აფხაზეთმა გალელი პენსიონერებისთვის საზღვარი გახსნა

აფხაზეთმა გახსნა საზღვარი გალის რაიონის მოსახლეობისთვის, რომლებსაც საქართველოს მოქალაქეობა აქვთ. მათ კვირაში სამჯერ (ოთხშაბათს, ხუთშაბათს და პარასკევს) თავისუფლად შეეძლებათ საზღვრის გადაკვეთა ორივე მიმართულებით.

ეს გადაწყვეტილება აფხაზეთის ხელისუფლებამ იმისთვის მიიღო, რომ ქართველმა პენსიონერებმა, რომლებიც მუდმივად ცხოვრობენ აფხაზეთში, პენსიების და სხვადასხვა სახის სოციალური შემწეობების აღება შეძლონ. მათ ეს მხოლოდ საქართველოს მიერ კონტროლირებად ტერიტორიაზე შეუძლიათ.

14 მარტიდან, პანდემიასთან დაკავშირებული შემზღუდველი ზომების გამო, აფხაზეთის ხელისუფლებამ მოქალაქეების გადაადგილებისთვის საქართველოს საზღვარი დახურა. გამონაკლისი გაკეთდა მხოლოდ იმ პირებზე, რომლებსაც გადაუდებელი სამედიცინო დახმარება სჭირდებათ.

• აფხაზეთში ოპოზიცია პროტესტით იმუქრება, თუკი ადგილობრივი ქართველებისთვის მოქალაქეობის დაბრუნებას დაიწყებენ

• კორონავირუსის ტყვეები – მათ, ვინც ქართულ მხარეს გადავიდნენ, აფხაზი მესაზღვრეები უკან აღარ უშვებენ

• ქართველები აფხაზეთში გვარებს იცვლიან და, ამასთან ერთად, ეროვნებასაც

მოქალაქეთა სწორედ ამ ჯგუფისთვის ოფიციალურმა სოხუმმა რამდენჯერმე ჰუმანიტარული “ფანჯრები” (სამიდან ხუთ დღემდე), გახსნა, რომელთა საშუალებითაც აფხაზეთის მცხოვრებლებს, რომლებიც მკურნალობდნენ საქართველოს კლინიკებში, უკან დაბრუნება შეეძლოთ.

ახლა გამონაკლისი პენსიონერებზეც გავრცელდა. ხალხის ტრანსპორტირება საზღვარზე UNHCR- ის ეგიდით ხორციელდება.

მოსაზრება თბილისიდან: აფხაზეთის ახალი ხელისუფლება გალის მოსახლეობაზე ზრუნავს

JAMnews, თბილისი

როგორც “რადიო თავისუფლების” ქართულ სამსახურს გალის რაიონის ერთ – ერთმა მცხოვრებმა უთხრა, საზღვრის გადაკვეთის მსურველ პენსიონერთა სიებს ადგილობრივი ხელისუფლების წარმომადგენლები წინასწარ ადგენენ.

გარდა ამისა, პენსიონერებს მხოლოდ ენგურის ხიდის გადაკვეთის უფლება აქვთ, რომლის ბოლოში მათ “ლიბერთი ბანკის” მობილური ოფისი ელოდება, რომელიც პენსიებს გასცემს. აფხაზური ხელისუფლება არ აძლევს პენსიონერებს უფლებას გზა საქართველოს ტერიტორიის სიღრმეში გააგრძელონ. 

”კარგია რო პანდემიის დროს გალელებს ყურადღებას მაინც აქცევენ. მაშინ როცა მთელ აფხაზეთში პანიკა და გაურკვევლობაა, ისინი გალელებზე მაინც ფიქრობენ. რასაც არ აკეთებს ცხინვალი”, – ასეთი კომენტარი გააკეთა აფხაზური ხელისუფლების გადაწყვეტილებაზე კონფლიქტოლოგმა, შერიგებისა და სამოქალაქო თანასწორობის საკითხებში ყოფილმა სახელმწიფო მინისტრმა პაატა ზაქარეიშვილმა JAMnews– თან საუბრისას.

ზაქარეიშვილის თქმით, ეს არ არის აფხაზეთის ახალი ხელისუფლების პირველი ნაბიჯი გალის მოსახლეობის მდგომარეობის გასაუმჯობესებლად – მანამდე მათ გააუქმეს უსამართლო გადასახადი მიწაზე და მოსახლეობას თხილის მოსავლის თავისუფლად გატანის საშუალება მისცეს.

”ვფიქრობ, ისინი ასეთ პოლიტიკას გააგრძელებენ,” – თქვა ზაქარეიშვილმა.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო