ყავის სმა კარანტინისას შინ და გარეთ - აფხაზეთი კორონავირუსის დღეებში
აფხაზეთი, 28 მარტიდან, საგანგებო მდგომარეობის რეჟიმში ცხოვრობს და ეს, ისევე, როგორც ყველგან, უპირველეს ყოვლისა, იზოლაციას გულისხმობს – სახლის დატოვება მხოლოდ განსაკუთრებული საჭიროების შემთხვევაში შეიძლება.
კორონავირუსით სამი ადამიანი დაინფიცირდა, მაგრამ მოქალაქეები განსაკუთრებით შეშინებული არ არიან და ბევრი მათგანი არ აპირებს სახლში ჯდომას. მაგრამ არიან ისეთებიც, რომლებმაც კარტისა და ჭადრაკის ონლაინტურნირები დაიწყეს და Zoom-ში უფასო სექცია გახსნეს. მუსიკოსებმა კორონავირუსისადმი მიძღვნილი პირველი აფხაზური სიმღერა ჩაწერეს (მოსმენა სტატიის ბოლოში შეგიძლიათ).
იმისათვის, რომ მოქალაქეებს იზოლაციის წესების დაცვა აიძულონ, ხელისუფლებამ 11 აპრილიდან ჯარიმები დააწესა – სამიდან 20 ათას რუბლამდე (25-დან 300 დოლარამდე).
ორ ადამიანზე მეტს არ შეუძლია პარკში ან სანაპიროზე გასვლა, თუკი ისინი ერთი ოჯახის წევრები არ არიან. ქუჩაში კონკრეტული მიზნის გარეშე ყოფნა არ შეიძლება. დაშვებულია მხოლოდ სამსახურში წასვლა, მაგრამ არაუმეტეს ერთი ადამიანის კომპანიისა.
ამასთან, თუ ვიმსჯელებთ იმით, რაც სოხუმის ქუჩებში ხდება, ხალხს არც ვირუსის ეშინია და არც ფინანსური სანქციების.
წახვიდე სასეირნოდ ან ეკლესიაში
დომინოს მოყვარულები დილიდან „ბრეხალოვკაში“ მაგიდებთან სხედან. სანაპიროზე კი კარანტინის დროს სამსახურიდან თავისუფალი მოქალაქეები სეირნობენ.
აფხაზეთში, აკრძალულია საკულტო ღონისძიებები. მაგრამ აქაც სრული დაუმორჩილებლობაა. ბზობას, 12 აპრილს, სოხუმის საკათედრო ტაძარში ხალხმრავლობა იყო და, ტრადიციის თანახმად, ერთ ჭიქასა და ერთ კოვზს იყენებდნენ ზიარებისთვის.
ამის მიუხედავად, კორონავირუსის წინააღმდეგ შექმნილ ოპერატიულ შტაბში დარწმუნებულები არიან, რომ აკრძალვას თავისი ძალა აქვს და დაეხმარათ, ყოველ შემთხვევაში, ჯერჯერობით მაინც, აფხაზეთში მასობრივი დაინფიცირების თავიდან არიდებაში.
„სატრანსპორტო ჩიხში ვართ. არ გვაქვს პორტები, აეროპორტები და რკინიგზის სადგურები. მოსახლეობის სიმჭიდროვე დაბალია, ამიტომაც, დაინფიცირების დონეც დაბალია. მაგრამ შემზღუდავი ზომები მუშაობს. ადამიანებმა შეხვედრისას გადაკოცნა შეწყვიტეს და იცავენ სოციალურ დისტანციას. მიუხედავად იმისა, რომ დარღვევების ფაქტები მრავლად არის, მოვახერხეთ დიდი რაოდენობის ხალხის დაყოფა“, – ამბობს ოპერატიული შტაბის წევრი, პარლამენტის დეპუტატი, ალხას ჯინჯოლია.
ყავის წრუპვა ონლაინ
მაგრამ არიან ისეთებიც, რომლებმაც საკუთარი ცხოვრება ონლაინრეჟიმზე გადააწყვეს და იზოლაციის პოპულარიზაციას ეწევიან.
