აფხაზეთში ოპოზიცია რუსული ინვესტიციების შესახებ შეთანხმების რატიფიკაციის ჩაშლისთვის ემზადება

აფხაზეთი რუსულ ინვესტიციებზე შეთანხმების წინააღმდეგია

აფხაზეთში ოპოზიცია ემზადება რუსეთ-აფხაზური საინვესტიციო შეთანხმების რატიფიკაციის ჩაშლისათვის. სხვადასხვა რეგიონის მცხოვრებლები იწყებენ შეხვედრებს დეპუტატებთან და ითხოვენ, რომ ხმა არ მისცენ შეთანხმებას, რადგან, მათი აზრით, რუსული მსხვილი ბიზნესის შემოსვლა აფხაზეთში უპრეცედენტოდ საზიანოა არა მხოლოდ ეკონომიკისთვის, არამედ საფრთხეს უქმნის მთლიანად აფხაზეთის უსაფრთხოებას.

• მოსაზრება: აფხაზეთის ეკონომიკაში რუსული ინვესტიციების შესახებ შეთანხმება მონური და დამამცირებელია
• “აფხაზეთის პრეზიდენტი ლობირებს რუსი ოლიგარქების ინტერესებს, რათა დარჩეს ხელისუფლებაში” – მოსაზრება სოხუმიდან

პარლამენტის საერთაშორისო ურთიერთობების კომიტეტის თავმჯდომარემ, ალხაზ ბარციცმა, ისე რომ კოლეგები საქმის კურსში არ ჩააყენა, აცნობა აფხაზეთის ეკონომიკის მინისტრს ქრისტინა ოზგანს, რომ პარლამენტს აქვს მხოლოდ სამი “დეკორატიული“ კომენტარი კანონპროექტზე.

ფაქტობრივად, კომენტარების ოფიციალური პაკეტი 20 შესწორებისგან შედგებოდა.

შედეგად, 30 ოქტომბერს ქრისტინა ოზგანმა და რუსეთის ეკონომიკური განვითარების მინისტრმა მაქსიმ რეშეტნიკოვმა ხელი მოაწერეს საკამათო საინვესტიციო ხელშეკრულებას.

ამასთან, შეთანხმებაში აფხაზი დეპუტატების მხოლოდ ორი ცვლილება იქნა გათვალისწინებული.

ახლა აფხაზეთის პარლამენტმა ან უნდა მოახდინოს ამ დოკუმენტის რატიფიცირება – ან საერთოდ უარყოს ის.

8 წელი საშემოსავლო გადასახადის გარეშე

აფხაზეთში რუსული ინვესტიციების შესახებ შეთანხმება ითვალისწინებს, რომ ინვესტორი რვა წლით თავისუფლდება საბაჟო გადასახადისგან სამშენებლო მასალებისა და აღჭურვილობის იმპორტისთვის, ასევე კორპორატიული ქონების გადასახადისა და საშემოსავლო გადასახადისგან.

დამატებითი ღირებულების გადასახადი კი ინვესტორისთვის იქნება მხოლოდ ხუთი პროცენტი, ანუ ჩვეულებრივ მიღებული პრაქტიკის ნახევარი. თუმცა, ეს არის ერთ-ერთი იმ ორი შესწორებიდან, რომელიც იქნა გათვალისწინებული ხელშეკრულების გაფორმებისას – თავდაპირველ პროექტში დღგ-ს სრულად ანაზღაურება ინვესტორს აფხაზეთის ბიუჯეტიდან უბრუნდებოდა ანაზღაურების ეტაპამდე.

გარდა ამისა, აფხაზეთის მთავრობა ვალდებულია ამ ხელშეკრულებით დაფარულ და ცალკე რეესტრში შეყვანილ ინვესტორებს მიაწოდოს ენერგეტიკული სიმძლავრეები კომუნალურ ქსელებთან და კომუნიკაციებთან მიერთების უპირატესი უფლებით.

და ბოლოს, ინვესტორს უფლება აქვს, ბანკში გირაოს სახით ჩადოს აფხაზეთის მთავრობის მიერ მიცემული მიწა. შესაბამისად, თუ ინვესტორი რამეს დააშავებს, ბანკს შეუძლია წაართვას ეს “სახელმწიფო“ მიწა.

ეს ყველაფერი სერიოზულ შეშფოთებას იწვევს როგორც აფხაზ მეწარმეებში, რომლებსაც ობიექტურად არ შეუძლიათ კონკურენცია გაუწიონ მსხვილ რუს ბიზნესმენებს ასეთ პირობებში, ასევე სამოქალაქო საზოგადოებაში, ოპოზიციასა და დეპუტატების მნიშვნელოვან ნაწილში.

დადასტურებული მეთოდი

საკომიტეტო მოსმენებზე პარლამენტის თავმჯდომარემ ლაშა აშუბამ ხაზგასმით აღნიშნა, რომ ეკონომიკის მინისტრმა ქრისტინა ოზგანმა ვერ დაიცვა აფხაზეთის ინტერესები და “ხელისუფლებასთან კომუნიკაცია ჩაიშალა“.

ოპოზიცია თვლის, რომ შეთანხმებას ლობირებენ გარკვეული რუსი ოლიგარქები და აპირებს ხელი შეუშალოს დოკუმენტის რატიფიცირებას, რისთვისაც შეიქმნა სპეციალური კონტრმოქმედების შტაბი.

მომავალი კვირიდან მოქალაქეების ინიციატივით დეპუტატებთან შეხვედრები მთელი აფხაზეთის მასშტაბით დაიწყება.

გავლენის ანალოგიური მეთოდი გამოიყენეს გასულ ზაფხულს, როდესაც ასლან ბჟანია ცდილობდა პარლამენტში ლობირება გაეწია მორიგი სკანდალური კანონპროექტისთვის, რომელიც რუსულ მხარეს აფხაზეთის აღმოსავლეთ ნაწილში ბინების აშენებისა და გაყიდვის/შესყიდვის საშუალებას მისცემდა. მაშინ ეს “საგანმანათლებლო საუბრები“ ამომრჩეველსა და დეპუტატებს შორის ძალიან ეფექტური აღმოჩნდა – პარლამენტმა უარი თქვა ამ კანონპროექტის განხილვაზე.

ახლა კი ოპოზიცია ისევ ამ მეთოდის გამოყენებას აპირებს და ზაფხულის წარმატების გამეორების იმედი აქვს.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო