აფხაზეთში ოპოზიცია პრეზიდენტის გადადგომას ითხოვს
აფხაზეთში პრეზიდენტის გადადგომას ითხოვენ
აფხაზეთში ოპოზიცია, რომელმაც შინაგან საქმეთა მინისტრის გადაყენებას ვერ მიაღწია, ახლა უკვე პრეზიდენტის გადადგომას ითხოვს. სოხუმში 4 ნოემბერს ერთდროულად ორი აქცია გაიმართა – ერთი ოპოზიციის, მეორე – პროსახელისუფლებო.
ათასამდე ოპოზიციონერი შეიკრიბა მიტინგზე თეატრის მოედანზე. ამ ადგილიდან ას მეტრში, პრეზიდენტის ადმინისტრაციასთან ახლოს, მილიციის გარემოცვაში, მოქმედი პრეზიდენტის, ასლან ბჟანიას დაახლოებით ამდენივე მომხრე შეიკრიბა.
ოპოზიციის აქციაზე შეკრებილებმა კვლავ მოითხოვეს შინაგან საქმეთა მინისტრის გადადგომა. მათ პრეზიდენტს თავისი წარმომადგენელი გაუგზავნეს მიტინგის რეზოლუციით, მაგრამ ამ შეხვედრამ ახალი არაფერი მოიტანა.
მაშინ მომიტინგეებმა მოთხოვნა შეცვალეს. ახლა ისინი პრეზიდენტ ასლან ბჟანიას გადადგომას ითხოვენ, რადგან მიაჩნიათ, რომ ის ვერ გაუმკლავდა სახელმწიფოს მეთაურის მოვალეობებს.
ცნობილი გახდა, რომ ოპოზიცია სახალხო შეკრებისთვის მზადებას იწყებს.
ამ ამბამდე ორი დღით ადრე, პრეზიდენტმა შინაგან საქმეთა მინისტრის პოსტზე დააბრუნა დმიტრი დბარი, რომელიც სოხუმის სანაპიროზე 30 სექტემბერს მომხდარი ინციდენტის გამო თანამდებობას იყო ჩამოშორებული. ეს 1990-იანი წლების დასაწყისში მომხდარ ქართულ-აფხაზურ ომში გამარჯვების მორიგი წლისთავი იყო. პარლამენტის დეპუტატ გარი კოკაიასა და მის თანასოფლელებს სოფელ აძიუჟბადან, ქართულ-აფხაზური ომის ვეტერანებს სასტიკად სცემა სპეცრაზმმა იმის გამო, რომ სიხარულის გამოსახატად, რამდენჯერმე ჰაერში გაისროლეს პისტოლეტიდან.
- მოსაზრება: აფხაზეთში კრიზისი გარდაუვალია – მნიშვნელოვანია, როგორ შეხვდება მას ხელისუფლება
- აფხაზეთის ახალი პრეზიდენტის გამოწვევები
კოკაია – ასლან ბჟანიას ერთ-ერთი მთავარი კრიტიკოსია. ასე რომ, მომხდარმა თავიდანვე პოლიტიკური ელფერი შეიძინა.
გენპროკურატურამ, რომელიც ამ სკანდალურ სიტუაციაში გაერკვა, სისხლის სამართლის საქმე აღძრა შინაგან საქმეთა მინისტრის ორი მოადგილის, რაშა ცვიჟბასა და დადინა ჩაჩხალიას წინააღმდეგ, თუმცა, მინისტრის ქმედებებში დანაშაულის ნიშნები ვერ აღმოაჩინა.
ამავდროულად, გენპროკურორმა ადგურ აგრბამ პრეზიდენტს მინისტრის თანამდებობიდან გათავისუფლების რეკომენდაცია მისცა.
ამის შემდეგ, ორი კვირის განმავლობაში პრეზიდენტი დუმილს ინარჩუნებდა, კონფლიქტის დარეგულირებას კი „სახალხო დიპლომატიით“ ცდილობდა. მაგრამ მან ეს ვერ მოახერხა. საბოლოოდ, მან თანამდებობაზე აღადგინა დმიტრი დბარი, რის შემდეგაც, მინისტრმა დაუსწრებლად მოუხადა ბოდიში დაზარალებულ ვეტერანებს.
იმავე დღეს, საპროტესტო აქციების მოლოდინში, პრეზიდენტის სასახლის მიმდებარე ტერიტორიას ერთმანეთზე შედუღებული რკინის ბარიერები შემოარტყეს.
შიში უსაფუძვლო არ იყო. მას შემდეგ, რაც მინისტრის გადაყენებას ვერ მიაღწიეს, დაზარალებულმა ვეტერანებმა სოფელ აძიუჟბადან საკუთარი თავი კანონგარეშე გამოაცხადეს. მათ უფლება დაიტოვეს მომავალში ისე იმოქმედონ, როგორც საჭიროდ ჩათვლიან.
ვეტერანთა ორგანიზაცია „არუაას“ ლიდერმა ტიმურ გულიამ განაცხადა, რომ ორგანიზაცია პასუხისმგებლობას იხსნის მოვლენების სამომავლო განვითარებაზე.
