აფხაზეთში "ბინების შესახებ კანონი" ბჟანიას და ხაჯიმბას შორის მწვავე დაპირისპირების თემა გახდა
კანონი ბინების შესახებ აფხაზეთში
აფხაზეთის ორი პრეზიდენტი – ამჟამინდელი ასლან ბჟანია და მისი წინამორბედი რაულ ხაჯიმბა ერთმანეთს მწვავედ დაუპირისპირდნენ ბინების შესახებ კანონპროექტის თემაზე, რამაც დიდი რეზონანსი გამოიწვია აფხაზურ საზოგადოებაში.
უკვე მეორე წელია, აფხაზეთის მთავრობა და პირადად ასლან ბჟანია ცდილობენ შემოიღონ კანონპროექტი, რომელიც უცხოელებს აფხაზეთში ბინების აშენებისა და ყიდვის უფლებას აძლევს. ამ შემთხვევაში უცხოელებში რუსებს გულისხმობენ.
ოპოზიცია და საზოგადოების მნიშვნელოვანი ნაწილი კატეგორიულად ეწინააღმდეგება მსგავსი კანონის მიღებას და მიიჩნევს, რომ ეს აფხაზეთში უცხო ქვეყნის მოქალაქეების მიერ უძრავი ქონების შეძენის აკრძალვის გვერდის ასავლელი ხრიკია.
ბინების შესახებ კანონპროექტის ოპონენტების აზრით, ეს არა მხოლოდ დააზარალებს ადგილობრივ ბიზნესს და გაზრდის ფასებს უძრავი ქონების ბაზარზე, არამედ, რაც მთავარია, დაარღვევს დემოგრაფიულ ბალანსს: თუ რუსების ნაკადი შემოვა აფხაზეთში, აფხაზები შესაძლოა კვლავ დარჩნენ უმცირესობაში, როგორც ეს საბჭოთა პერიოდში უკვე მოხდა და საბოლოოდ ქართულ-აფხაზურ კონფლიქტამდე მივიდა. სწორედ ამის თავიდან ასაცილებლად არის აკრძალული აფხაზეთში უცხოელებზე საცხოვრებლის მიყიდვა.
- ახალი „კანონი ბინების შესახებ“ აფხაზეთში – რას ნიშნავს და რა საფრთხეებს შეიცავს
- “ეს არის საზოგადოების პროტესტი ხელისუფლების წინააღმდეგ” – პოლიტოლოგი აფხაზეთში ბინების კანონის შესახებ
- ეკონომისტის მოსაზრება: რატომ ლობირებს აფხაზეთის ხელისუფლება ბინების შესახებ კანონს?
რუსულ გამოცემა АиФ-თან ინტერვიუში ასლან ბჟანიამ, უპასუხა კითხვას, თუ რატომ უწოდებენ მისი ოპონენტები ამ კანონპროექტს „ახალ კოლონიზაციას“ – მან ამ პოზიციას „სისულელე“ უწოდა. ამავდროულად, ბჟანიამ შეახსენა ოპოზიციას, რომ ხელისუფლებაში ყოფნისას ის თავად ემხრობოდა რუსებისთვის უძრავი ქონების მიყიდვას.
„ეს სისულელეა. გასაკვირია, რომ აფხაზეთში ზოგიერთი პოლიტიკოსი ასეთ სიტყვებს ამბობს. უფრო მეტიც, ხელისუფლებაში ყოფნისას ისინი თავად ემხრობოდნენ უძრავი ქონების უცხოელებზე მიყიდვას.
რატომ ყიდიან ბინებს უცხოელებზე პატარა დუბაიში, სადაც არავინ ყვირის იქ კოლონიზაციაზე? აფხაზეთში საცხოვრებლის უცხოელ მფლობელს აქვს მხოლოდ ამ საცხოვრებლის უფლება – და სხვა არაფრის.
70 000 ადამიანი გვყავს უმუშევარი. მათთვის სამუშაო ადგილების შესაქმნელად 400 მილიარდი რუბლი [დაახლოებით 4 მილიარდი დოლარი] უნდა ჩაიდოს აფხაზეთის ეკონომიკაში, ჩვენი წლიური ბიუჯეტი კი მხოლოდ 14 მილიარდია [დაახლოებით 150 მილიონი დოლარი]. თუ 30 000 ბინა აშენდება, ეს ეკონომიკაში 400 მილიარდ რუბლს მოიზიდავს“.
ბჟანიას თქმით, თუ ბინების შესახებ კანონი მიიღება, „სახელმწიფო არაფერს რისკავს”.
მან ცალსახად დაადანაშაულა ოპონენტები ამ იდეის ხელის შეშლაში, რომელსაც უცხოური სადაზვერვო სამსახურები კურირებენ.
„ეს ბრძოლა სპეცსამსახურების ხელწერაა, რომელთა მიზანია ჩვენი ურთიერთობების [რუსეთთან] გაფუჭება.
ბჟანიას გამოსვლას მაშინვე გამოეხმაურა ექს-პრეზიდენტი რაულ ხაჯიმბა.
„სიმწრის ღიმილს იწვევს განცხადება, რომ ეს კანონი ინვესტორებს კი არა, აფხაზეთის მცხოვრებლებს სჭირდებათ: ალტრუიზმი და ინვესტორი შეუდარებელი ცნებებია. ჩვენი ხალხის მოტყუება არ არის საჭირო!“ – განაცხადა ხაჯიმბამ.
ხაჯიმბამ აღიარა, რომ რუსებისთვის უძრავი ქონების მიყიდვის იდეას თავადაც უჭერდა მხარს, როდესაც პრეზიდენტი იყო, მაგრამ:
„ამ იდეას ჩვენს საზოგადოებაში მხარდაჭერა არ ჰქონია და ბჟანიასგან განსხვავებით, თემა დავხურეთ.“
რაც შეეხება დასავლური სადაზვერვო სამსახურების გავლენას, ხაჯიმბას თქმით, მას უკვირს ბჟანიას მიერ თავისი მოქალაქეების მიმართ ასეთ ბრალდებები:
„არც ერთ პრეზიდენტს, თუნდაც ყველაზე მწვავე დაპირისპირებაში, არ გაუთანაბრებია დისიდენტები ხალხის მტრებთან.”
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
