Amnesty International-მა დემონსტრანტებზე მოძალადე პოლიციელების დასჯის მოთხოვნით კამპანია დაიწყო
Amnesty International დემონსტრანტებზე
საერთაშორისო უფლებადამცველმა ორგანიზაცია Amnesty International-მა გლობალური კამპანია დაიწყო, რომლითაც საქართველოს ხელისუფლებას მოუწოდებს, მომიტინგეების წინააღმდეგ ძალადობაში დამნაშავე პირების პასუხისგებაში მიცემა უზრუნველყოს.
ორგანიზაცია აღნიშნავს, რომ ომბუდსმენის, ლევან იოსელიანის აპარატის მონაცემებით, წამებისა და სასტიკი მოპყრობის 240 შემთხვევა აღირიცხა, თუმცა რეალური რიცხვი, სავარაუდოდ, უფრო მაღალია. განცხადების თანახმად, ის, რომ ძალადობაში მონაწილე პოლიციელები პასუხისგებაში არ მიცემულან, დაუსჯელობას ახალისებს და საქართველოს კონსტიტუციასა და საერთაშორისო ვალდებულებებს არღვევს.
Amnesty International-ის აღმოსავლეთ ევროპისა და ცენტრალური აზიის დირექტორის მოადგილის, დენის კრივოშეევის განცხადებით, საქართველოს ხელისუფლებამ უნდა დაასრულოს მომიტინგეების დაშლისა და ცემის, მათ მიმართ სისხლის სამართლის შერჩევითი გამოყენების პრაქტიკა.
რას ამბობს Amnesty International
“საქართველოს მოსახლეობა რეპრესიულ კანონებსა და მთავრობის მხრიდან ევროკავშირში გაწევრიანების პროცესის შეჩერებას უწყვეტად აპროტესტებს. ხელისუფლება ამ პროტესტებს ძალადობრივად ახშობს, არის ცნობები ასობით დემონსტრანტის წამებისა და მათდამი არასათანადო მოპყრობის შესახებ. საქართველოს მთავრობამ ეს ადამიანის უფლებების დარღვევები უნდა გამოიძიოს, პოლიციელებს კი მათი ქმედებებისთვის პასუხი უნდა აგებინოს და სამომავლო დარღვევები უნდა აღმოფხვრას.
როდესაც გლობალურ მედიაში ქართული პროტესტების გაშუქება შეწყდა, ხელისუფლებამ აქციის მონაწილეების მკაცრი ზომებით დარბევა გააძლიერეს, არაპროპორციულ ძალას, გადაჭარბებულ ბრალდებებს, წამებასა და სხვა სახის არასათანადო მოპყრობასა და გენდერული ნიშნით ძალადობას მიმართეს. მართალია, სახალხო დამცველის აპარატმა წამებისა და არასათანადო მოპყრობის დაახლოებით 240 შემთხვევა აღრიცხა, რომელთაგან 85-ს მსხვერპლის სტატუსი ოფიციალურად მიენიჭა, რიცხვები, სავარაუდოდ, უფრო მაღალია. ქალი დემონსტრანტები, რომლებიც სახელმწიფო რეპრესიას წინააღმდეგობას უწევენ, გამბედაობის სიმბოლოდ იქცნენ, თუმცა ასევე დამცირების, სასტიკი მოპყრობისა და ფსიქოლოგიური ძალადობის სამიზნეს წარმოადგენენ, მათ შორის სამართალდამცავების მხრიდანაც. მიუხედავად ამისა, დღემდე არცერთი პოლიციელი არ დასჯილა.
ის, რომ ამ დარღვევებისთვის სამართალდამცავებს პასუხი არ უგიათ, დაუსჯელობას ახალისებს და საქართველოს კონსტიტუციასა და მის საერთაშორისო ვალდებულებებს არღვევს. ქართველი ხალხი სხვადასხვა საშუალებებს იყენებენ იმისთვის, რომ ხელისუფლება იმოქმედოს. საერთაშორისო საზოგადოება სოლიდარობით გვერდით უნდა დაუდგეს და პროტესტის უფლების დაცვაში დაეხმაროს!” – წერია განცხადებაში.
საქართველოში საპროტესტო ტალღა აგორდა 2024 წლის 28 ნოემბერს, პრემიერმინისტრის ირაკლი კობახიძის განცხადების შემდეგ, რომ ქვეყანა აჩერებს ევროკავშირთან მოლაპარაკებების გახსნას. საქართველოს ქალაქებში დაიწყო მასშტაბური საპროტესტო აქციები. პარალელურად, გაჩნდა დაუმორჩილებლობისა და პროტესტის სხვა მცირე კერებიც.
დაკავებულთა უმეტესობა ნაცემია. საიას ინფორმაციით, ნაცემია 319 დემონსტრანტი, მათ შორის, ბევრს სამედიცინო დახმარება და ქირურგიული ჩარევაც კი დასჭირდა, ერთი ადამიანს კი გადაუდებელი რეანიმაციული ღონისძიებები. დემონსტრანტებზე ძალადობის გამო ამ დროისთვის არც ერთ სამართალდამცველზე საქმე აღძრული არ არის.
მთავარი დაზიანებები ადამიანებს მიყენებული აქვთ არა წყლის ჭავლით და სხვა სპეცტექნიკით, არამედ სპეცრაზმელების მიერ არიან ნაცემები. უმეტესობას თავის ტვინის შერყევა აქვს. უმეტესად აღინიშნება სახის ძვლების, ცხვირის, თვალ-ბუდის მოტეხილობები და მრავლობითი დაჟეჟილობები. სამართალდამცავთა მხრიდან ძალადობის შესახებ ჰყვებიან თავად დაკავებულები და ის ადვოკატებიც, რომლებიც უსასყიდლოდ ეხმარებიან დაკავებულებს.
პროტესტის დაწყებიდან პირველი ორი დღის განმავლობაში სამართალდამცავები სასტიკად უსწორდებოდნენ ჟურნალისტებს, რომლებიც აქციას აშუქებდნენ. აქციების დაწყების დღიდან ნაცემი და დაშავებულია 70-ზე მეტი ჟურნალისტი. მათ ნაწილ დასჭირდა სერიოზული სამედიცინო ჩარევა. დაზარალებული ჟურნალისტების მონაყოლიდან და ასევე ადგილზე გადაღებული ვიდეოკადრებიდან ირკვევა, რომ სამართალდამცავები მათზე მიზანმიმართულად ნადირობდნენ.
