უვადო აქციები შს მინისტრის გადადგომის მოთხოვნით: აფხაზეთში პროტესტი გრძელდება
პოლიტიკური კრიზისი აფხაზეთში
მილიციის მიერ ნაცემი დეპუტატისა და მისი თანასოფლელების საქმის გარშემო სკანდალი ისევ იკრებს ძალებს და მორიგ პოლიტიკურ კრიზისს უქადის აფხაზეთს.
ოთხშაბათს, 20 ოქტომბერს, სოფელ აძიუჟბის მცხოვრებლების ინიციატივით, უვადო საპროტესტო აქციების მოსამზადებლად ომის ვეტერანთა საკოორდინაციო საბჭო შეიქმნა.
- მოსაზრება: რატომ შეიძლება აფხაზეთში ზოგისთვის რაღაცის გაკეთება, სხვებისთვის კი არა?
- მოსაზრება: ემოციების კრიზისი აფხაზეთში
საბჭოს შექმნის საბაბი გახდა პრეზიდენტ ასლან ბჟანიას მიერ იგნორირებული საზოგადოების მოთხოვნა, თანამდებობიდან ჩამოეშორებინა შინაგან საქმეთა მინისტრი დმიტრი დბარი, რომელიც ამა წლის 30 სექტემბერს, სოხუმის სანაპიროზე ომის ვეტერანების ცემაში მონაწილეობდა.
პარლამენტის დეპუტატი გარი კოკაია თანასოფლელებთან – აფხაზეთის ომის ვეტერანებთან ერთად – სოხუმის სანაპიროზე, რესტორანში, გამარჯვებისა და აფხაზეთის დამოუკიდებლობის დღეს აღნიშნავდა. სუფრის შემდეგ, უკვე ქუჩაში, მან სიხარულის გამოსახატავად, პისტოლეტიდან ჰაერში რამდენჯერმე გაისროლა.
იმავდროულად, მეზობელ რესტორანში დღესასწაულს აღნიშნავდნენ აფხაზეთის პრეზიდენტი ასლან ბჟანია და მისი კოლეგა სამხრეთ ოსეთიდან, ანატოლი ბიბილოვი.
შემთხვევის ადგილზე მაშინვე გაჩნდა შს მინისტრი დმიტრი დბარი თავის მოადგილეებთან ერთად და განგაშზე გამოძახებული სპეცრაზმი. საბოლოოდ, ერთი კანონდარღვევა მეორეში გადაიზარდა. მილიციამ დეპუტატსა და მის თანასოფლელებს სცემა, რის შემდეგაც ტერიტორია დატოვა, ნაცემი აძიუჟბელები კი ნათესავებმა წაიყვანეს საავადმყოფოებში.
მეორე დღეს, პარლამენტთან დაიწყო საპროტესტო აქცია სანაპიროზე მომხდარ ინციდენტთან დაკავშირებული შინაგან საქმეთა მინისტრისა და მისი მოადგილეების დაუყოვნებლივი გადადგომის მოთხოვნით.
პრეზიდენტი იძულებული გახდა შეეწყვიტა სამუშაო ვიზიტი მოსკოვში და სამშობლოში დაბრუნებულმა, ოპერატიულად გამართა უსაფრთხოების საბჭოს სხდომა, რომელზეც დროებით, გამოძიების მიმდინარეობის პერიოდში, დაკავებული თანამდებობებიდან გადააყენა შს მინისტრი დმიტრი დბარი და მისი ორი მოადგილე – რაშა ცვიჟბა და დადინა ჩაჩხალია.
ერთ კვირაში გენერალურმა პროკურატურამ სანაპიროზე მომხდარი ინციდენტის წინასაგამოძიებო შემოწმება დაასრულა. მის საფუძველზე, შს მინისტრის მოადგილეების, რაშა ცვიჟბასა და დადინა ჩაჩხალიას მიმართ სისხლის სამართლის საქმეები აღიძრა.
მათთვის შეფარდებული მუხლი ითვალისწინებს თავისუფლების აღკვეთას 5-დან 10 წლამდე ვადით.
გენერალური პროკურატურის აზრით, დეპუტატ გარი კოკაიას მოქმედებებშიც იკვეთება დანაშაულის ნიშნები – ხულიგნობა და ხელისუფლების წარმომადგენლების შეურაცხყოფა. უკვე რამდენიმე დღის შემდეგ, უზენაესმა სასამართლომ დააკმაყოფილა გენერალური პროკურატურის შუამდგომლობა, დეპუტატ კოკაიას წინააღმდეგ სისხლის სამართლის საქმის აღძვრის შესახებ.
შინაგან საქმეთა მინისტრ დმიტრი დბარის ქმედებებში კი გენერალურმა პროკურატურამ დანაშაულის ნიშნები ვერ აღმოაჩინა. მაგრამ, ამასთან ერთად, გენერალურმა პროკურორმა ადგურ აგრბამ პრეზიდენტს ურჩია, რომ მინისტრი თანამდებობიდან გადაეყენებინა.
შედეგად, საბოლოო სიტყვა პრეზიდენტს დარჩა. წინასაგამოძიებო მოქმედებების შედეგების გამოცხადების მომენტში, პრეზიდენტი კვლავ მოსკოვში იმყოფებოდა. ის სახლში მხოლოდ ორშაბათს, 18 ოქტომბერს დაბრუნდა. აძიუჟბელებმა და ოპოზიციამ მისგან მინისტრის მოსალოდნელ გადაყენებას ვერ მიაღწიეს. შედეგად, მათ ახალი საპროტესტო აქციების დაწყების შესახებ განაცხადეს.
