინ დაზიანებულიყო და ყოფილიყო, მხოლოდ და მხოლოდ, ეს ქმედება, პროტესტის საშუალება, საზოგადოებისთვის ენახებინა, რომ ეს სასამართლო რამდენ ადამიანს უკანონოდ და უსამართლოდ ასამართლებს, როგორ იყენებს ეს ხელისუფლება ამ სასამართლოს თავისი რეჟიმის და დიქტატურის გასამყარებლად. ეს არის ალეკო ელისაშვილის განცხადება.“ – განაცხადა გიორგი რეხვიაშვილმა.
