ახალი „კანონი ბინების შესახებ“ აფხაზეთში - რას ნიშნავს და რა საფრთხეებს შეიცავს
ახალი „კანონი ბინების შესახებ“ აფხაზეთში
აფხაზეთი აპირებს უცხოელებს ნება დართოს, ააშენონ და შეიძინონ უძრავი ქონება. აქამდე აფხაზეთში უცხო ქვეყნის მოქალაქეებს საცხოვრებელი უძრავი ქონების შეძენის უფლება არ ჰქონდათ, მაგრამ ახალი კანონის მიღების შემთხვევაში, ამ აკრძალვის გვერდის ავლის შესაძლებლობა იქმნება. სოხუმში ბევრი არ არის ენთუზიაზმით განწყობილი ასეთი პერსპექტივით და მას პოტენციურად საშიშად მიიჩნევს.
ჩვენ განვმარტავთ რატომ:
რატომ არის აკრძალული უძრავი ქონების უცხოელებზე გაყიდვა?
უცხოელებზე საცხოვრებელი უძრავი ქონების მიყიდვის აკრძალვა საზოგადოებაში რეგულარულად განილვადი ერთ-ერთი ყველაზე მტკივნეული თემაა. აკრძალვა, პირველ რიგში, აფხაზეთში არსებული დემოგრაფიული ბალანსის დარღვევის შიშით აიხსნება. მიჩნეულია, რომ „ტაბუს“ გაუქმებამ შეიძლება გამოიწვიოს ის ფაქტი, რომ ეთნიკური აფხაზები აღმოჩნდებიან უმცირესობაში თავიანთ ისტორიულ სამშობლოში (როგორც ეს საბჭოთა პერიოდში უკვე მოხდა).
- ტესტი ერთგულებასა და ალკოჰოლზე – როგორ გრძელდება ტურისტული სეზონი აფხაზეთში
- რა ტერიტორიების და ობიექტების მიღება სურს რუსეთს აფხაზეთისგან. კომენტარი
- უფასო საცხოვრებელი აფხაზეთში: რატომ არ არის ყველასთვის საკმარისი
თუმცა, მიუხედავად აკრძალვისა, აფხაზეთში უცხოელებზე (ძირითადად რუსებზე) საცხოვრებლის მიყიდვა მაინც ხდება – არალეგალურად, სხვადასხვა ჩრდილოვანი სქემებით. პრემიერ-მინისტრის, ალექსანდრ ანქვაბის ცოტა ხნის წინ გამოქვეყნებული მონაცემების მიხედვით, უკვე 5 ათასზე მეტი ასეთი გარიგება განხორციელდა.
დროდადრო კრემლი გამჭვირვალედ მიანიშნებს აფხაზეთის ხელისუფლებას, რომ აკრძალვა უნდა მოიხსნას, მაგრამ სოხუმში გრძნობდნენ საზოგადოების განწყობებს და ბოლო დრომდე ვერ ბედავდნენ ამის აშკარად გაკეთებას. მაგრამ ახლა, როგორც ჩანს, აფხაზეთის ხელისუფლებამ გაარკვია როგორ შეინარჩუნოს აკრძალვა და თან დაამშვიდოს მოსკოვი.
რას ნიშნავს “ბინის კანონი”?
აფხაზეთის პრეზიდენტის, ასლან ბჟანიას ადმინისტრაციამ შეიმუშავა კანონპროექტი „აპარტ-სასტუმროების და ბინების სამართლებრივი სტატუსის მოწესრიგების შესახებ“.
კანონპროექტის მიხედვით, „ბინები“ (ფაქტობრივად, ჩვეულებრივი საცხოვრებელი ბინები) ჩაითვლება არა საცხოვრებელ უძრავ ქონებად, არამედ კომერციულ და, შესაბამისად, გასაყიდად ფართებად.
მთავრობის განმარტებით, ეს საშუალებას მისცემს აფხაზეთს მოიზიდოს ინვესტიციები ისე, რომ ეროვნულ უსაფრთხოებას არაფერი დაემუქროს. ასევე, შექმნას ახალი სამუშაო ადგილები და მნიშვნელოვნად გაზარდოს ბიუჯეტის შემოსავლები.
მთავრობის ვებგვერდზე გამოქვეყნებული კანონპროექტი შეიცავს შემდეგ დებულებებს:
– ბინებისთვის გამოყოფილი მიწის ნაკვეთები რჩება სახელმწიფოს საკუთრებაში;
– ბინის ფლობის უფლება არ გულისხმობს მოქალაქეობის ან ბინადრობის ნებართვის მიღების უფლებას. ბინის მფლობელს არ ექნება შესაძლებლობა და უფლება მონაწილეობა მიიღოს აფხაზეთის პოლიტიკურ ცხოვრებაში.
ახალი აპარტამენტების მშენებლობით აფხაზეთის მთავრობა აპირებს შეცვალოს ქვეყნის იმიჯი: „აფხაზეთი – ღარიბი ტურისტის საზაფხულო დასვენების ადგილიდან“ „აფხაზეთი – მთელი წლის დასვენების ადგილით“ მდიდარი ტურისტისთვის.
გარდა არსებული გადასახადებისა, იგეგმება ახალი საგადასახადო დანამატის შემოღება, რომელიც მთლიანად შექმნილია სოციალური საცხოვრებლის რიგში მყოფი აფხაზი მოქალაქეების საბინაო პრობლემების გადასაჭრელად. ასლან ბჟანია გვპირდება, რომ „ამ პრობლემას 10-15 წელიწადში სრულად მოაგვარებს და ახალგაზრდა ოჯახებისთვის საცხოვრებლით უზრუნველყოფას დაიწყებს“, ეს ყველაფერი კი სწორედ ამ ახალი გადასახადით მოხდება.
საწინააღმდეგო არგუმენტები
აფხაზეთში “ბინების შესახებ” კანონის მიღების მოწინააღმდეგეებს შემდეგი არგუმენტები მოჰყავთ:
- ეს მაინც დაარღვევს დემოგრაფიულ ბალანსს. მიუხედავად იმისა, რომ კანონი ბინის მესაკუთრეებს არ აძლევს შესაძლებლობას უშუალოდ მიიღონ მოქალაქეობა. აფხაზური პასპორტის მისაღებ პროცედურებში ბევრი ხარვეზი არსებობს.
- კორუფციის ამჟამინდელი დონის გათვალისწინებით, საუკეთესო მიწები, მათ შორის ბუნებრივი რესურსები, გამოყენებული იქნება ახალი ბინების ასაშენებლად. შედეგად, აფხაზეთის კურორტები გადაიქცევა „ბეტონის ჯუნგლებად“, როგორც ეს მეზობელ სოჭში მოხდა;
- საცხოვრებლის ფასები მკვეთრად გაიზრდება და ის აღარ იქნება ხელმისაწვდომი რესპუბლიკის მოქალაქეების უმეტესობისთვის;
- ბინების რეალიზაცია უარყოფითად აისახება როგორც დიდი სასტუმროების, ისე პატარა სასტუმრო სახლების მუშაობაზე. ანუ ტურიზმის ინდუსტრიაზე ორიენტირებული მცირე და საშუალო ბიზნესი შეიძლება დაზარალდეს. გაუჭირდება ადგილობრივ სამშენებლო ბიზნესსაც, რადგან ნაკლებად სავარაუდოა, რომ კონკურენცია გაუწიოს უცხოურს (რომელსაც აფხაზეთის ხელისუფლება სხვადასხვა სახის საგადასახადო შეღავათებით წაახალისებს).
კანონი საჭიროა, მაგრამ გააზრებული
ცნობილი ბლოგერი დიმიტრი მუშბაც საკმაოდ პესიმისტურ პროგნოზებს აკეთებს აფხაზეთში „ბინების შესახებ კანონის“ მიღების შესაძლო სოციალურ-ეკონომიკურ შედეგებზე.
მისი აზრით, თუ ამით ვინმე სარგებელს მიიღებს, მხოლოდ დასანქცირებული რუსი ბიზნესმენები და მათი აფხაზი შუამავლები იქნებიან:
„მსხვილ რუსულ ბიზნესს ახლა, ზოგადად, არსად არ აქვს თავისი კაპიტალის უსაფრთხოდ ინვესტირების შესაძლებლობა. რუსეთი უზარმაზარია, მაგრამ ყველაზე მიმზიდველი ტერიტორიები დიდი ხანია განაწილებული და განვითარებულია.
აფხაზეთში დღეს დიდი ფულის გამომუშავება შეგიძლიათ, თუნდაც რუსული სტანდარტებით, ხოლო აფხაზეთში ბიზნესის კეთება ბევრად უფრო ადვილია, ვიდრე რუსეთში.
თუმცა, აფხაზეთში ბიზნესის უსაფრთხოდ წარმართვისთვის საჭიროა სანდო ადამიანები. სწორედ აქ ჩნდებიან „აფხაზი“ ბიზნესმენები, რომლებიც რეალურად რუსები არიან.
შედეგად, იქმნება ვითარება, როდესაც ჩვენი თანამოქალაქეების შუამავლობით რუსული ფინანსური ჯგუფების დიდი თანხები შემოვა ჩვენს რესპუბლიკაში.
კარგია თუ ცუდი? ეკონომიკაში ინვესტიცია ყოველთვის კარგია: გადასახადები, სამუშაო ადგილები და ა.შ. მაგრამ ადგილობრივი ბიზნესი – ეს არის ნამდვილი აფხაზური ბიზნესი, რომელიც მდებარეობს აფხაზეთში და იყო აფხაზეთის საგადასახადო რეზიდენტი – ეს კანონი ნამდვილად არათანაბარ პირობებში ჩააყენებს მას, რადგან ყველა საუკეთესო მიწას რუსული კაპიტალი ძალიან სწრაფად აითვისებს. ადგილობრივი მეწარმეები კონკურენციას ვერ გაუწევენ საინვესტიციო ფონდებს, მსხვილ ბანკებსა და ფინანსურ ჯგუფებს. აქედან გამომდინარეობს აფხაზეთის სავაჭრო-სამრეწველო პალატის პოზიცია, რომელიც ამ კანონპროექტის წინააღმდეგ გამოვიდა. მიმაჩნია, რომ ამ საკითხის გადაწყვეტისას გათვალისწინებული უნდა იყოს აფხაზური ბიზნესის აზრი.
ამასთან, შეუძლებელია წარსულის ნანგრევებზე სამუდამოდ ჯდომა, აუცილებელია არსებული პოტენციალის გამოყენება. თუმცა ქმედითი კანონის მოსამზადებლად საჭიროა სხვადასხვა სფეროს პროფესიონალების კოორდინირებული მუშაობა, რომლებიც საკითხს დიდი პასუხისმგებლობით ეკიდებიან“.
