აფგან მუხთარლი: მითხრეს, რომ საქართველოს ხელისუფლებამ ჩემს გატაცებაში ქრთამი აიღო

აზერბაიჯანeლი ჟურნალისტი აფგან მუხთარლი, რომელიც საქართველოში 2017 წლის მაისში გაიტაცეს და ამის შემდეგ აზერბაიჯანულ ციხეში აღმონდა, 17 მარტს  მოულოდნელად გაათავისუფლეს. დამოუკიდებელ აზერბაიჯანულ გამოცემა მეიდანისთვის მიცემულ ინტერვიუში მუხთარლიმ მისი გატაცების გარემოებებზე ისაუბრა.

აფგან მუხთარლი თბილისში 2017 წლის 29 მაისს გაუჩინარდა. 2015 წლიდან იგი მეუღლესთან, ჟურნალისტ ლეილა მუსტაფაევასთან და ქალიშვილთან ერთად საქართველოში ცხოცრობდა, რომელსაც აზერბაიჯანის ხელისუფლების დევნის გამო თავი შეაფარა. გატაცების მეორე დღეს მუხთარლი ბაქოში აღმოჩნდა, სადაც მას  ბრალი საზღვრის უკანონო გადაკვეთაში, კონტრაბანდასა და პოლიციისთვის წინააღმდეგობის გაწევაში წაუყენეს.

თავად ჟურნალისტმა მაშინ თქვა, რომ იგი თბილისის ცენტრიდან გაიტაცეს. მას მოგვიანებით 6 წლით თავისუფლების აღკვეთა მიესაჯა.

17 მარტს მუხთარლი მოულოდნელად ციხიდან  გაათავისუფლეს და სასწრაფოდ გერმანიაში გაამგზავრეს. მას აზერბაიჯანში ნათესავებთან შეხვედრის უფლებაც არ მისცეს. თავად ჟურნალისტი ამბობს, რომ ხელისუფლებამ მას მხოლოდ სასჯელი  შეუცვალა და ციხის ნცვლად ქვეყნიდან გადასახლებით დასაჯა.

”აზერბაიჯანის ხელისუფლებაში  ოჯახური კორუფციის შესახებ ვწერდი, ვიძიებდი დატაცებებს სხვადასხვა უწყებებში, შეიარაღებულ ძალებში. საქართველოში საგამოძიებო ჟურნალისტიკით  ვიყავი დაკავებული, ვწერდი იმაზე, თუ როგორ აბანდებს აზერბაიჯანის ხელისუფლება აზერბაიჯანელი ხალხისგან მოპარულ ფულს საქართველოში.” – ამბობს მუხთარლი.

მისი თქმით, მისი სტატიები როგორც აზერბაიჯანულ, ისე ქართულ მხარეებს სერიოზულად აწუხებდა.

მისი თქმით, იგი ელოდა, რომ საქართველოს ხელისუფლება აზერბაიჯანისთვის მის გადაცემას შეეცდებოდა. მაგრამ ეგონა, რომ ეს სასამართლოს გზით მოხდებოდა.

ამასთან, მუხთარლის თქმით, აზერბაიჯანმა აშკარად ჩათვალა, რომ საქართველოში სასამართლო სისტემა ჯერ კიდევ არ იყო ბოლომდე მორჩილი ხელისუფლების  მიმართ და გადაწყვიტა სხვაგვარად ემოქმედა.

• აფგან მუხტარლი: მე ალიევის და ივანიშვილის ბიზნეს-ინტერესების მსხვერპლი ვარ

• მოსაზრება: ოლიგარქის რევანში

”ჩემთან შეხვედრისას რამდენიმე აზერბაიჯანელმა მაღალჩინოსანმა თქვა, რომ ქართულმა მხარემ ქრთამის სახით 3 მილიონ დოლარზე მეტი აიღო. სავარაუდოდ, ეს გაკეთდა (საქართველოს) ეროვნული უშიშროების სამინისტროს ყოფილი ხელმძღვანელობის მიერ.

ნებისმიერ შემთხვევაში, ეს აზერბაიჯანული სახელმწიფოს გაკეთებულია. ასეთ გადაწყვეტილებებს არა რომელიმე მინისტრი, არამედ თავად ილჰამ ალიევი იღებს.”

მისი თქმით, იგი 2017 წლის 29 მაისს კაფედან გავიდა და სახლში წავიდა. სახლამდე 50-60 მეტრში მას გზა მანქანამ გადაუკეტა. მას თავს სამი კაცი დაესხა.

“თავიდან წინააღმდეგობა გავუწიე მანქანაში ვერ ჩამსვეს. მაგრამ  შემდეგ დავინახე რომ ქართული კრიმინალური პოლიციის ფორმა ეცვათ და გადავწყვიტე, რომ ისინი პოლიციის განყოფილებაში წამიყვანდნენ, შემდეგ კი სასამართლოში.

ვინაიდან მე არც აზერბაიჯანში და არც საქართველოში დანაშაული არ ჩამიდენია, დარწმუნებული ვიყავი, რომ ქართული სასამართლო გამათავისუფლებდა. არ მოველოდი, რომ გამიტაცებდნენ და აზერბაიჯანს გადამცემდნენ. ასე რომ, მანქანაში ნებაყოფლობით ჩავუჯექი”.

საერთაშორისო უფლებადამცველი ორგანიზაციები აფგან მუხთარლის სინდისის პატიმრად მიიჩნევენ. 2017 წლის ივნისში ევროპარლამენტმა აზერბაიჯანის ხელისუფლებას მოუწოდა მუხთარლი დაუყოვნებლივ გაათავისუფლოს და ყველა ბრალდება მოუხსნას.