"აირჩიე ევროპა" - საქართველოში დაფუძნდა მოძრაობა, რომელიც არჩევნებამდე 100-დღიან კამპანიას ჩაატარებს
აირჩიე ევროპა – საქართველოში დაფუძნდა მოძრაობა
ნინო სუხიშვილი, ლანა ღოღობერიძე, ნიკოლოზ რაჭველი, ლევან წულაძე, გიორგი რუხაძე და საზოგადოებისთვის ცნობილი სხვადასხვა პროფესიის ადამიანები გაერთიანდნენ მოძრაობაში “აირჩიე ევროპა”, რომელიც დღეს თბილისში დაფუძნდა და 100-დღიან საარჩევნო კამპანიას ჩაატარებს.
კამპანია 18 ივლისს დაიწყება და 26 ოქტომბრამდე გაგრძელდება.
პრეზენტაციაზე სიტყვით გამოვიდა საქართველოს პრეზიდენტიც, სალომე ზურაბიშვილი, რომელმაც ქვეყნის ევროპული მომავლის და 26 ოქტომბრის არჩევნების მნიშვნელობაზე ისაუბრა.
ორგანიზატორების თქმით, კამპანია ჩატარდება მთელ საქართველოსა და ქართულ ემიგრაციაში – მიზანი ევროპული მომავლის გასამარჯვებლად პროდასავლური ამომრჩევლის მობილიზებაა.
“ჩვენი ერთობა ღიაა ყველასთვის, ვინც საქართველოს ევროპულ პერსპექტივას უჭერს მხარს, მოდით, მოიტანეთ თქვენი იდეები, გავაერთიანოთ ძალისხმევა და ერთობით გავიმარჯვოთ საქართველოს ევროპული მომავლისთვის“- თქვა მოძრაობის ერთ-ერთმა ორგანიზატორმა ხათუნა ლაგაზიძემ.
რა თქვეს გამომსვლელებმა:
სალომე ზურაბიშვილი: “100 დღე ცოტაც არის და ბევრიც, იმისთვის, რომ საზოგადოებამ თქვას თავისი სათქმელი”
“დღეს რაც ხდება NATO-ში, NATO-ს სამიტზე, ის განცხადებები, რაც გაკეთდა, ის შეწყვეტილი დახმარება ჩვენი თავდაცვის ძალებისთვის, ეს არის ძალიან სერიოზული საფრთხე ამ ქვეყნისთვის. დარჩა ცოტა დრო, 100 დღე, 100 დღე ცოტაც არის და ბევრიც, იმისთვის, რომ საზოგადოებამ თქვას თავისი სათქმელი. დღეს ჩვენ არ გვექნება ჩვეულებრივი არჩევნები – ეს არ არის რაღაც საარჩევნო კამპანია, თუ არა მე როგორც პრეზიდენტი, აქ არ ვიქნებოდი.
ეს არის ჩვენი ქვეყნის, ჩვენი მომავლის არჩევანი, ეს არის ნამდვილად რეფერენდუმი და ამ რეფერენდუმში საქართველოს საზოგადოებაა ერთ მხარეს, მეორე მხარეს არის ხელისუფლება, რომელმაც გაუკეთა ჩვენს მომავალს უზურპაცია. არ შეიძლება ამაზე დავთანხმდეთ, აქ საჭიროა, რომ გავერთიანდეთ, შევასრულოთ ქარტია, რომელსაც ყველა პარტიამ ხელი მოაწერა ან თუ არ მოაწერეს, ჯერ ამბობენ, რომ ეთანხმებიან.
ძალიან ცოტა დრო იქნება არჩევნების მერე იმისთვის, რომ შევასრულოთ ის, რაც იქ წერია. ძალიან ცოტა დრო გვაქვს, რომ გამოვიდეთ ამ გაყინული მდგომარეობიდან, დავუბრუნდეთ პარტნიორებს და დავაჯეროთ, რომ ჩვენ დავუბრუნდით ჩვენს გზას და უნდა ხელახლა გაგვიხსნა ყველა კარი, რაც დღეს არის ნახევრად მიხურული, ეს არის ჩვენთვის გარდაუვალი ამოცანა, სხვა გზა არ გვაქვს, სხვა ალტერნატივა არ გვაქვს, ვართ ძალიან ბევრნი, ერთიანი და საქართველო გაიმარჯვებს.”
ანსამბლ “სუხიშვილების” ხელმძღვანელი ნინო სუხიშვილი: “იმედი მაქვს, ხალხი გამოფხიზლდება – ევროპა არის დღეს ჩვენი ხსნა”
“ის გზა, რომელიც მიგვიყვანს ნათელი მომავლისკენ, გზა, რომელიც ჩვენი ქვეყნისთვის აუცილებელია, არ შეიძლება ამ გზიდან გადახვევა. ჩვენ ყოველთვის ვიყავით ევროპის ნაწილი, საუკუნეების განმავლობაში ყოველთვის ვიყავით ორიენტირებული ცივილიზებული სამყაროსკენ.
