ხმაურიანი დაკავებები ბაქოში: რა ღირს პაციენტის კოვიდკლინიკაში განთავსება?
აზერბაიჯანის გენერალური პროკურატურის მიერ გავრცელებული ინფორმაციით, დაკავებულები არიან ბაქოში, კორონავირუსის სამკურნალო ორი სპეციალიზებული კლინიკის ხელმძღვანელი პირები. ისინი ამ დაწესებულებებში მოქალაქეების განთავსების სანაცვლოდ ქრთამს იღებდნენ. ინფიცირებულებისა და მათი ახლობლების განცხადებით, ეს ფაქტები უკვე დიდი ხანია ყველასთვის ცნობილი იყო.
რა მოხდა?
აზერბაიჯანის გენერალური პროკურატურა ორი განცხადებით გამოვიდა, რომლის თანახმადაც, კორუფციაში ბრალდებული და დაკავებული არიან სამედიცინო დაწესებულება Yeni klinika-ისა („ახალი კლინიკა“) და საგანგებო სიტუაციების სამინისტროს სამედიცინო ცენტრის მოდულური საავადმყოფოს ხელმძღვანელები (ხალხში ამ დაწესებულებას „ზიხის მოდულურ საავადმყოფოს“ უწოდებენ – JAMnews).
„გამოვლინდა სერიოზული ეჭვები Yeni Klinika-ს დირექტორთან, ფარვიზ აბასოვსა და სამედიცინო დაწესებულების სხვა პასუხისმგებელ პირებთან დაკავშირებით, ავადმყოფების კლინიკაში განთავსების სანაცვლოდ, რამდენიმე პირის მხრიდან 3000-3500 მანათის (დაახლოებით, 1765-2000 დოლარის) ოდენობის ქრთამის აღების შესახებ. ეს თანხა საბოლოოდ მათ შორის ნაწილდებოდა და მიმართული იყო მათი მოთხოვნების დასაკმაყოფილებლად“, – ნათქვამია გენერალური პროკურატურის განცხადებაში.
სამართალდამცავი უწყების მეორე განცხადებაში აღნიშნულია, რომ გენერალურ პროკურატურასთან არსებულ კორუფციასთან ბრძოლის სამსახურის მთავარ სამმართველოში შესული ინფორმაციის თანახმად, გამოვლინდა სერიოზული ეჭვები საგანგებო სიტუაციების სამინისტროს სამედიცინო ცენტრის მოდულური საავადმყოფოს მთავარ ექიმთან, იმრან აგაევსა და მის თანამზრახველებთან დაკავშირებით. აღნიშნული ინფორმაციის თანახმად, ეს პირები ავადმყოფებისა და მათი ახლობლებისგან ქრთამს იღებდნენ ჰოსპიტლის VIP-კორპუსში განთავსების სანაცვლოდ.
დაკავებულებს კორუფციული ქმედებების გამო, აზერბაიჯანის სისხლის სამართლის კოდექსის რამდენიმე მუხლით წარუდგინეს ბრალი და სასამართლოს გადაწყვეტილებით, გამოძიების მიმდინარეობისას პატიმრობა შეეფარდათ.
რა კლინიკებზეა საუბარი?
Yeni klinika, რომელიც ბაქოს ცენტრშია განთავსებული, 2020 წლის 28 მარტს, აზერბაიჯანის პრეზიდენტის, ილჰამ ალიევის მონაწილეობით გაიხსნა. იმ პერიოდში, ქვეყანაში, კორონავირუსით ინფიცირებულთა რიცხვის პირველი ზრდა შეინიშნებოდა. ეს კლინიკა COVID-19-ით ინფიცირებულთა სამკურნალო პირველი სპეციალიზებული სამედიცინო დაწესებულება გახდა.
საავადმყოფოში 575 საწოლი ადგილია. აქ არის ქირურგიის, თერაპიის, სასწრაფო დახმარების, გულ-სისხლძარღვთა ქირურგიის, ნეიროქირურგიის, ჰემოდიალიზის განყოფილებები, პოლიკლინიკა და სხვა. კლინიკაში, 1500-ზე მეტი ექიმი და სხვა სამედიცინო პერსონალია დასაქმებული.
