უშუქობა. ამბები აფხაზეთიდან
აფხაზეთში ენერგოკრიზისია. ელექტროენერგიის დეფიციტის გამო, 15 ნოემბრიდან დენის გრაფიკი მოქმერდებს – შუქი დღეში რამდენიმე საათით ითიშება, სხვადასხვა ადგილებში სხვადასხვა დროს. აფხაზეთის მოსახლეობა ელექტროენერგიის დეფიციტის პირობებში ცხოვრებას ეჩვევა.
ასტანდა
ასტანდა ჯალაღონია ყოველდღე დილის 6 საათზე იღვიძებს. სანამ შუქი ჩაქრება, საუზმის მომზადება უნდა მოასწროს. 5 წლის ვაჟს ფაფას უმზადებს და მას სამ საბანში ახვევს. ექვსი თვის უმცროსი ბიჭისთვის კი მდუღარე წყალს თერმოსში იმარაგებს, რათა გაღვიძებულს ფაფა მოუმზადოს.
ბავშვები ჩვეულებრივ 8 საათზე იღვიძებენ, ზუსტად იმ დროს, როდესაც ელექტროენერგია ითიშება. 10:00 საათამდე შუქი არ არის, რადგან ენერგოკომპანია “ჩერნომორენერგოს” გრაფიკი ასეა შედგენილი. 10-ის შემდეგაც დენი არ მოდის, რადგან სადენებზე ყოველთვის რაღაც პრობლემებია ხოლმე.
”მთელი შაბათ–კვირა უშუქოდ გავატარეთ. აშკარა იყო, რომ ენერგეტიკოსები რაღაცას აკეთებდნენ, შუქი რამდენჯერმე აინთო, მაგრამ ისევ ჩაქრა”, – ჰყვება ასტანდა.
- მოსაზრება: აფხაზეთი უშუქოდ და ბიზნესი სახელმწიფოს ხარჯზე
- მოსაზრება: ვინ გადაიხდის აფხაზეთის ელექტროენერგიის საფასურს?
- ომისა და მშვიდობის ჰესი. ფილმი
ელეონორა
ასტანდას მეზობელი ელეონორა გილოიანი შუქის მოსვლას მორჩილად არ ელოდება. იგი “ჩერნომორენერგოსა” და სოხუმის ელექტროქსელებში იმ იმედით რეკავდა, რომ თუ ჩუმად არ იჯდება, პრობლემები უფრო სწრაფად აღმოიფხვრება. მორიგ ზარის დროს ელეონორას უთხრეს, რომ შუქის ჩართვა იმის გამო არ შეუძლიათ, რომ ქსელი უბრალოდ “ვერ ქაჩავს “, რადგან მეზობლად – ტყავის ყოფილ ქარხანაში, კრიპტოვალუტის მომპოვებელი “ფერმაა” გახსნილი.
“მაშინ გამორთეთ”, – გაჰყვიროდა გოგონა ტელეფონში, თუმცა პასუხად მიიღო: “რომ შეგვეძლოს, კი ბატონო”. ელეონორა გილოიანმა ამის შესახებ მეგობრებს მოუყვა და ინსტაგრამზე პოსტი გამოაქვეყნა.
”ვერ წარმოიდგენთ, ჩემს პოსტს რამდენი ადამიანი გამოეხმაურა, – ამბობს ის, – მას შემდეგ “მაინერების” მფლობელთა მისამართებსა და სახელებს მწერდნენ” (აფხაზეთში მიიჩნევენ, რომ ენერგოკრიზისის მთავარი მიზეზი “მაინერები”, ანუ კრიპტოვალუტის მომპოვებელი მოწყობილობებია).
