ჯანდაცვის სამინისტრო: აფთიაქების ნაწილმა ონკოლოგიურ მედიკამენტებზე ფასი ხელოვნურად გაზარდა
აფთიაქების ნაწილმა მედიკამენტებზე ფასი ხელოვნურად გაზარდა
ჯანდაცვის სამინისტროს ინფორმაციით, მედიკამენტზე რეფერენტული ფასების ამოქმედების შემდეგ, ცალკეულმა ფარმაცევტულმა კომპანიებმა მედიკამენტებზე ფასი ხელოვნურად გაზარდეს. უწყების ცნობით, ამჯერად საქმე ეხება ონკოლოგიური დანიშნულების ძვირადღირებულ მედიკამენტებს, რომლებზეც რეფერენტული ფასი არ არის დაწესებული და რომლებიც სახელმწიფოს მიერ საყოველთაო ჯანდაცვის პროგრამის ფარგლებში ფინანსდება.
15 იანვრიდან საქართველოში მედიკამენტებზე რეფერენტული ფასები განისაზღვრა, რაც სახელმწიფოს მიერ განსაზღვრული მაქსიმალური ფასის დაწესებას გულისხმობს, 15 თებერვლიდან კი, ყველა კომპანია – იმპორტიორი, დისტრიბუტორი თუ საცალო მოვაჭრე – ვალდებულია, მაქსიმალური ზედა ზღვარი ამ ფასების მიხედვით დაადგინოს.
რეფერენტული ფასები პირველ ეტაპზე დაახლოებით 1000-1200 მედიკამენტს შეეხება. ხოლო ამ მექანიზმის შემოტანა, როგორც ჯანდაცვის მინისტრის მოადგილე, თამარ გაბუნია აღნიშნავს, დღეს ბაზარზე არსებული მედიკამენტების ფასებს სავარაუდოდ 40%-ით შეამცირებს.
თავად ჯანდაცვის მინისტრის, ზურაბ აზარაშვილის განმარტებით, პირველ ეტაპზე სახელმწიფოს დადგენილი ფასების დამრღვევს გაფრთხილებენ, ხოლო მეორე ეტაპზე ჯარიმა დაეკისრება.
როგორც სამინისტროში განმარტავენ, ჯანმრთელობის ეროვნული სააგენტოს მონაცემებით, ძვირადღირებული ონკოლოგიური მედიკამენტების რეალიზატორ კომპანიებს, ერთი და იგივე დასახელების მედიკამენტებზე, იდენტური ფასები აქვთ განსაზღვრული.
“წინასწარი შეფასებით, შესაძლოა, ადგილი ჰქონდეს ფარმაცევტულ კომპანიებს შორის არაკეთილსინდისიერ შეთანხმებას და დომინირებული მდგომარეობის არასათანადოდ გამოყენების ფაქტს, რაც მნიშვნელოვნად აზარალებს მოქალაქეებსა და სახელმწიფოს, რომელიც ონკოლოგიური პაციენტების მკურნალობას აფინანსებს.” – აცხადებენ ჯანდაცვის სამინისტროში.
უწყების მიერ Facebook-ზე გამოქვეყნებული ცხრილიდან ჩანს, რომ ზოგიერთ მედიკამენტზე მიმდინარე წლის მარტში, ამავე წლის თებერვალთან შედარებით ფასი 110%-ით, 160%-ით, ზოგ შემთხვევაში კი 290%-ითაც კი არის გაზრდილი.
სამინისტროს ცნობით, საყოველთაო ჯანდაცვის პროგრამის ფარგლებში, ქიმიო-სხივური ჰორმონოთერაპიისთვის ერთ ბენეფიციარზე, ყოველწლიურად, 25 000 ლარი გამოიყოფა, ხელოვნურად გაძვირებული წამლების შედეგად კი, ონკოლოგიურ პაციენტებს, მედიკამენტებზე ხელმისაწვდომობა ეზღუდებათ:
“ჯანდაცვის სამინისტროს მიერ, არაერთხელ გაცხადდა, რომ მიუღებელია წამლების ფასის ხელოვნური ზრდა და თითოეულ დარღვევაზე, უწყებას, ექნება მკაცრი რეაგირება.”
ცალკეული ფარმაცევტული კომპანიების მხრიდან, შესაძლო არაკეთილსინდისიერ ქმედების შესწავლის პროცესში ჩართულია კონკურენციის ეროვნული სააგენტო.
● “დედა თითქოს პატარა გოგო იყო, ასე გრძნობდა თავს”. როგორ ცხოვრობენ საქართველოში ადამიანები დემენციით
● თბილისში 5 აფთიაქის ხელმძღვანელი “სააფთიაქო ნარკომანიის” საქმეზე დააკავეს
● “ერთი გოგო მთელი დღე იდგა და ტიროდა” – კოვიდ-კლინიკაში მომუშავე ექიმების და ექთნების მონოლოგები
წამლის ფასების შესახებ საქართველოში უკვე დიდი ხანია საუბრობენ. წამლები საქართველოში რეგიონის სხვა ქვეყნებთან შედარებით ერთ-ერთი ყველაზე ძვირია. ჯანდაცვის ყოფილი მინისტრი, ეკატერინე ტიკარაძე 2021 წლის ნოემბერში ამბობდა, რომ წამლის ფასი მოსახლეობისთვის დიდი ტვირთია და “ჯანდაცვის სამინისტრო პრობლემის აღმოსაფხვრელად აქტიურ რეჟიმში იწყებს მუშაობას.”
იმავე 2021 წელს კონკურენციის სააგენტომ გამოაქვეყნა ანგარიში, რომლის მიხედვით, მედიკამენტებზე მაღალი დანახარჯები მომხმარებლების ნაკლები ინფორმირებულობითაა განპირობებული, რადგან შედარებით იაფი გენერიკული ჩამნაცვლებელი მედიკამენტების არსებობის შესახებ მომხმარებლებს ინფორმაცია არ აქვთ.
“გენერიკული მედიკამენტები” საერთაშორისო სახელწოდებით გამოშვებული წამლებია, რომელიც მოქმედების მექანიზმით არ განსხვავდება ფარმაცევტული ფირმების მიერ დაპატენტებული სხვადასხვა სახელწოდებით წარმოებული მედიკამენტებისგან. განსხვავება მხოლოდ ფასშია: “გენერიკული მედიკამენტები” უფრო იაფია და ამდენად, უფრო ხელმისაწვდომი ფართო საზოგადოებისთვის.
სააგენტომ 6 ჯგუფის მედიკამენტების ანალიზის შედეგად დაადგინა, რომ ბრენდირებული მედიკამენტების გენერიკებით ჩანაცვლების შემთხვევაში, პაციენტი 2016-2020 წლებში საშუალოდ 16 მილიონ ლარს დაზოგავდა.