ცნობილი თოჯინების ოსტატი, ასიდა ახუბა პირდაპირ ეთერებში, ყავის სმასთან ერთად, საუბრობს ცხოვრებაზე, ხელოვნებასა და სამშობლოს მომავალზე. ის თვითგანვითარებით არის დაკავებული.
„ინგლისურის შესწავლა დავიწყე, ვუყურებ მსოფლიოს სხვადასხვა წამყვანი თეატრის წარმოდგენებს, ვსწავლობ ანატომიას, ამასთან, ვკერავ დამცავ ნიღბებს და კიდევ, ვამზადებ გულსაბნევებს, რომელსაც კარანტინის დასრულების შემდეგ, მეგობრებს ვაჩუქებ“, – ჰყვება ასიდა.
აფხაზეთის ჭადრაკის ფედერაციის პრეზიდენტმა, კონსტანტინ ტუჟბამ ვებგვერდ chess.com-ზე ონლაინტურნირს გაუწია ორგანიზება. შემდეგ, იქვე დაარეგისტრირა კლუბი „აფხაზეთის ჭადრაკის ფედერაცია“. მას შეუერთდნენ მოჭადრაკეები აფხაზეთის ყველა ქალაქიდან.
ახლა ისინი ყოველდღიურად ამ მოედანზე ხვდებიან ერთმანეთს და გაცილებით ხშირად, ვიდრე კარანტინამდე.
აფხაზეთში დაიხურა არა მხოლოდ სკოლები, არამედ სპორტული სექციებიც. იმისათვის, რომ მისმა აღსაზრდელებმა ფორმა შეინარჩუნონ, მწვრთნელმა და აფხაზეთის ფუდოკან კარატეს ფედერაციის პრეზიდენტმა, სერგეი დემიანოვმა გადაწყვიტა, არ შეწყვიტოს ვარჯიშები.
ის საკუთარი ვარჯიშის ვიდეოჩანაწერებს აკეთებს და შემდეგ, აღსაზრდელებს აძლევს მასზე წვდომას.
სერგეიმ ასევე დაიწყო აფხაზეთში პირველი ონლაინტურნირი კატაში და საერთო ფიზიკურ მომზადებაში. ტურნირი WhatsApp-ის ჯგუფში მიმდინარეობს.
„სპორტსმენები საკუთარი შესრულებული კატის ვიდეოჩანაწერს აკეთებენ და ჯგუფში გზავნიან, – ჰყვება სერგეი, – მსაჯები კი, ხუთი ადამიანი, ნახულობენ ამას და შეფასებებს წერენ“.
ბავშვთა ქორეოგრაფიულ ანსამბლ „ამზაჩაში“ 70 ბავშვი ცეკვავს.
ისინი სპორტული სექციებისა და სკოლების მსგავსად, ჯერ კიდევ 19 მარტს გადავიდნენ საკარანტინო რეჟიმზე. სტუდიის ხელმძღვანელი, ოლგა დენისოვა დისტანციურ სწავლებაზე გადავიდა და ნულიდან გაიარა პროცესის მთელი სირთულე.
„მეცადინოებები პროგრამა Zoom-ით ტარდება. რა თქმა უნდა, პრობლემები არსებობს: ხან ხმა ჩამორჩება და ხან ვიდეო, ხანდახან საერთოდ გამოსახულება ქრება. მაგრამ ჩვენ ხომ საგანგებო მდგომარეობის პირობებში ვიმყოფებით“, – ამბობს ის.
თვითიზოლაციაში მყოფმა მუსიკოსმა და ხმის რეჟისორმა, აბზაგუ მარიხუბამ ფეისბუკზე აფხაზ შემსრულებლებთან ერთად მომზადებული ერთობლივი პროექტი გაუშვა. სლავიკ ამიჩბასთან ერთად, მან კორონავირუსისადმი მიძღვნილი პირველი აფხაზური სიმღერა ჩაწერა.
