ექსპერტების აზრით, აფხაზეთში დემოგრაფიული კრიზისია. 2011 წელს ჩატარებულ ბოლო აღწერთან შედარებით, მოსახლეობა მხოლოდ 3,5 ათასი ადამიანით გაიზარდა, ბოლო ხუთი წლის განმავლობაში კი შობადობის შემცირება და სიკვდილიანობის ზრდა დაფიქსირდა.
სოციალურ-ეკონომიკური კვლევის ცენტრის (CSER) მონაცემებით, 2011 წლიდან 2021 წლამდე აფხაზეთის მოსახლეობა 3531 ადამიანით გაიზარდა და ამჟამად 244,2 ათასი ადამიანია.
მათ შორის ეთნიკური აფხაზების წილი ნახევარზე ოდნავ მეტია – 51 პროცენტი (125,5 ათასი).
მეორე ადგილზე ეთნიკური ქართველები არიან (46,9 ათასი).
შემდეგ მოდიან სომხები (41,5 ათასი) და რუსები (22,3 ათასი).
მოსახლეობის 3,5 ათასი ადამიანით ზრდა მოხდა 2010-იანი წლების პირველ ნახევარში, მაგრამ შემდეგ მაჩვენებელი შემცირდა და სიკვდილიანობამ შობადობის მაჩვენებლის გადაჭარბება.
CSER-ის მკვლევარი ამრა ცუშბა მიიჩნევს, რომ არსებობს მნიშვნელოვანი დემოგრაფიული პრობლემები.
იგი ქვეყნის მთავარ დემოგრაფიულ სირთულედ შობადობის დაბალ და სიკვდილიანობის მაღალ მაჩვენებელს მიიჩნევს. ასევე მოსახლეობის არახელსაყრელ ასაკობრივ დინამიკას და საპენსიო ასაკის ადამიანთა რაოდენობის ზრდას.
გარდა ამისა, ცუშბას თქმით, მამრობითი სქესის მოსახლეობის დაბალი სიცოცხლის ხანგრძლივობა, ქალების რეპროდუქციული ჯანმრთელობის გაუარესება, ასევე მიგრანტების რაოდენობის ზრდა და არარეგულირებადი ჩრდილოვანი მიგრაციის პროცესები უარყოფითად აისახება დემოგრაფიაზე.
მაგრამ აფხაზეთის მთავრობა არ ეთანხმება მოცემულ მაჩვენებლებს.
“რეალური შობადობა ოფიციალურზე გაცილებით მაღალია”, – ამის შესახებ სოციალური დაცვის სამინისტროს იურიდიული დეპარტამენტის უფროსმა, რომეო ჩერქეზიამ განაცხადა. მისი აზრით, 2021 წელს დაფიქსირებული 1262 ადამიანის დაბადება შეიძლება ორზე გავამრავლოთ რეალური სურათის მისაღებად. ეს კი იმის გამო ხდება, რომ რუსეთის მოქალაქეობის მქონე აფხაზეთის ბევრი მცხოვრები ამჯობინებს მშობიარობას რუსეთში, რათა მიიღოს რუსული სოციალური პაკეტი, რომელიც მნიშვნელოვნად აღემატება აფხაზურს.
თუმცა, შეუსაბამობების მიუხედავად, როგორც მეცნიერები, ისე ოფიციალური პირები საჭიროდ მიიჩნევენ აფხაზეთში ახალი აღწერის ჩატარებას.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
