5 დღის წინ დაკარგული თამარ ბაჩალიაშვილი გარდაცვლილი იპოვეს

23 წლის თამარ ბაჩალიაშვილი, რომელიც 17 ივლისს გაუჩინარდა, დაკარგვიდან მეხუთე დღეს, თეთრიწყაროს ტყეში, საკუთარ მანქანაში გარდაცვლილი იპოვეს. 

სამართალდამცავები მას 5 დღის განმავლობაში ეძებდნენ. ძებნის პროცესში ჩართული იყო ათობით პოლიციელი. თუმცა, თეთრიწყაროს ტყეში, საავტომობილო გზიდან ასიოდე მეტრში, იმ ადგილზე, სადაც წინა დღეებშიც მიმდინარეობდა სამძებრო სამუშაოები, მანქანას, სადაც ცხედარი იყო, მწყემსმა მიაგნო. 

თამარ ბაჩალიაშვილის პოვნას წინ უსწრებდა ოჯახის წევრების საპროტესტო აქცია. 21 ივნისის გვიან საღამოს, მათ ფონიჭალაში საავტომობილო გზა გადაკეტეს მოთხოვნით, რომ სამართალდამცავებს დაკარგული ოპერატიულად მოეძებნათ.

რა ვიცით თამარ ბაჩალიაშვილის გარდაცვალების შესახებ

თამარ ბაჩალიაშვილის ოჯახის ადვოკატი, მიხეილ რამიშვილი ცხედრის ნახვის შემდეგ ამბობს, რომ თამარ ბაჩალიაშვილი სავარაუდოდ, რამდენიმე დღის გარდაცვლილია. 

“ისეთ მდგომარეობაშია, ნამდვილად რამდენიმე დღის გარდაცვლილია”, – აცხადებს ის. 

ადვოკატის თქმით, ცხედარი მანქანის უკანა სავარძელზე, მწოლიარე მდგომარეობაში იყო. 

სიკვდილის ერთ-ერთ შესაძლო ვერსიად მედიკამენტოზური ინტოქსიკაცია განიხილება, რადგან გარდაცვლილის მანქანაში მედიკამენტები აღმოაჩინეს. თუმცა, ოჯახის ადვოკატი არ აკონკრეტებს, კონკრეტულად რომელ მედიკამენტებზეა საუბარი.

როგორ დაიკარგა 23 წლის ქალი

როგორც ოჯახის წევრები ყვებიან, თამარი სახლიდან შაბათს, 17 ივლისს, დილით იმ დროს გავიდა, როცა სახლში ოჯახის სხვა არც ერთი წევრი არ იყო. თამარს დედამ შუადღისას, 2 საათზე დაურეკა. ამ დროს მისი ტელეფონი უკვე გამორთული იყო. სახლში დაბრუნებულებს არ დახვდათ არც მისი მანქანა. დღის ბოლოს მათ თამარის დაკარგვის შესახებ პოლიციას შეატყობინეს. 

თამარ ბაჩალიაშვილი სახლიდან ჰიუნდაის მარკის ნაცრისფერი მანქანით წავიდა. საავტომობილო გზებზე დაყენებულმა კამერებმა ბოლოს მისი მანქანა სოფელ ხაიშთან (თეთრიწყაროს მუნიციპალიტეტი) დააფიქსირეს. სწორედ აქ დაიკარგა მისი კვალი. 

ოჯახის წევრები ამბობენ, რომ მათ თეთრიწყაროში ნათესავი და ახლობელი არავინ ჰყავთ და არ იციან, თეთრიწყაროში წასვლა თამარმა რატომ გადაწყვიტა. 

რა ვიცით თამარ ბაჩალიაშვილის შესახებ

ის პროგრამისტი იყო. არის თსუ-ს ინფორმატიკის ფრანგულ-ქართული სკოლის სტუდენტი. მან, როგორც ერთ-ერთმა წარჩინებულმა სტუდენტმა, Erasmus+ სტიპენდია მოიპოვა და გაცვლითი პროგრამის ფარგლებში, ორი სემესტრის განმავლობაში ინფორმატიკას სწავლობდა საფრანგეთშიც, ქალაქ რენის გამოყენებითი მეცნიერების ეროვნულ ინსტიტუტში.

