აფხაზეთის ყველაზე მსხვილი ოპოზიციური პარტია პრეზიდენტ ბჟანიას გადადგომას ითხოვს

აფხაზეთში პრეზიდენტის გადადგომას მოითხოვენ

11 მარტს, ყველაზე მსხვილი ოპოზიციური ორგანიზაციის, „არუაას“ ყრილობაზე, რომელიც აფხაზეთის ომის ვეტერანებს აერთიანებს, დელეგატები მივიდნენ დასკვნამდე, რომ აფხაზეთის პრეზიდენტმა ასლან ბჟანიამ ჩააგდო სამუშაო და თანამდებობა უნდა დატოვოს.

‘„არუაას“ აზრით, ასლან ბჟანიას პრეზიდენტობის ერთი წლის განმავლობაში (აპრილში ერთი წელი გადის, რაც ის პრეზიდენტად აირჩიეს), საგრძნობლად გაუარესდა ვითარება ფაქტობრივად ყველა სფეროში. კერძოდ:

• გაიზარდა გადასახადების გადამხდელთა ტვირთი ჩინოვნიკების აპარატის შესანახად;
• არ მიიღეს ფუნდამენტური ანტიკორუფციული კანონები (გაეროს კონვენციის მე-20 მუხლი);
• არ გაიხსნა ხმაურიანი სისხლის სამართლის საქმეები, მათ შორის, თავად ასლან ბჟანიას მოწამვლის, რომელიც 2019 წლის აპრილში მოხდა;
• გაუარესდა მოსახლეობის სოციალურ-ეკონომიკური მდგომარეობა, მათ შორის, პენსიების გაცემის შეფერხების გამო;
• არ დაიწყო შრომის ბაზრის რეფორმა, თანამდებობებზე კვლავინდებურად ინიშნებიან ზარით და არა კონკურსით;
• არ არსებობს სიტყვის თავისუფლება სახელმწიფო ტელევიზიაში, ზოგიერთი ოპოზიციონერის წინააღმდეგ კი, რომლებიც ყოფილ ხელისუფლებას წარმოადგენენ, სისხლისსამართლებრივი დევნის დაწყებას ცდილობენ;
• მთავრობის დაუფიქრებელი გადაწყვეტილება მაინინგის ლეგალიზაციასთან დაკავშირებით, რომელმაც ქვეყანა ენერგოკრიზისამდე მიიყვანა.

ბჟანიას ყველაზე დიდ შეცდომად საქართველოსთან „მრავალდონიანი“ მოლაპარაკებების იდეა მიიჩნევა.

ეს იდეა დაფიქსირებულია საგარეო პოლიტიკის კონცეფციაში, რომელიც პრეზიდენტმა 2020 წლის დეკემბერში წარმოადგინა და ოპოზიციაში დიდი დავა და დაგმობა გამოიწვია.

• როგორი უნდა იყოს აფხაზურ-ქართული დიალოგი და უნდა იყოს თუ არა საერთოდ. რას მსჯელობენ ამ თემაზე აფხაზეთში
• აფხაზეთის ახალი პრეზიდენტის გამოწვევები
• მოსაზრება: აფხაზეთი უშუქოდ და ბიზნესი სახელმწიფოს ხარჯზე
• აფხაზეთის მოქმედი პრემიერი და ყოფილი პრეზიდენტი – უმდიდრესთა სიაში

„მუშაობის ერთი წლისთვის ძალიან ბევრი შეცდომაა, რომელიც ძირს უთხრის სტაბილურობას. ჩვენ არ გამოვდივართ რეფერენდუმისა და რევოლუციის მოწოდებით, არამედ, ვთავაზობთ პრეზიდენტს, სახელმწიფოსა და ხალხის ინტერესებიდან გამომდინარე, საკუთარი ნებით დატოვოს თანამდებობა. ასეთი გადაწყვეტილება, ყოველგვარი მიტინგებისა და რევოლუციების გარეშე მოგვცემს საშუალებას, მშვიდად ჩავატაროთ არჩევნები და სახელმწიფოს მმართველობაში მოვლენ ადამიანები, რომლებსაც კავშირი არ ექნებათ ხელისუფლების ძალადობრივ ცვლილებასთან“, – ნათქვამია ყრილობის რეზოლუციაში.

„არუაა“ ასევე მიმართავს პარლამენტის დეპუტატებს, ექსტერნად მიიღონ კანონი პრეზიდენტის იმპიჩმენტის შესახებ, „რათა ხელისუფლების ცვლილების ანტიკონსტიტუციური მეთოდები გამოირიცხოს“.

ამასობაში, ხელისუფლებამ დილიდან მთელი ძალოვანი სტრუქტურები მთავრობის, პრეზიდენტის ადმინისტრაციისა და მათი მიმდებარე კვარტალების ტერიტორიაზე შეკრიბა.

სავარაუდოდ, მთავრობაში ვარაუდობდნენ, რომ ყრილობა პრეზიდენტის სასახლესთან მიტინგსა და შემდეგ მის ხელში ჩაგდებაში გადაიზრდებოდა, როგორც ეს უკვე არაერთხელ მოხდა აფხაზეთში.

მათ შორის, მოქმედი პრეზიდენტი ასლან ბჟანია ხელისუფლებაში საპრეზიდენტო სასახლის ხელში ჩაგდებისა და მაშინდელი პრეზიდენტის, რაულ ხაჯიმბას თანამდებობიდან იძულებით ვადაზე ადრე გადადგომის შემდეგ მოვიდა.

თუმცა, შიში უსაფუძვლო აღმოჩნდა, ყოველ შემთხვევაში, ჯერჯერობით.

„ასლან გიორგის ძევ – ჩვენ თქვენ არ ვართ, ჩვენ გადამტრიალებლები არ ვართ, ჩვენ სახელმწიფოებრივი ადამიანები ვართ და გადატრიალების არ უნდა გეშინოდეთ“, – განაცხადა ყრილობაზე გამოსვლისას ოპოზიციის ლიდერმა, ადგურ არძინბამ.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო