აფხაზეთში მწვავე ენერგოკრიზისის ფონზე, ხელისუფლება ისევ აკანონებს მაინინგს

აფხაზეთში გაჩნდა ინფორმაცია, რომ ხელისუფლება აპირებს ისევ დააკანონოს მაინინგი, იმ დროს, როდესაც ხალხი უკვე ნახევარ წელზე მეტია მწვავე ენერგოკრიზისის პირობებში ცხოვრობს. ამავდროულად, ცნობილი გახდა, რომ მოულოდნელად თანამდებობა დატოვა კომპანია „ჩერნომორენერგოს“ ხელმძღვანელმა, მიხაილ ლოგუამ. 

„იქნებ, დროა, იმაზე ვიფიქროთ, რომ ეს ყველაფერი ხელისუფლებას აწყობს, მათ შორის ისიც, რომ გადასახადები არ გროვდება?“ – ამბობს ერთ-ერთი აფხაზი ჟურნალისტი.

მოსაზრება: აფხაზეთი უშუქოდ და ბიზნესი სახელმწიფოს ხარჯზე
ომისა და მშვიდობის ჰესი. ფილმი

ოფიციალურად მიხაილ ლოგუამ თანამდებობა „ჯანმრთელობის მდგომარეობის გამო“ დატოვა. თუმცა, საზოგადოებაში აქტიურად განიხილავენ ნამდვილ მიზეზებს. ერთ-ერთ ასეთად ასახელებენ იმას, რომ ლოგუა არ დაეთანხმა ხელისუფლების გეგმებს მაინინგის ლეგალიზაციისა და რუსი ბიზნესმენებისთვის მდინარე ენგურზე რამდენიმე ჰესის გადაცემის შესახებ. 

ლოგუამ „ჩერნომორენერგოს“ გენერალური დირექტორის პოსტზე ზუსტად ერთი წელი იმუშავა. 2011-2013 წლებში, ალექსანდრ ანქვაბის პრეზიდენტობის დროს, ის აფხაზეთის ვიცე-პრეზიდენტი იყო. და მაშინაც თანამდებობის დატოვების ოფიციალურ მიზეზად ასევე „ჯანმრთელობის მდგომარეობა“ გამოაცხადეს. 

ეკონომიკის მინისტრმა კრისტინა ოზგანმა დაადასტურა, რომ ხელისუფლება მუშაობს წინადადებაზე მაინინგისთვის პირობების შესაქმნელად.

მათ შორის: 

• ელექტროენერგიის რუსეთიდან მიწოდების ორგანიზება 
• ელექტროენერგიის ქსელზე დატვირთვის შესამცირებლად შეიქმნება ადგილები კრიპტოვალუტის მოპოვებისთვის საჭირო აღჭურვილობის განთავსებისთვის კონკრეტული ქვესადგურებისა და სიმძლავრეების გათვალისწინებით

„ჩვენთან იმყოფებოდნენ რუსული მხარის წარმომადგენლები, რომლებმაც შეისწავლეს მიწოდების ტექნიკური სქემა. ამ დროისთვის გამოგვიგზავნეს ხელშეკრულების პროექტი, რომელზეც ვმუშაობთ“, – განაცხადა ოზგანმა 23 ივლისს გამართულ სპეციალურ ბრიფინგზე. 

ბევრი ადამიანი აფხაზეთში დეჟავუზე ალაპარაკდა. 2020 წლის ოქტომბერში, ხელისუფლებამ მიიღო დადგენილება მაინინგის ლეგალიზაციის შესახებ. რისი შედეგიც გახდა მწვავე ენერგოკრიზისი, რომელიც ამ დრომდე გრძელდება. 

2020 წლის დეკემბერში, ხელისუფლებამ ქსელზე გაზრდილი დატვირთვისა და ელექტროენერგიის დეფიციტის გამო, ისევ აკრძალა მაინინგი. მაგრამ არაფერი შეცვლილა, ქსელზე დატვირთვა უცვლელი დარჩა. ამის გამო, მთელი ზამთრის განმავლობაში, აფხაზეთის მთელ ტერიტორიაზე, გრაფიკით, დღე-ღამეში 6-6 საათით თიშავდნენ დენს. 

სიტუაცია გარკვეულწილად გაუმჯობესდა ტურისტული სეზონის დაწყების შემდეგ. ახლა შუქს ღამით, ორი საათით თიშავენ. მაგრამ უკვე განაცხადეს, რომ საკურორტო სეზონის დასრულების შემდეგ, ისევ დღე-ღამეში 6 საათამდე გაიზრდება ელექტროენერგიის გათიშვის დრო. 

კომენტარი 

ლეონიდ აგრბა, ჟურნალისტი: 

„იქნებ, საკმარისია ცხოვრების გაგრძელება ისე, როგორც გამოქვაბულში, როდესაც ხელისუფლება ვერაფერს მართავს? ენერგეტიკა უკვე დიდი ხანია კრიზისშია და ახლა უკვე იმ წერტილს მიაღწია, საიდანაც უკან ვეღარ დაბრუნდები. 

ყველასთვის ცნობილია გამონათქვამი უფასო ყველის შესახებ, რომელიც მხოლოდ სათაგურშია (კილოვატი ელექტროენერგიის ღირებულება 40 კაპიკია, რაც დაახლოებით, 0.5$-ია), მაგრამ ადამიანები (ამასაც) არ იხდიან, სახლში კი ელექტროიატაკი და გათბობა აქვთ. განვითარებულ ქვეყნებშიც კი ეწევიან ელექტროენერგიის ეკონომიას, იყენებენ უფრო იაფ გაზს ან ხის დაწვით თბებიან. 

ეს ყველაფერი უკვე დიდი ხანია მოითხოვდა რეგულაციას, მაინინგის გამოჩენამდე გაცილებით ადრე. არ არსებობს არანაირი აუდიტორული დასკვნა „ჩერნომორენერგოსთან“ დაკავშირებით. ეს მონოპოლისტი ფაქტობრივად უფასოდ აწვდის მოსახლეობას ელექტროენერგიას, რომელსაც, უნდა ითქვას, რომ ასევე უფასოდ იღებს“.

აფხაზეთი ფაქტობრივად სრულად ენგურჰესის მიერ გამომუშავებული ელექტროენერგიით მარაგდება, რომელიც იმართება ერთობლივად, ქართველებისა და აფხაზების მიერ. ყველა ხარჯი, რომელიც ამ ელექტროენერგიის გამომუშავებასა და აფხაზეთისთვის მიწოდებასთან არის დაკავშირებული, თბილისის მიერ იფარება – JAMnews

„იქნებ, დროა, უკვე იმაზე ვიფიქროთ, რომ ხელისუფლებას აწყობს, რომ გადასახადები არ გროვდება? მოსახლეობა რეგულარულად იხდის ინტერნეტისთვის თვეში 1000 რუბლს (დაახლოებით, 15$), იმიტომ რომ, იქ მომსახურების პასუხისმგებლიანი მიმწოდებლები არიან. და, რაც ყველაზე მთავარია – ეს ყველა პუნქტი მენეჯმენტის აქსიომებია. ეს კი ნიშნავს, რომ ვიღაცას ხელს აძლევს მათი შეუსრულებლობა. 

მოდი, გამოვიდეთ გამოქვაბულიდან. მსოფლიოში მაგალითები არსებობს. შეიძლება სკანდალების გარეშე გამოვიდეთ, თუკი არსებითად და პროფესიონალურად ვიფიქრებთ და ვიმოქმედებთ“.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო