"ახალი გეორგიევსკის ტრაქტატი" - საქართველოს პრორუსული პარტია რუსეთს სტრატეგიულ თანამშრომლობას სთხოვს
ახალი გეორგიევსკის ტრაქტატი
საქართველოში არსებული და ხელისუფლებასთან დაახლოებული პრორუსული პარტია “სოლიდარობა მშვიდობისთვის” რუსეთს “სტრატეგიული თანამშრომლობის აღდგენას” სთხოვს. სერგეი გავრილოვთან დაკავშირებული ბიზნესმენის, მამუკა ფიფიას პარტია “ახალ გეორგიევსკზე” განცხადებას თბილისში მიმდინარე კონფერენციაზე ამზადებს. თავად მამუკა ფიფია ამჟამად მოსკოვში იმყოფება.
“მიმართვა ახლა ზუსტდება, ძირითადად ეს იქნება სტრატეგიული თანამშრომლობის აღდგენა, ურთიერთობების რეგულირება. ჩვენ ვხედავთ, მსოფლიო იცვლება ყოველწამიერად, რუსეთის როლი იზრდება მსოფლიოში გეოპოლიტიკურად, ასევე რეგიონში, ამიტომ ჩვენი მიმართვის მთავარი არსი იქნება, მოვახდინოთ ახალი ურთიერთობების დამყარება, ახალი ხელშეკრულება, ახალი რეალობიდან გამომდინარე.” – ამბობს პარტიის თავმჯდომარე მიხეილ ჟღენტი “TV პირველთან.”
პარტიის პოლიტიკური მდივნის, თემურ ფიფიას თქმით, მათი პარტიაა ერთადერთი ძალა, რომელსაც აქვს საშუალება, რომ რუსულ მხარესთან ისაუბროს “ძალიან მნიშვნელოვანი” საკითხების გარშემო, რომელიც “აწუხებს” საქართველოს. მისივე მტკიცებით, მათ აქვთ საშუალება მათ შორის ოფიციალურ რუსეთთან საუბრის.
“ქართული ოცნება არის ბევრად უფრო დემოკრატიული პარტია და სახელისუფლებო ძალა, შედარება არაა, ვიდრე წინა ხელისუფლება. აქედან გამომდინარე, ქართული ოცნების პირობებში, მათ შორის ჩვენც გვაქვს საშუალება, ჩვენი პოზიცია დავაფიქსიროთ და ვიმოქმედოთ კანონის და კონსტიტუციის ფარგლებში”. – აცხადებს ფიფია.
აღსანიშნავია, რომ შეხვედრას ესწრებოდა სამთავრობო პროპაგანდისტული POSTV-ის ანალიტიკოსი ნუკრი შოშიაშვილი, “პატრიოტთა ალიანსის” წევრი სოსო ჭიქაშვილი, ასევე პროპუტინისტი ჟურნალისტი ვალერი კვარაცხელია.
სწორედ პარტიამ “სოლიდარობა მშვიდობისთვის” მიმართა ვლადიმირ პუტინს საქართველოსთვის რუსეთთან არსებული სავიზო რეჟიმის სრულად გაუქმებისთვის, ხოლო მას შემდეგ, რაც პუტინმა საქართველოსთან ფრენები აღადგინა და ვიზების შეზღუდვა მოხსნა, ფიფია და მიხეილ ჟღენტი იყვნენ ერთ-ერთი პირველები, რომლებიც რუსეთიდან პირველ რეისს ჩამოჰყვნენ.
მამუკა ფიფია რუს დეპუტატ სერგეი გავრილოვთან დაახლოებული რუსეთში მოღვაწე ქართველი ბიზნესმენია. ერთი წლის წინ იგი პარლამენტში “ქართული ოცნების” დეპუტატმა, ვასილ ჩიგოგიძემ შეუშვა, რის შემდეგაც ფიფიამ საკუთარ Instagram-გვერდზე დეპუტატის კაბინეტში გადაღებული ფოტო გამოაქვეყნა.
“ქართული ოცნების” აღმასრულებელი მდივნის, მამუკა მდინარაძის თქმით, ფიფია მთელი დღის განმავლობაში სთხოვდა ჩიგოგიძეს შეხვედრას და რადგან ამ დროს პარლამენტში სხდომები ტარდებოდა, რომლებსაც ოცნების დეპუტატი აუცილებლად უნდა დასწრებოდა, მან დაუშვა საშვი ფიფიასთვის. მდინარაძე ამბობს, რომ მამუკა ფიფია ჩიგოგიძეს მის ოთახში ელოდებოდა და სწორედ ამ დროს გადაიღო აღნიშნული ფოტოებიც.
ამავდროულად, ფიფია დაახლოებულია პარტია “ევროპელი სოციალისტების” ლიდერთან, ფრიდონ ინჯიასთანაც, რომელსაც ეკუთვნის ანტი-ლგბტ კანონის ინიციატივა და რომელიც მმართველი პარტიის სატელიტ პარტიას წარმოადგენს პარლამენტში. ფიფიამ სოციალურ ქსელში, ინჯიასთან ერთად მოსკოვში გადაღებული ფოტოც გამოაქვეყნა წარწერით – “ჩემი მხარდაჭერა გეი პროპაგანდის წინააღმდეგ კანონს”.
გეორგიევსკის ტრაქტატი (Георгиевский трактат) — 1783 წლის 24 ივლისს (4 აგვისტო) ციხესიმაგრე გეორგიევსკში (ჩრდ. კავკასია) დადებული „სამეგობრო შეთანხმება“ რუსეთსა და გაერთიანებულ ქართლ-კახეთის სამეფოს შორის, რომლის მიხედვით ეს უკანასკნელი რუსეთის მფარველობის ქვეშ გადადიოდა.
გეორგიევსკის ტრაქტატის ძალით ქართლ-კახეთის სამეფო ნებაყოფლობით შევიდა რუსეთის მფარველობაში. ეს იყო პირველი ორმხრივი საერთაშორისო ხელშეკრულება რუსეთ-საქართველოს მრავალსაუკუნოვანი ურთიერთობის ისტორიაში.
ამ აქტით ქართლ-კახეთის მეფე ერეკლე II აცხადებდა, რომ ამიერიდან სამუდამოდ უარს ამბობდა, ეცნო სპარსეთის ან რომელიმე სხვა სახელმწიფოს მეთაურის უზენაესი ხელისუფლება, გარდა რუსეთისა, ხოლო რუსეთი ვალდებულებას იღებდა, დაეცვა ქართლ-კახეთი გარეშე მტრებისაგან, თუმცა რუსეთს ტრაქტატის პირობები არ შეუსრულებია.