2020 წლის 6 ივლისს კი, ბაქოს გარეუბანში, ზიხის დასახლებაში, გაიხსნა საგანგებო სიტუაციების სამინისტროს მოდულური საავადმყოფო. ეს სამედიცინო დაწესებულება 10 კორპუსისგან შედგება და აქ ერთდროულად კორონავირუსით ინფიცირებული 800 პაციენტის მკურნალობაა შესაძლებელი.
რა ღირს პაციენტის კორონავირუსის საავადმყოფოში განთავსება?
JAMnews-ის კორესპონდენტი შეეცადა გაერკვია, რა ღირს დასახელებულ სამედიცინო დაწესებულებებში პაციენტის განთავსება.
ადგილობრივი მცხოვრების, იდრისის თქმით, გასული წლის დეკემბერში, 300 მანათად (დაახლოებით, 176 დოლარად) მოახერხა დედის საგანგებო სიტუაციების სამინისტროს მოდულურ საავადმყოფოში განთავსება.
„იმ დროს, ქვეყანაში, კორონავირუსის მეორე ტალღა მძვინვარებდა. ძალიან ბევრი ავადმყოფი იყო. გავიგე, რომ ავადმყოფის „ზიხის მოდულურ ჰოსპიტალში“ განთავსებისთვის, ქრთამის მიცემას ითხოვდნენ, 1200 მანათის (დაახლოებით, 700 დოლარის) ოდენობით.
იქ ნაცნობი გამოვძებნე, რომლის გავლითაც ეს საკითხი 300 მანათად (დაახლოებით 176 დოლარად) მოვაგვარე. მაგრამ კიდევ სამი დღე მომიწია ლოდინი, სანამ ჰოსპიტალში დედაჩემისთვის ადგილი გამოჩნდა“, – აღნიშნა მან JAMnews-თან საუბარში.
მედდა, რომელმაც ინკოგნიტოდ დარჩენა ისურვა, Yeni Klinika-ს ფასებზე მოგვიყვა:
„სიმართლე გითხრათ, გამიკვირდა ოფიციალურ განცხადებაში დასახელებული ციფრების გაგება. იქ მითითებული იყო 3000-3500 მანათი (დაახლოებით, $1 765-2 000). იმიტომ, რომ ავადმყოფის Yeni Klinika-ში განთავსება გაცილებით ძვირი ღირს, დაახლოებით, დასახელებულ თანხაზე 3-4-ჯერ მეტი. მაგრამ თუკი იქ კარგი ნაცნობი გყავს, შეიძლება 3000 მანათადაც მოაგვარო ეს საკითხი“.
კომენტარები
კორონავირუსის საავადმყოფოების ხელმძღვანელების დაკავების საკითხი ფართო განხილვის თემა გახდა სოციალური ქსელების აზერბაიჯანულ სეგმენტში. აი, რამდენიმე სახასიათო კომენტარი:
„საავადმყოფოების 90 პროცენტი ასე მუშაობს. და ზევით ეს არ იციან? იმისთვის, რომ მთავარი ექიმი გახდე, უნდა გადაიხადო 100 ათასი მანათი (დაახლოებით, 59 000 დოლარი), ამიტომაც უწევთ მათ შემდეგ ამ ფულის ავადმყოფებისგან ამოღება“.
„ამით ღარიბები ზარალდებიან. იმათ მხარეს, ვინც არ იხდის, არც კი იყურებიან. ადამიანები იღუპებიან“.
„ხანდახან ვფიქრობ, რომ ახალგაზრდა კადრები შედარებით ასაკოვნებისგან განსხვავებით ქრთამს არ აიღებენ, იმიტომ, რომ კარიერა აქვთ გასაკეთებელი, არის სხვა ნიუანსებიც. მაგრამ მექრთამეობა ისეთი უბედურება და ისეთი ვირუსია, რომ ასაკს ყურადღებას არ აქცევს. ამ პანდემიის პერიოდში მაინც შეებრალებინათ ავადმყოფები“.
