საქართველოს პრემიერმინისტრის, ირაკლი ღარიბაშვილის თქმით, მთავრობას სურს, რომ ქვეყანა “რეგიონში საავიაციო ჰაბი” გახდეს და სწორედ ამ მიზნით ახალი აეროპორტის მშენებლობისთვის ვაზიანის სამხედრო აეროდრომის ტერიტორია შეირჩა. მისივე განმარტებით, ამჟამად პროექტის შესწავლა მიმდინარეობს. ამის შესახებ პრემიერმა მთავრობის სხდომაზე ისაუბრა.
“ჩვენ არაერთხელ გვითქვამს, რომ ქვეყანას აქვს ამის პოტენციალი. სწორედ ამ მიზნით ჩვენ დავიწყეთ მუშაობა, რამდენიმე თვეა აქტიურად მუშაობს ეკონომიკის სამინისტრო. მინდა, მოკლედ შევაფასო, დღეს არსებული აეროპორტი, ალბათ დამეთანხმებით, რომ არ არის დამაკმაყოფილებელი და ვერ უძლებს, ვერ პასუხობს იმ გამოწვევებს, ჩვენს ამბიციურ მიზნებს.
[…] მივედით იმ დასკვნამდე, რომ აუცილებელია, თუ გვინდა 20, 30, 50 და თუნდაც 100-წლიანი პერსპექტივით ქვეყანაზე ვიზრუნოთ და ჩვენ მომავალ თაობებს დავუტოვოთ სათანადო ინფრასტრუქტურა და გამართული აეროპორტი, აუცილებელია ახალი ლოკაციის შერჩევა.
ასეთი ადგილი, თბილისში, შეიძლება ითქვას იდეალური ამ მიზნით არის ვაზიანის ყოფილი აეროდრომი. ამიტომ, ჩემი დავალებით, ბოლო რამდენიმე თვეა ეკონომიკის სამინისტრო აქტიურად მუშაობს ამ მიმართულებით, ჩვენი სურვილია ამ პროექტის შესასწავლად ჩამოვიყვანოთ საუკეთესო მშენებლები, არქიტექტორები, ჯერ კარგად შევისწავლოთ ეს ადგილი და ამის შემდეგ მივიღოთ საბოლოო გადაწყვეტილება”, – განაცხადა ღარიბაშვილმა.
15 მაისს ეკონომიკის მინისტრმა ლევან დავითაშვილმა თქვა, რომ თბილისის აეროპორტისთვის ახალ ლოკაციას სწავლობენ. როგორც დავითაშვილი ამბობს, თბილისის არსებული აეროპორტი გრძელვადიან ამოცანებს ვერ უპასუხებს. ეკონომიკის მინისტრი ასევე აღნიშნავს, რომ “ეს არ არის მარტივი” და ერთდღიანი პროცესი:
“ამიტომ, დავიწყეთ ახალი ლოკაციის შესწავლა, არ მინდა, ახლა დეტალებში შევიდე, რადგან ამით შეიძლება, საქმე დავაზიანოთ. მიმდინარეობს მუშაობა აეროპორტების გაერთიანების მხრიდან ახალი ლოკაციის დეტალურ შესწავლაზე, მათ შორის ნავიგაციის კუთხით ჩვენ უკვე შესწავლები ჩატარებული გვაქვს, იმისთვის, რომ დავიწყოთ საბოლოოდ აეროპორტის განვითარება. ეს არ არის მარტივი და ერთდღიანი პროცესი, TAV-თან ხელშეკრულება გვაქვს თბილისში 2027 წლის დასაწყისამდე, ბათუმში – 2027 წლამდე.”
როგორც მინისტრი განმარტავს, გრძელვადიან პერსპექტივაში ხდება აეროპორტების განვითარების დაგეგმვა და ამ შემთხვევაში მთავრობის გეგმა არის 2050 წლამდე ხედვა თბილისის აეროპორტის გაერთიანების.
“არსებულ ტერიტორიაზე სივრცე შეზღუდულია, მას აქვს გაფართოების შესაძლებლობა, რა თქმა უნდა, მაგრამ დეტალური შესწავლის შემდეგ ჩვენ ვხედავთ, რომ იმ გრძელვადიან ამოცანებს ვერ ვუპასუხებთ.” – განაცხადა ლევან დავითაშვილმა.
