მოსკოვი: ჩვენს მოთმინებასაც საზღვარი აქვს

რუსეთის საგარეო საქმეთა მინისტრის მოადგილე, გრიგორი კარასინი საქართველოში ანტირუსული რიტორიკის გაძლიერებაზე ლაპარაკობს.“ ორ ქვეყანას შორის ურთიერთობა ან უნდა გავაუმჯობესოთ, ან კონფრონტაციას დავუბრუნდეთ,“_ განუცხადა კარასინმა ქართველ ჟურნალისტებს პრაღაში საქართველოს პრემიერ-მინისტრის სპეციალურ წარმომადგენლთან ზურაბ აბაშიძესთან შეხვედრის წინ.

‘საქართველოს თავდაცვის მინისტრმა თინათინ ხიდაშელმა ცივილიზებულ მსოფლიოს რუსული საფრთხის წინააღმდეგ გაერთიანებისკენ მოუწოდა. ნორმალურ საზოგადოებაში ასეთ განცხადებებს არ პატიობენ.თავს ვიკავებთ, მაგრამ ჩვენს მოთმინებასაც აქვს საზღვარი. ან კონფრონტაციას უნდა დავუბრუნდეთ, ან ურთიერთპატივისცემაზე დაფუძნებული დიალოგი განვაგრძოთ’, _აღნიშნავს კარასინი.

‘დღეს მთავარი საფრთხეა საქართველოში მოახლოებული საპარლამენტო არჩევნები და აშკარად  მომატებული ანტირუსული  პროვოკაციული რიტორიკა, რომელიც საზოგადო მოღვაწეებისგან საერთაშორისო ასპარეზზე გაისმის; თუმცა განსაკუთრებით გულდასაწყვეტია, რომ ასეთი რიტორიკა ოფიციალური პირებისგან, პოლიტიკოსებისგან, მინისტრებისგან და პრეზიდენტისგანაც კი გვესმის.ბუნებრივია, ამას ყურადღებას ვაქცევთ, ყველაფერს არ ვპასუხობთ,მაგრამ ჩვენთვის დასკვნები გამოგვაქვს.ახლა ასეთი სიტუაციაა:ან კონფრონტაციას უნდა დავუბრუნდეთ და ის თემები ვეძიოთ,რაც კვლავ წაგვაჩხუბებს, ან ნორმალური,  პატივისცემაზე დაფუძნებული ურთიერთობები დავამყაროთ,_ განაცხადა კარასინმა.

რუსეთის საგარეო საქმეთა მინისტრის მოადგილემ ამ ეტაპზე გამორიცხა საქართველოს და რუსეთის პირველი პირების შეხვედრის შესაძლობლობა,რომელზეც მანამდე მსჯელობდნენ.მისი თქმით,ასეთი შეხვედრა წარმოუდგენელია იმ ვითარებაში, როდესაც ქვეყნის ოფიციალური პირები ანტირუსულ განცხადებებს აკეთებენ.
„როგორ შეიძლება ორი სახელმწიფოს პრეზიდენტების შეხვედრაზე ლაპარაკი, თუკი ქართველი პოლიტიკოსების უმეტესობა რუსეთს ყველა მომაკვდინებელ ცოდვაში ადანაშაულებს. უბრალოდ სასაცილოა, ამ სიტუაციაში ორი სახელმწიფოს ლიდერების შეხვედრაზე ვისაუბროთ. 

ამგვარი შეხვედრები უნდა მომზადდეს. ის ვერ შედგება საქართველოს მხრიდან ასეთ დაძაბულ ვითარებაში“.

კარასინმა ასევე განაცხადა,რომ რუსეთის ფედერაციის გადაწყვეტილებით, გაიზრდება იმ ადამიანების რიცხვი, ვისაც რუსეთში საქართველოს მოქალაქეების მიწვევა შეეძლება; მაგარამ უვიზო მიმოსვლაზე ლაპარაკი ჯერ ნაადრევია.

‘საქართველომ რუსეთის მოქალაქეებისთვის სავიზო რეჟიმი გააუქმა _ ეს მისი სუვერენული უფლებაა; ჩვენ იგივეს ვერ გავაკეთებთ მთელი რიგი მოსაზრებების გამო,მათ შორის _ უსაფრთხოების მიზნითაც; ამისკენ უნდა მივისწრაფვოდეთ,თუმცა ამჯერად ამაზე ლაპარიც კი შეუძლებელია’, _ თქვა კარასინმა.

თბილისში რუსეთის საგარეო საქმეთა მინისტრის განცხადებას „სრულიად არადიპლომატიური“ და „აგრესიული“  უწოდეს, ასევე „ქვეყნის საშინაო საქმეებში ჩარევის მცდელობად“ შეაფასეს.სწორედ ასეთი კომენტარები გააკეთეს საქართველოს პარლამენტის დეპუტატებმა.

პრემიერმინსტრ გიორგი კვირიკაშვილს მიაჩნია,რომ რუსეთმა მეტი ყურადღება საკითხისადმი საკუთარ დამოკიდებულებას უნდა მიაქციოს.

„საქართველოში არსებული განწყობების შესახებ საუბრისას, რუსმა პოლიტიკოსებმა საკუთარ მიდგომებს უნდა მიაქციონ ყურადღება. საქართველოს ტერიტორიული მთლიანობისა და სუვერენიტეტის ხელშეუხებლობა განაპირობებს ურთიერთობების სრულ ნორმალიზებას. ჩვენ მაქსიმალურად უნდა შევეცადოთ,თავიდან ავიცილოთ ესკალაცია,თუმცა,რასაკვირველი _ არა ჩვენი საგარეო ვექტორის და არა ჩვენი ტერიტორიული მთლიანობის ხარჯზე. ამ მხრივ, ნებისმიერი კომპრომისი გამორიცხულია.მხოლოდ ამის გათვალისწინებით იქნება შესაძლებელი პრობლემების მოგვარებაზე საუბარი’, _ განაცხადა საქართველოს პრემიერ მინისტრმა გიორგი კვირიკაშვილმა.

დღევანდელი ვითარებით, რუსეთის მოქალაქეებს საქართველოში უვიზოდ მოგზაურობა შეუძლიათ. საქართველოს მოქალაქეებს კი რუსეთის ფედერაციაში გასამგზავრებლად ვიზის მიღება ესაჭიროებათ.

• 2015 წლის დეკემბერში რუსეთის საგარეო საქმეთა სამინისტრომ განაცხადა, რომ 23 დეკემბრიდან რუსეთის ფედერაცია საქართველოს მოქალაქეებისთვის სავიზო რეჟიმს ამარტივებს და მომავალში ორმხრივი უვიზო რეჟიმის შესაძლებლობას არ გამორიცხავს.
• საქართველომ რუსეთის ფედერაციასთან დიპლომატიური ურთიერთობები 2008 წელს აფხაზეთისა და სამხრეთ ოსეთის დამოუკიდებლობის აღიარების შემდეგ გაწყვიტა. საქართველოს ახალი ხელისუფლების წარმომადგენლებმა კი, რომლებიც ქვეყნის სათავეში 2012 წლის არჩევნების შედეგად მოვიდნენ, რუსეთთან ურთიერთობების დარეგულირება მთავარ საგარეო პრიორიტეტად დაასახელეს.
• ამ დროისთვის რუსეთსა და საქართველოს შორის დიალოგი ჟენევის მოლაპარაკებების ფორმატში მიმდინარეობს; ასევე  _  პრაღაში რეგულარულად ტარდება აბაშიძე–კარასინის შეხვედრები,რომელთა ფორმატიც არ ითვალისწინებს პოლიტიკური საკითხების გადაწყვეტას. შეხვედრებზე საუბარი კონკრეტულ სავაჭრო საკითხებს, კულტურულ-ჰუმანიტარულ და ეკონომიკურ ურთიერთობებს ეხება. ბოლო შეხვედრა პრაღაში გასული წლის ნოემბერში შედგა.