ევროპა არის დღეს ჩვენი ხსნა, აუცილებლად ეს გზა ასარჩევი გვაქვს. მე ძალიან დიდი იმედი მაქვს, რომ მსოფლიო მოგვისმენს და ჩვენი ხალხი, ვისაც ეჭვი ეპარება, გამოფხიზლდება.
ბევრისგან გამიგია, რომ მე არც რუსეთი მინდა, არც ევროპა, მე საქართველო მინდა – ყველას საქართველო გვინდა, მაგრამ ამ საწყალ საქართველოს აქვს ხოლმე არჩევანი, რომ ან ერთი აირჩიოს, ან მეორე, დღეს არჩევანის წინ ვდგავართ და ჩვენ უნდა ავირჩიოთ ევროპა, იმიტომ, რომ ეს არის ჩვენი მომავალი.”
ნიკოლოზ რაჭველი, სიმფონიური ორკესტრის ხელმძღვანელი: “ყველას გაცნობიერებული გვაქვს ჩვენი მომავალი – ეს დაამტკიცა უპრეცედენტო მოძრაობამ”
“ქვეყანა, რომელმაც X საუკუნეში “შენ ხარ ვენახი” შექმნა, ის ნამდვილად არის ევროპული ცივილიზაციის არა ნაწილი, არამედ ერთ-ერთი დამფუძნებელი.
შესაბამისად, ჩვენ, ყველას, გაცნობიერებული გვაქვს ჩვენი მომავალი, ეს დაამტკიცა მართლაც უპრეცედენტო მოძრაობამ ახალგაზრდების ლიდერობით, რომელიც სწორედ კანონის წინააღმდეგ აქციების დროს ჩანდა ჩვენს ქვეყანაში, დაამტკიცა მსოფლიოს ევროპული ცივილიზაციების და ქვენების ლიდერების ასეთმა მხარდაჭერამ სწორედ ქართული საზოგადოების მიმართ
და ამ მხარდაჭერას ჩვენ ვკითხულობდით, ვგრძნობდით მათ გამოხმაურებებს. ახლა მოძრაობა, რომლის პრეზენტაციაზეც ვიმყოფებით, არის კიდევ ერთი და უმნიშვნელოვანესი საშუალება ჩემნაირი, ჩვენნაირი, ყველასნაირი ადამიანისთვის ვიმოქმედოთ, რათა საქართველოს მომავალი ისეთი იყოს, როგორიც ყველა ჩვენგანს გვინდა.
ლანა ღოღობერიძე, რეჟისორი: ისევე როგორც 9 აპრილს, დღესაც გვინდა “ცრემლის შეშრობა” ერთმანეთისთვის
“პირველად, ნამდვილი შეგრძნება ერთობისა მქონდა 9 აპრილს, იქამდე, სანამ დაინგრეოდა ეს კედელი, როდესაც ვიდექით იმ მოედანზე, როდესაც ხალხი არ შეკრთა და იდგა მედგრად, როდესაც ჩვენკენ წამოვიდა საბჭოთა ტანკები. ეს არ იყო განწირული სულისკვეთება, ეს იყო, პირიქით, რწმენა, რომ ჩვენ გავიმარჯვებთ. მერე მეგონა, რომ მთელი საქართველო მღეროდა “ვაჩუქოთ ერთმანეთს ტიტები, შევუშროთ ერთმანეთს ცრემლი”, ეს იყო სოლიდარობის გამოვლინება.
“შევუშროთ ერთმანეთს ცრემლი” – დღესაც გვაქვს ბევრი ეს ცრემლი, დღესაც გვინდა ცრემლის შეშრობა ერთმანეთისთვის. […] მერე ეს გრძნობა, რომ ჩვენი მარტოობა დასრულდა, როდესაც ჩვენ ვიდექით ევროპის საბჭოს წინ, საქართველოს პრეზიდენტი, დელეგაციის წევრები და ჩვენი დროშა ადიოდა ნელა, მაღლა, საფრანგეთისა და გერმანიის დროშებს შორის და მაშინ ვიცოდი, რომ მორჩა, გათავდა, არასდროს მარტო აღარ ვიქნებით, უკვე ვართ იმ შესანიშნავი ერთობის წევრი, რომელიც არის ევროპა. […]
დღეს კიდევ ერთხელ ვდგავართ არჩევანის წინაშე – მართალი გითხრათ, ეს ისეთი მოულოდნელობაა და ისეთი წარმოუდგენელი განცდაა, რომ კიდევ ერთხელ ვირჩევთ ევროპას, მაგრამ უსათუოდ ვირჩევთ, უსათუოდ ვიქნებით ყველა ერთად. მე მიხარია, რომ ჩვენ ახლა ასე ერთად ვართ, გაერთიანებულები და ერთად, უსათუოდ ყველა მივაღწევთ გამარჯვებას.”
