აფხაზეთის შს მინისტრს, რომლის გადადგომასაც მოსახლეობა მოითხოვდა, ახალი სამსახური მოუძებნეს

აფხაზეთის შინაგან საქმეთა მინისტრის გადადგომა 

აფხაზეთში, შინაგან საქმეთა მინისტრი, რომელიც ცოტა ხნის წინ სკანდალში გაეხვია, რასაც პოლიტიკური კრიზისი მოჰყვა, მაინც გაათავისუფლეს თანამდებობიდან. თუმცა, დმიტრი დბარი კვლავ „ზევით ტივტივებს“ – ახლა ის სახელმწიფო დაცვის სამსახურს ხელმძღვანელობს, რომელიც არანაკლებ გავლენიანი ძალოვანი სტრუქტურაა. 

ირიბი სიმპტომები, რომ დმიტრი დბარი სამუშაოს გამოიცვლიდა, ჯერ კიდევ გასულ კვირას გამოჩნდა, როდესაც პრეზიდენტმა ასლან ბჟანიამ თავისი პირადი ბრძანებით გენერლის წოდება მიანიჭა სახელმწიფო დაცვის სამსახურის უფროსს, ზურაბ ზანთარიას. 

როგორც წესი, აფხაზეთში ასეთი დაუგეგმავი წოდების მომატება საპატიო პენსიაზე გაშვების წინ ხდება ხოლმე. და სოციალურ ქსელებში ამასთან დაკავშირებით მაშინვე დაიწყეს ლაპარაკი, რომ ზანთარიას გადადგომა იყო მოსალოდნელი და მის ადგილას დმიტრი დბარი დაინიშნებოდა. 

• კომენტარი: ასლან ბჟანია თავდაცვით მდგომარეობაში გადავიდა
• მოსაზრება: რატომ ვერ „ყლაპავს“ რუსეთი აფხაზეთს

ფაქტობრივად, ასეთი საკადრო გადანაცვლებებით პრეზიდენტი ასლან ბჟანია საპროტესტო ტალღის დაგდებას ცდილობს, რომელიც მილიციის მიერ პარლამენტის დეპუტატის, გარი კოკაიასა და სოფელ აძიუჟბიდან მისი თანასოფლელების – აფხაზეთის ომის ვეტერანების ცემის შემდეგ აგორდა. 

შეგახსენებთ, რომ 30 სექტემბერს, როდესაც აფხაზეთმა ომში გამარჯვების მორიგი წლისთავი იზეიმა, გარი კოკაიამ ეს დღე თანასოფლელებთან ერთად სოხუმის სანაპიროზე მდებარე ერთ-ერთ რესტორანში აღნიშნა. სუფრის შემდეგ, უკვე ქუჩაში, მან სიხარულის გამოსახატავად პისტოლეტიდან ჰაერში რამდენჯერმე გაისროლა. 

შემთხვევის ადგილზე მაშინვე გაჩნდა შინაგან საქმეთა მინისტრი დმიტრი დბარი თავის მოადგილეებსა და განგაშზე მისულ სპეცრაზმთან ერთად. შედეგად, კანონის ერთი დარღვევა მეორეში გადაიზარდა. მილიციამ დეპუტატსა და მის თანასოფლელებს სცემა, რის შემდეგაც ადგილი დატოვა, ნაცემი აძიუჟბელები კი შემდეგ ნათესავებმა გადაიყვანეს საავადმყოფოებში. 

მომდევნო დღეს, პარლამენტთან საპროტესტო აქცია დაიწყო სანაპიროზე მომხდარ ინციდენტში მონაწილე შინაგან საქმეთა მინისტრისა და მისი მოადგილეების დაუყოვნებლივი გადადგომის მოთხოვნით. ამის გამო პრეზიდენტი იძულებული გახდა, მოსკოვში სამუშაო ვიზიტი შეეწყვიტა და სამშობლოში დაბრუნების შემდეგ, დროებით, გამოძიების მიმდინარეობისას, დაკავებულ თანამდებობას ჩამოაშორა მინისტრი დმიტრი დბარი და მისი ორი მოადგილე – რაშა ცვიჟბა და დადინა ჩაჩხალია. 

გენერალურმა პროკურატურამ მინისტრის მოადგილეების წინააღმდეგ სისხლის სამართლის საქმე აღძრა. მათ მიმართ წარდგენილი მუხლი 5-დან 10 წლამდე თავისუფლების აღკვეთას ითვალისწინებს. 

თუმცა, თავად მინისტრის ქმედებებში საგამოძიებო ორგანოებმა დანაშაულის ნიშნები ვერ აღმოაჩინეს. ამის მიუხედავად, თავის რეზიუმეში, გენერალურმა პროკურორმა ადგურ აგრბამ პრეზიდენტს რეკომენდაცია მისცა, თანამდებობიდან გაეთავისუფლებინა შინაგან საქმეთა მინისტრი. თუმცა, პრეზიდენტმა დმიტრი დბარი არ დაითხოვა და ნოემბრის დასაწყისში ის სამსახურში დააბრუნა. 

პრეზიდენტის ასეთმა პოზიციამ მწვავე პოლიტიკური კრიზისი გამოიწვია – მთელი აფხაზური ოპოზიციის გაერთიანება და საპროტესტო აქციების დაწყება, რომლის საბოლოო მიზანი სახალხო კრების შეკრება და თავად ასლან ბჟანიას ვადამდელ პენსიაზე გაშვებაა. 

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო