აბორტის შესახებ ბრძანებაში ცვლილებები შევიდა: ახალი ბრძანების თანახმად, აბორტის მოსაფიქრებლად გათვალისწინებული 5-დღიანი ვადის დარღვევის შემთხვევაში, ექიმის პროფესიული პასუხისმგებლობის საკითხი დადგება.
რედაქტირდება მედიკამენტური აბორტის შესახებ პუნქტებიც:
● 7 კვირამდე ვადის ორსულობისას მედიკამენტური აბორტი უნდა განხორციელდეს პირველი დონის ანტენატალურ დაწესებულებაში.
● აბორტი უნდა ჩატარდეს სამეანო-გინეკოლოგიური საქმიანობის განხორციელების უფლების მქონე სამედიცინო დაწესებულებაში სერტიფიცირებული ექიმ მეან-გინეკოლოგის მიერ.
● რაც შეეხება 12 კვირაზე მეტი ხანგრძლივობის ორსულობის ხელოვნურ შეწყვეტას, ნებისმიერი მეთოდით სამედიცინო ჩარევა უნდა განხორციელდეს მხოლოდ სამეანო-გინეკოლოგიური საქმიანობის განხორციელების უფლების მქონე სტაციონარული ტიპის სამედიცინო დაწესებულებაში.
● ცვლილებებს ემატება პუნქტი, რომ აბორტის წინა კონსულტაციის და განსაზღვრული 5-დღიანი მოსაფიქრებელი ვადის ამოწურვის შემდეგ პროცედურამდე ჩატარებული რადიოლოგიური კვლევის შედეგები უნდა ჩაიწეროს და სურათი უნდა განთავსდეს პაციენტის სამედიცინო დოკუმენტაციაში.
● 2024 წლის პირველი იანვრიდან სავალდებულო გახდება, რომ აბორტისწინა კონსულტაცია ჩატარდეს ექიმი მეან-გინეკოლოგის, ასევე, სოციალური მუშაკისა და ფსიქოლოგის მიერ კონფიდენციალურ პირობებში სპეციალურად ამ მიზნისათვის გამოყოფილ ექიმის საკონსულტაციო ოთახში.
ოფიციალური ინფორმაციით, მხოლოდ 2018 წელს აბორტი 86 არასრულწლოვანს გაუკეთდა. ფაქტების ნახევარი თბილისში დაფიქსირდა. 2019 წელს კი 18 წლამდე პირთათვის სამედიცინო დაწესებულებებში აბორტის 38 შემთხვევაა რეგისტრირებული.
ორსულობის ხელოვნურად შეწყვეტის ყველაზე ხშირი შემთხვევა 25-დან 34 წლამდე ასაკის ქალებში ფიქსირდება.
რაც შეეხება რეგიონებს, აბორტის ყველაზე მეტი რაოდენობა (თბილისის შემდეგ) აჭარაში ფიქსირდება.
საქართველოს კონსტიტუციის მე-12 მუხლი: “ყველას აქვს საკუთარი პიროვნების თავისუფალი განვითარების უფლება.”
საქართველოს კონსტიტუციის მე-15 მუხლის პირველი პუნქტი: “ადამიანის პირადი და ოჯახური ცხოვრება ხელშეუხებელია. ამ უფლების შეზღუდვა დასაშვებია მხოლოდ კანონის შესაბამისად, დემოკრატიულ საზოგადოებაში აუცილებელი სახელმწიფო ან საზოგადოებრივი უსაფრთხოების უზრუნველყოფის ან სხვათა უფლებების დაცვის მიზნით.“
