აშშ-ს სახელმწიფო დეპარტამენტის წარმომადგენელმა, მეთიუ მილერმა მიხეილ სააკაშვილის ჯანმრთელობის მდგომარეობასთან დაკავშირებით დასმულ კითხვაზე განაცხადა, რომ სახელმწიფო დეპარტამენტი ყოფილი პრეზიდენტის ჯანმრთელობით შეშფოთებულია.
კითხვა:და კიდევ ერთი საქართველოს შესახებ, თუ წინააღმდეგი არ ხართ. აშშ-ის ყოფილი ელჩების ჯგუფმა, ხუთმა ელჩმა საქართველოში, გასულ კვირას გაავრცელა განცხადება, რომელშიც მოუწოდებს საქართველოს მთავრობას, პრეზიდენტ სააკაშვილისთვის სასიცოცხლოდ მნიშვნელოვანი სამედიცინო დახმარების გაწევა დაუშვას. მხარს უჭერთ ამ მოწოდებებს?
აშშ-ს ყოფილი ელჩები – იან კელი, უილიამ კორტნი, რიჩარდ მაილსი, ჯონ ტეფტი და კენეტ იალოვიცი, – სააკაშვილის მდგომარეობაზე ერთობლივ განცხადებას ავრცელებენ და საქართველოს მთავრობას შესაძლო სანქციებზე აფრთხილებენ. ყოფილი ელჩები ხელისუფლებას მოუწოდებენ, რომ ნება დართოს სააკაშვილს საჭირო მკურნალობა მიიღოს.
მილერი:უბრალოდ ვიტყვი, რომ ჩვენ ყურადღებით ვაკვირდებით ბატონ სააკაშვილის საქმეს. ჩვენ ძალიან გვაშფოთებს მისი ჯანმრთელობა. როგორც საჯაროდ და პირადად არაერთხელ ვუთხარით საქართველოს მთავრობას, მთავრობის პასუხისმგებლობაა უზრუნველყოს ის სამედიცინო დახმარება, რომელიც მას სჭირდება, რომ დაცული იყოს მისი უფლებები. და ჩვენ გავაგრძელებთ ამ საქმეზე დაკვირვებას.
13 ივლისს 44-მა ევროპარლამენტარმა ხელისუფლებას მოუწოდა, გადაიყვანონ მიხეილ სააკაშვილი ევროკავშირის ქვეყნების ერთ-ერთ კლინიკაში, სადაც მას შეეძლება მიიღოს საჭირო და შესაბამისი სამედიცინო დახმარება.
44 ევროპარლამენტარი პრეზიდენტს, პარლამენტის თავმჯდომარე შალვა პაპუაშვილსა და პრემიერმინისტრ ირაკლი ღარიბაშვილს მიმართავს. ისინი აღნიშნავენ, რომ ევროკავშირის წევრი და წევრობის კანდიდატი ქვეყნებისგან მოელიან ევროპული ღირებულებებისადმი ერთგულებას, რომელიც “ადამიანის უნივერსალური უფლების აღიარებასაც” გულისხმობს.
ამასთან, უკრაინის უმაღლეს რადაში მხარი დაუჭირეს მიმართვის პროექტს, რომელიც მიხეილ სააკაშვილის ჰუმანიტარული მიზნით შეწყალებასა და საზღვარგარეთ სამკურნალოდ გადაყვანას ითხოვს.
მიმართვას ხელს 87 დეპუტატი აწერს, მათ შორისაა უკრაინის რადას მმართველი პარტიის, “ხალხის მსახურის” თავმჯდომარე დავით არახამია.
