აფხაზეთში ჰიდროელექტროსადგურის იჯარით აღება მხოლოდ პარლამენტის ნებართვით იქნება შესაძლებელი
ჰიდროელექტროსადგურების დაქირავება აფხაზეთში
აფხაზეთში ჰიდროელექტროსადგურის დაქირავება/იჯარით აღება პარლამენტის ნებართვის გარეშე აღარ იქნება შესაძლებელი. ცვლილება კანონში „ელექტროენერგეტიკული ინდუსტრიის შესახებ“ თანამდებობის პირს ართმევს უფლებას დამოუკიდებლად გადაწყვიტოს ნებისმიერი, თუნდაც არამოქმედი, 5 მგვტ-ზე მეტი სიმძლავრის ჰიდროელექტროსადგურის იჯარით გაცემის საკითხი. ასე აპირებენ დეპუტატები წინააღმდეგობა გაუწიონ აფხაზეთისთვის წამგებიან პროექტებს.
მიზეზი, რამაც აიძულა პარლამენტი ნაჩქარევად შეეცვალა კანონი, იყო მთავრობის განზრახვა იჯარით გასცეს ჰესი 2, რომელიც ენგურჰესის ოთხი ჰიდროელექტროსადგურის კასკადის ნაწილია.
აფხაზეთის ომის დამთავრების შემდეგ ჰესი 2 აღარ ფუნქციონირებს. თუმცა, მწვავე ენერგეტიკულმა კრიზისმა, რომელსაც აფხაზეთი ბოლო სამი წლის განმავლობაში განიცდის, წინა პლანზე წამოიწია უმოქმედო ჰიდროელექტროსადგურების აღდგენის საკითხი.
- თბილი საბანი და ცირკი სახლში – როგორ გადააქვთ აფხაზეთის მცხოვრებლებს უშუქობა
- მაინინგი აფხაზეთში: “გავაგრძელებ, სანამ მოწყობილობას არ წამართმევენ”
- რამდენად გამართლებულია რუსული ინვესტიციები აფხაზეთში, როგორც ენერგეტიკული კრიზისის დაძლევის საშუალება
მთავრობა ელექტროენერგიის მზარდი დეფიციტის პრობლემის გადაწყვეტას ენერგეტიკის ინდუსტრიის დენაციონალიზაციაში ხედავს, მათ შორის 3 ჰესის უცხოელ ინვესტორებზე იჯარით გადაცემას პრივატიზაციის შემდგომი პერსპექტივით. ხელისუფლება თავის გეგმებს იმით ხსნის, რომ ამ ობიექტების აღდგენას დამოუკიდებლად, საკუთარი რესურსების ხარჯზე ვერ ახერხებენ.
ამას ეწინააღმდეგება ოპოზიცია, რომელიც მიიჩნევს, რომ ზოგიერთ ჩინოვნიკს უბრალოდ დენაციონალიზაციის პროცესზე ფულის გამომუშავება სურს, ახლა კი ამას პარლამენტიც დაეთანხმა, მიუხედავად იმისა, რომ მასში უმრავლესობა მოქმედი ხელისუფლების მხარდამჭერია.
მთავრობა „ჰესი 2“-ის იჯარით მიცემას აპირებდა ენერგოკომპანია „ჩერნომორენერგოს“ ყოფილი დირექტორის, ამჟამად პარლამენტის წევრის, რეზო ზანთარიას თანადამფუძნებელი საწარმოსთვის და მისი რუსი პარტნიორისთვის.
„ჰესი 2“-ის იჯარაზე სამი პრეტენდენტი იყო – ამბობს ყოფილი დეპუტატი ჰარი კოკაია – ყველაზე ხელსაყრელი პირობები თავად ენგურჰესის ხელმძღვანელმა, ლევან მებონიამ შემოგვთავაზა, რომელიც სადგურის აღდგენის შემდეგ აფხაზეთის ენერგოსისტემას ენერგიის ნახევარს დაჰპირდა, მაგრამ მთავრობამ აირჩია პროექტი, რომლის უკანაც რეზო ზანთარია დგას, მიუხედავად იმისა, რომ მან სახელმწიფოს გამომუშავებული ენერგიის მხოლოდ 30 პროცენტი შესთავაზა.”
ასეა თუ ისე, ხელისუფლებამ ვერ შეასრულა თავისი გეგმები, რადგან “ზემოდან” ზეწოლის მიუხედავად, ჩერნომორენერგოს გენერალურმა დირექტორმა რამინ ზინგიშვილმა უარი თქვა იჯარის ხელშეკრულების ხელმოწერაზე და გადადგომა ამჯობინა.
ახლა კი, კანონში ცვლილების მიღების შემდეგ, მსგავსი დილემა ჩერნომორენერგოს ახალ ხელმძღვანელს, ტიმურ ჯიინჯოლიას აღარ დაუდგება. კითხვას, ვის და რა პირობებით მიეცეს ჰიდროელექტროსადგურები იჯარით (და საერთოდ იჯარით) ამიერიდან გადაწყვეტს პარლამენტი.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