ელეონორამ ყველა მონაცემი შეაგროვა და პოლიციას გადასცა. 24 ნოემბერს, ერთ-ერთი ასეთი მისამართზე სამართალდამცველები მივიდნენ. შედეგად, შინაგან საქმეთა სამინისტრომ, სახელმწიფო უსაფრთხოების სამსახურმა და “ჩერნომორენერგომ” სოხუმის ფიზიკისა და ტექნოლოგიის ინსტიტუტის შენობაში არსებულ კრიპტოფერმას დენი გამოურთეს.
დენისი
დენის სოლომკოს ოჯახმა ახალი მეურნეობის მშენებლობაში 2.5 მილიონი რუბლი (დაახლოებით 27 ათასი ევრო) ჩადო. მისი მშობლები მთელი ცხოვრება სოფლის მეურნეობით იყვნენ დაკავებულნი. 2020 წლის კორონავირუსის პანდემიის გამო გამოწვეულმა კრიზისმა დენისიც აიძულა მიწაზე მუშაობა დაეწყო. ყველაფერი კარგად მიდიოდა, მეურნეობა ვითარდებოდა. მაგრამ დაიწყო ახალი კრიზისი – ენერგეტიკული.
დღეში 6 საათით დენის გამორთვამ ფერმაში ტექნოლოგიური პროცესი ჩაშალა. ინკუბატორებში მწყერის 2300 კვერცხი გაფუჭდა.
დენისი ამბობს: „სინათლე მხოლოდ გრაფიკით რომ გამორთულიყო, ტრაგედია არ მოხდებოდა. მაგრამ დენის გათიშვების გამო ბევრი ავარია ხდებოდა, გრაფიკი ირღვეოდა, დენი არ იყო და ინკუბაციის პროცესი შეწყდა“.
დენისის თქმით, პირდაპირმა ზარალმა 23 ათასი რუბლი (255 ევრო) შეადგინა, ხოლო დაკარგული მოგება დაახლოებით 150 ათასი რუბლია (1700 ევრო).
როგორც ახალგაზრდა ფერმერი ამბობს, ეს ამბავი მათთვის გაკვეთილად იქცა.
”გენერატორი ადრე უნდა მეყიდა. ეს ხარჯი გადავდეთ და ფინანსები მეურნეობის აღჭურვილობისთვის მივმართეთ, – ამბობს დენისი, – ახლა მაინც ყიდვა მოგვიხდა, მაგრამ უკვე მას შემდეგ, რაც ზარალი ვნახეთ.
და ასე მხოლო ჩვენ არ ვართ, ყველა, ვინც წარმოებით, ვაჭრობით, დასაწყობებით არის დაკავებული, თუ მნიშვნელოვან ზარალს არ განიცდის, შემოსავლის უმეტეს ნაწილს მაინც კარგავს, რადგან შემოსავლის ნაწილი გენერატორებისთვის საწვავზე უნდა დაიხარჯოს. “
ეზოს შეკრებები
სოხუმის ახალი რაიონის ერთ – ერთ ეზოში დენის გამორთვები მეზობლების თავშეყრის მიზეზი გახდა. ყოველ საღამოს 5 საათზე, აგრბას ქუჩაზე მდებარე მაღალსართულიანი კორპუსის ცხოვრებლები ეზოში ჩადიან, სადაც მრავალი წლის წინ ერთობლივი ძალებით ფაცხა ააშენეს.
ყველას სახლიდან რაღაც გემრიელი მოაქვს. კაცები ცეცხლს ანთებენ, ქალები ყავას ადუღებენ. საუბრებსა და ჭორაობაში 2 საათი შეუმჩნევლად გადის.
”ორი საათის განმავლობაში ბავშვობას ვუბრუნდებით, რადგან ამ ეზოში ერთად გავიზარდეთ, – ამბობს სახლის ერთ-ერთი მცხოვრები, – ტელეფონებისა და სოციალური ქსელების გარეშე, ყველა სადარდებელს ვივიწყებთ და უბრალოდ ცეცხლთან ვსხდებით. ეს ბედნიერებას ჰგავს”.
