ქანდაკებას, რომელიც სოხუმის სიმბოლოა, მნიშვნელოვანი დეტალი დაეკარგა, მაგრამ მალევე მოიძებნა
პატეფონი, რომელიც ნიკას ეკუთვნოდა – ცნობილი მწერლის, ფაზილ ისკანდერის მრავალი ნაწარმოების გმირს, ვისი ქანდაკებაც სოხუმის ერთ-ერთ სიმბოლოდ იქცა – იპოვეს.
ორი დღის განმავლობაში, პატეფონი, რომელზეც ნიკა ფირფიტას დებს, მოპარულად ითვლებოდა.
განგაში, სოციალურ ქსელში, საკუთარ გვერდზე ქანდაკების ავტორმა, ცნობილმა აფხაზმა ხელოვანმა, არქიფო ლაბახუამ ატეხა:
„როგორც მითხრეს. გუშინწინ საღამოს, პატეფონი უკვე აღარ იყო. ვიღაცამ დაგეგმა ეს, საკმაოდ ძლიერი ჭანჭიკი იყო და ასე უბრალოდ, შეუძლებელი იყო პატეფონის მოხსნა. როგორც ჩანს, ვიღაც ძალაყინით მოვიდა“.
• რით დაეხმარა covid-19-თან ბრძოლაში საქართველო ოსურ და აფხაზურ მხარეებს
• ანტიკრიზისული სოფლის მეურნეობა: ორი ამბავი აფხაზეთიდან
• მოსაზრება: როგორ გავხდეთ პატივცემული ადამიანი აფხაზეთში
ლაბახუას თქმით, თავად ნიკას ქანდაკება არ დაზარალებულა, თუმცა, პორტატული პატეფონი მთელი კომპოზიციის მთავარი დეტალი იყო.
„მთელი ხიბლი იმაშია, რომ ნიკას ხელი ნემსზე უდევს, აი, ის ნემსს ფირფიტაზე დებს და ისმის მუსიკა. ეს დაძაბული მომენტია, სასიამოვნოა მუსიკის მოლოდინი“, – განმარტავს ლაბახუა.
ამის შემდეგ, სოციალურ ქსელებში ვანდალების კრიტიკა დაიწყეს და მათ სინდისის მოხმობისკენ მოუწოდებდნენ, რათა ქანდაკების დეტალი ადგილზე დაებრუნებინათ.
გარკვეული დროის შემდეგ, „ვანდალი“ კონტაქტზე გამოვიდა. ის სოხუმის ადმინისტრაციის „კეთილმოწყობის“ მუნიციპალური სამმართველო აღმოჩნდა.
„ქალაქის საზოგადოებას ვაცნობებთ, რომ ნიკას პატეფონი არავის არ მოუპარავს. ის 18 აგვისტოს მოიხსნა და რესტავრაციის შემდეგ, სოხუმის სანაპიროზე, ძველ ადგილს დაუბრუნდება. პატეფონს რესტავრაცია ესაჭიროება. ჩვენ ქანდაკების ავტორს, არქიფო ლაბახუას დავუკავშირდებით შესაბამისი სამუშაოების ჩასატარებლად“, – განაცხადა საწარმოს დირექტორმა, საიდ კურ-იპამ.
სოციალურმა ქსელებმა დაკარგული ნივთის აღმოჩენის შემდეგ, მშვიდად ამოისუნთქა, თუმცა, თავს ვერ იკავებენ კითხვისგან: „რატომ არ შეიძლება, თავიდანვე საქმის კურსში ჩააყენონ საზოგადოება ან თუნდაც ქანდაკების ავტორი, პატეფონის დაგეგმილი რესტავრაციის შესახებ?“.
პატეფონიანი ნიკას ბრინჯაოს ქანდაკება სოხუმის სანაპიროზე 2013 წელს დაიდგა.
ეს პირველი შემთხვევა არ არის, როდესაც არქიფო ლაბახუას ქანდაკება, რომელიც დიდი პოპულარობით სარგებლობს სოხუმელებსა და ტურისტებს შორის, ვანდალიზმის მსხვერპლი ხდება. ადრე, უცნობმა პირებმა რამდენჯერმე მოიპარეს ფილოსოფოსი პინგვინის წიგნი და კალამი, ასევე, დაწვეს აფხაზური ზღაპრების გმირის, ტაკჩუმას ქანდაკება.
