აფხაზეთის ე.წ. საპრეზიდენტო კანდიდატებმა მეორე ტურის წინ "ზავი“ დადეს
გუნბამ და არძინბამ ხელშეკრულება გააფორმეს
აფხაზეთის საპრეზიდენტო არჩევნების მეორე ტურში გასულმა ორმა კანდიდატმა – ბადრა გუნბამ და ადგურ არძინბამ – დღევანდელი მოლაპარაკებების შედეგად შეთანხმებას მოაწერეს ხელი.
ფაქტობრივად, ეს “ზავი“, რომელიც ოპონენტებმა დადეს, მიზნად ისახავს საზოგადოების დაძაბული გარემოს სტაბილიზებას მეორე ტურის წინ, რომელიც პირველ მარტს გაიმართება.
შეთანხმების არსი იმაში მდგომარეობს, რომ პრეზიდენტობის კანდიდატები დაჰპირდნენ ერთმანეთს, რომ “პატიოსანი თამაშის“ წესებს დაიცავენ.
შეთანხმება ექვსი პუნქტისგან შედგება:
- სახელმწიფოს ინტერესები პრიორიტეტია
„ჩვენი უმაღლესი მიზანი ხალხის კეთილდღეობაა, განსხვავება მხოლოდ ამ მიზნის მიღწევის გზებშია. მხოლოდ აფხაზეთის ხალხს აქვს უფლება განსაზღვროს, რომელი გზით წავა ქვეყანა. აფხაზურ საზოგადოებაში მყარი კონსენსუსი არსებობს აფხაზეთის სუვერენიტეტის დაცვისა და რუსეთთან თანასწორუფლებიანი, მოკავშირეობრივი ურთიერთობების შემდგომი განმტკიცების საკითხზე. არც ერთი საპრეზიდენტო კანდიდატი არ წარმოადგენს ან უჭერს მხარს მესამე ძალებს.“ - პოლიტიკური ეთიკის დაცვა
„ჩვენ ვალდებულებას ვიღებთ, არ დავუშვათ შავი პიარის, ცილისწამებისა და ოპონენტების დისკრედიტაციის გამოყენება საარჩევნო პროცესის განმავლობაში. მკაცრად ვგმობთ მცდელობებს, რომლებიც მიზნად ისახავს აფხაზეთის მრავალეთნიკურ საზოგადოებაში შუღლის გაღვივებას.“ - მიმართვა მედიას
„მივმართავთ როგორც ადგილობრივ, ისე საერთაშორისო მედიასაშუალებებსა და ჟურნალისტებს, რომლებიც აფხაზეთის საპრეზიდენტო არჩევნებს აშუქებენ. არ არსებობს საფუძველი დაძაბულობის, ესკალაციისა და აფხაზური საზოგადოების ან პოლიტიკოსების არასწორი ინტერპრეტაციისთვის. მსგავსი რიტორიკა უარყოფითად აისახება საზოგადოებაზე და შეიძლება დესტაბილიზაციას შეუწყოს ხელი.“ - არჩევნების შედეგების აღიარება
„ჩვენ ვაღიარებთ არჩევნების შედეგებს, იმ შემთხვევაში, თუ ისინი ჩატარდება აფხაზეთის კანონმდებლობის, საერთაშორისო სტანდარტებისა და სამართლიანობის პრინციპების შესაბამისად და მათი ლეგიტიმურობა ობიექტურად დადასტურდება.“ - ძალადობის პრევენცია
„ჩვენ ვალდებულებას ვიღებთ, არ დავუშვათ ძალადობრივი მოწოდებები, მასობრივი არეულობები და ქვეყანაში დესტაბილიზაციის მცდელობები როგორც საარჩევნო პროცესის მიმდინარეობისას, ასევე შედეგების გამოცხადების შემდეგ. მოვუწოდებთ აფხაზეთის ხალხსა და ჩვენს მხარდამჭერებს, არ აყვნენ პროვოკაციებს, განსაკუთრებით იმათ, რომლებიც ეთნიკურ დაპირისპირებას უწყობს ხელს.“ - ადმინისტრაციული რესურსის მიუკერძოებელი გამოყენება
„ჩვენ ვიღებთ პასუხისმგებლობას, არ გამოვიყენოთ ადმინისტრაციული რესურსი, მათ შორის სახელმწიფო მედიასაშუალებები პოლიტიკური მიზნების მისაღწევად საარჩევნო კამპანიის პერიოდში.“
- შეიარაღებული უცხოელები და უსაფრთხოების სამსახურის უფროსის გადადგომა – პოლიტიკური კრიზისის ახალი რაუნდი აფხაზეთში
- აფხაზეთის არჩევნების ფონზე მოულოდნელად წამოიჭრა “სომხური საკითხი“. ვინ და რატომ ახორციელებს ზეწოლას საზოგადოებაზე?
ბადრა გუნბასა და ადგურ არძინბას პირისპირ მოლაპარაკებები 21 თებერვალს გაიმართა და ხუთი საათი გაგრძელდა.
შეხვედრის აუცილებლობა მას შემდეგ გაჩნდა, რაც არძინბას მობეზრდა ბრალდებები, თითქოს ის ანტირუსული პოლიტიკოსი და თურქეთის მიერ მხარდაჭერილი კანდიდატია. სწორედ ამგვარი იარლიყები მიაწებეს ოპოზიციის კანდიდატს რუსულმა მედიასაშუალებებმა და ბადრა გუნბას შტაბთან აფილირებულმა ანონიმურმა საინფორმაციო წყაროებმა.
ინფორმაციული ომის გამწვავებას შეიძლებოდა, ახალი დაძაბულობის პროვოცირება გამოეწვია სოხუმში, რომელიც ჯერ კიდევ ცდილობს პოლიტიკური კრიზისიდან გამოსვლას. სწორედ ამ ესკალაციის თავიდან ასაცილებლად გაიმართა აღნიშნული მოლაპარაკებები.
მოლაპარაკების იდეა სპონტანურად გაჩნდა და პრაქტიკულად არავის სჯეროდა, რომ ორი დაპირისპირებული პოლიტიკური ბანაკის წარმომადგენლები, რომლებიც 20 წელია ერთმანეთს ცვლიან აფხაზეთის სათავეში, შეძლებდნენ კონსენსუსის მიღწევას. მაგრამ, როგორც ჩანს, ეს მაინც მოხდა.
შეგახსენებთ, რომ ბადრა გუნბა მოქმედი ხელისუფლების კანდიდატია, გადადგმული ყოფილი პრეზიდენტის, ასლან ბჟანიას მემკვიდრე და კრემლის აშკარა ფავორიტი ამ საპრეზიდენტო მარათონში.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