მუშაობდა შპს ზეგ-ში. ამ კომპანიის მიერ 22 ივლისს გავრცელებული  განცხადებიდან ირკვევა, რომ შპს ზეგ IT (პროგრამული უზრუნველყოფა) კომპანიაა, 5 წლის ისტორიით და ის ძირითადად  სხვა ქვეყნიდან შემოსულ დაკვეთებზე მუშაობს. 

• გიორგი შაქარაშვილის საქმე: 17 დაკავებული და არცერთი ბრალდებული. რა არის ცნობილი ამ დროისთვის

როგორც ოჯახი ამბობს, მას მეორე სამსახურიც ჰქონდა. თუმცა, ამ სამსახურის შესახებ მათ ინფორმაცია თითქმის არ აქვთ. 

რას უკავშირებენ თამარის გარდაცვალებას?

მისი გარდაცვალების ზუსტ მიზეზებზე დეტალური ინფორმაცია არც ოჯახს აქვს და არც გამოძიებას. ადვოკატი, მიხეილ რამიშვილი ამბობს, რომ ოჯახი გამოძიებას უნდობლობას უცხადებს და საქმეში დამოუკიდებელი ექსპერტი, მარიამ ჯიშკარიანი ჩაერთვება. 

ოჯახს თვითმკვლელობის ვერსიის არ სჯერა. თამუნა ბაჩალიაშვილის მამა მედიასთან ამბობს, რომ დარწმუნებულია, მისი შვილი სახლიდან მოტყუებით გაიყვანეს და მოკლეს. 

ის თამარის გარდაცვალებას მის საქმიანობას უკავშირებს. მისი თქმით, სამსახურიდან თამარი ხშირად გაღიზიანებული ბრუნდებოდა.  რამდენჯერმე სახლში ის ნამტირალევიც დაბრუნდა. გაუჩინარებამდე 2 დღით ადრე კი, მან სამსახური დატოვა. 

დედა ამბობს, რომ თამარი გულჩათხრობილი და სევდიანი იყო. სახლიდან იშვიათად გადიოდა და სამსახურის საქმესაც ძირითადად, სახლში აკეთებდა. 

რას ამბობს და აკეთებს გამოძიება

თამარის გაუჩინარების შემდეგ პოლიციამ მისი საცხოვრებელი სახლიდან მისი პირადი კომპიუტერი წაიღო. როგორც 21 ივლისს გამართულ აქციაზე მისულმა გამომძიებელმა ოჯახს უთხრა, თამარის პირად კომპიუტერს რთული პაროლი ედო და სპეციალისტები მის “გატეხვას” ვერ ახერხებდნენ.

თამარ ბაჩალიაშვილის მამამ კი ჟურნალისტებს უთხრა, რომ შსს-ს ერთ-ერთმა თანამშრომელმა მას დაურეკა და უთხრა, რომ კომპიუტერი გახსნეს, ნახეს თამარის ინფორმაცია და გაარკვიეს. რომ ის “ძალიან დიდი პრობლემების წინაშე იდგა”. თუმცა, რა პრობლემების წინ იდგა თამარი, ეს შსს-ს თანამშრომელს არ დაუკონკრეტებია. 

გამოძიება დაიწყო კომპანია “ზეგის” ოფისშიც, გამრეკელის ქუჩაზე – ამჟამად სამართალდამცავები თანამშრომლების კომპიუტერებს სწავლობენ. ჯერჯერობით უცნობია, მიაკვლიეს თუ არა მათ რაიმე მიმოწერას. 

გამოძიება გაუჩინარების შემდეგ სისხლის სამართლის კოდექსის 143-ე მუხლით დაიწყო, რაც თავისუფლების უკანონოდ აღკვეთას გულისხმობს. რა მუხლით გააგრძელებს გამოძიება მუშაობას უკვე გარდაცვლილის პოვნის შემდეგ, ჯერ უცნობია.