ახმეტაში “ოცნების” ყოფილი დეპუტატი და ოლიმპიური ჩემპიონი ზურაბ ზვიადაური დაჭრეს

ახმეტაში, ურთიერთშელაპარაკების დროს მმართველი პარტიის –  “ქართული ოცნების” ყოფილი დეპუტატი  და ოლიმპიური ჩემპიონი, ზურაბ ზვიადაური დაჭრეს. შემთხვევა გვიან ღამით,  ქალაქის ცენტრში მოხდა. ოლიმპიურ ჩემპიონს და მასთან მყოფ კიდევ ერთ ადამიანს ჭრილობა დანით აქვს მიყენებული.

ორივე დაშავებული ახმეტის რაიონულ საავადმყოფოში გადაიყვანეს. მათი ჯანმრთელობის მდგომარეობა სტაბილურია – ჭრილობები სიცოცხლისთვის საშიში არ არის.

მომხდარზე გამოძიება სისხლის სამართლის კოდექსის 117-ე მუხლით დაიწყო.

ზურაბ ზვიადაური ძიუდოში ოლიმპიური ჩემპიონი 2004 წელს, ათენის ოლიმპიადაზე გახდა. 

2012-2016 წლებში ის ახმეტის მაჟორიტარი დეპუტატი იყო პარლამენტში კოალიცია „ქართული ოცნებიდან“.