საქართველოში საჯარო სამსახურებიდან უკვე 800-ზე მეტი ადამიანი გაათავისუფლეს
საჯარო სამსახურები საქართველოში
საჯარო მოსამსახურეთა დამოუკიდებელი პროფესიული კავშირის, “კონსტიტუციის 78-ე მუხლის” ინფორმაციით, საჯარო სამსახურებიდან უკვე 800-ზე მეტი ადამიანი გაათავისუფლეს. მათივე ცნობით, მხოლოდ საჯარო რეესტრიდან 200-ზე მეტი ადამიანია გათავისუფლებული.
“საჯარო სამსახურში მიმდინარე რეპრესიები კიდევ უფრო ფართოვდება და იზრდება რეპრესირებული საჯარო მოხელეების რიცხვი. მხოლოდ ერთი უწყებიდან, საჯარო რეესტრიდან გათავისუფლდა უკვე 200-ზე მეტი საჯარო მოსამსახურე და ზოგადად მთელ საჯარო სექტორში გათავისუფლებული თანამშრომლების რაოდენობა 800 ადამიანს აჭარბებს”, – აცხადებს ორგანიზაცია.
მათი თქმით, მორიგი რეორგანიზაცია 16 აპრილს განათლების სამინისტროში გამოცხადდა. მათივე თქმით, არსებობს მოლოდინი, რომ რეორგანიზაციის პროცესი შეეხება განათლების სამინისტროს სისტემაში არსებულ სსიპებს, მათ შორის, სასწავლო დაწესებულებებს.
პროფკავშირები ამბობენ, რომ პირველ მაისს საპროტესტო მსვლელობას გამართავენ.
“მიმდინარე მოვლენების გამოძახილად, საქართველოში მოქმედი 10 დამოუკიდებელი პროფესიული კავშირი და სხვა საზოგადოებრივი გაერთიანებები ვგეგმავთ პირველ მაისს კოლმეურნეობის მოედნიდან მსვლელობას, რათა გამოვხატოთ პროტესტი საჯარო მოხელეების მიმართ რეპრესიებისა და ზოგადად ქვეყანაში არსებული უსამართლო სოციალური პოლიტიკის გამო”, – აცხადებენ ისინი.
მანამდე “საერთაშორისო გამჭვირვალობა – საქართველომ” (TI) გაასაჯაროვა კვლევა, რომლის მიხედვით, “ქართული ოცნების” მიერ ქვეყანაში არსებული საპროტესტო ტალღის დათრგუნვის მცდელობებიდან ერთ-ერთი მთავარი მიმართულება – საჯარო სამსახურის სრულად პარტიის დაქვემდებარებაში მოქცევაა. TI-ში აცხადებენ, რომ რეპრესიები შეეხო ათობით საჯარო უწყებაში მომუშავე 700-მდე თანამშრომელს.
ორგანიზაციის ცნობით, “ქართულმა ოცნებამ” 2024 წლის დეკემბრიდან დღემდე ოთხჯერ შეიტანა რეპრესიული ცვლილებები საჯარო სამსახურის შესახებ კანონში, მნიშვნელოვნად გააუარესა საჯარო მოხელეთა სამართლებრივი დაცვა და ფაქტობრივად გააუქმა საჯარო სამსახურის რეფორმა, რომელიც წლების განმავლობაში ხორციელდებოდა საერთაშორისო ორგანიზაციების მხარდაჭერით და ქვეყნის ევროპულ სტრუქტურებში ინტეგრაციის აუცილებელი წინაპირობა იყო.
