აფხაზეთის ხელისუფლებას სურს ჟენევის დისკუსიები მინსკში გადაიტანოს

ჟენევის დისკუსიები

აფხაზეთის მთავრობის განცხადებით, ჟენევამ ამოწურა თავისი სარგებლიანობა, როგორც საერთაშორისო დისკუსიების ადგილმა კავკასიაში კონფლიქტების, მათ შორის ქართულ-აფხაზური კონფლიქტის მოგვარების შესახებ. შესაბამისად, აფხაზური მხარე ამჯობინებს, რომ მინსკი მოლაპარაკებების ახალ ადგილად იქცეს. ამის შესახებ ასლან ბჟანიასა და საგარეო საქმეთა მინისტრის, ინალ არძინბას შორის სამუშაო შეხვედრაზე გახდა ცნობილი.

• “კრემლის წინაშე აღებულმა ვალდებულებებმა ასლან ბჟანია ჩიხში შეიყვანა” – მოსაზრება
• ასლან ბჟანია: საქართველოს ხელმძღვანელობამ უნდა აღიაროს არსებული რეალობა
• ევროკავშირის სპეციალურ წარმომადგენელს უარი უთხრეს აფხაზეთში შესვლაზე. ტოივო კლაარი ამ თემაზე წერილს აქვეყნებს

ბჟანიას თქმით, 2024 წლის თებერვლის შუა რიცხვებში მოსკოვში მისი ბოლო ვიზიტის დროს, რუსეთის საგარეო საქმეთა მინისტრი სერგეი ლავროვი დაინტერესდა აფხაზეთის ხელმძღვანელობის მოსაზრებებით საქართველოსთან ახალ პლატფორმაზე მოლაპარაკებების გამართვის შესაძლებლობის შესახებ.

“ლავროვმა თქვა, რომ ჟენევის ფორმატმა ამოწურა თავი და ჰკითხა აფხაზურ მხარეს, აქვს თუ არა რაიმე საწინააღმდეგო ჟენევაზე უფრო მისაღები ადგილის პოვნასთან დაკავშირებით.

მაგალითად, დისკუსიების ასეთი ადგილი შეიძლება იყოს მინსკი, ან სხვა სახელმწიფოების დედაქალაქები, ყველაზე ნეიტრალური, მაგალითად, ყოფილი საბჭოთა კავშირის რესპუბლიკები. ამაში ცუდი არაფერია, პირიქით, შეიძლება რაღაცის შეცვლა უკეთესობისკენ“, – ამბობს ასლან ბჟანია.

ეს იდეა ასევე მოეწონა აფხაზეთის საგარეო საქმეთა მინისტრს ინალ არძინბას:

“ბოლო დროს რუსეთის საგარეო საქმეთა სამინისტროდან ჩვენამდე ბევრი ინფორმაცია მოვიდა, რომ ჟენევა მოლაპარაკების პროცესში მონაწილეებს თანაბარ პირობებს ვერ უქმნის. ამიტომ ეს საკითხი ძალიან აქტუალურია“.

თუმცა ეს ყველაფერი კვლავ პრეზიდენტსა და მინისტრს შორის დიალოგის დონეზე რჩება. აფხაზეთს ჟენევაზე უარი ოფიციალურად არ უთქვამს.

ბჟანიასა და ინალ არძინბას შეხვედრაზე ჟენევის დისკუსიებზე ნათქვამის სრული ვერსია მოისმინეთ 18:30 წუთიდან:

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო