7 ოქტომბერი ბოლო ვადაა ემიგრანტების არჩევნებზე რეგისტრაციისთვის. რა უნდა გააკეთოთ - გზამკვლევი

ემიგრანტების არჩევნებზე რეგისტრაცია

2024 წლის საპარლამენტო არჩევნებამდე უკვე ერთ თვეზე ნაკლები დრო დარჩა. ეს არჩევნები საქართველოსთვის რეფერენდუმის ტოლფასია, რადგან მან უნდა გადაწყვიტოს ქვეყნის ბედი – გააგრძელებს ის სვლას დასავლეთისკენ თუ საბოლოოდ აღმოჩნდება სრულ იზოლაციაში – მარტო, რუსეთთან.

რა შემთხვევაში დამარცხდება “ქართული ოცნება” არჩევნებში? ვახუშტი მენაბდის მოსაზრება

“არსებობს რამდენიმე “თუ”, რომელზეც დამოკიდებულია კოალიციური მთავრობის შესაძლებლობა არჩევნების შემდეგ”

ამ არჩევნების ბედი, როგორც სპეციალისტები ამბობენ, მნიშვნელოვნად არის დამოკიდებული ამომრჩეველთა აქტიურობაზე. ბოლო, 2020 წლის 31 ოქტომბრის საპარლამენტო არჩევნებში, ამომრჩევლების 56,11%-მა (1 970 540 ამომრჩეველი) მიიღო მონაწილეობა. წელს ეს მაჩვენებელი უფრო მაღალი უნდა იყოს, ეს დაიცავს არჩევნების შედეგებს გაყალბებისგან – ამბობენ სპეციალისტები.

განსაკუთრებულად მნიშვნელოვანია ემიგრანტების მონაწილეობა არჩევნებში.

რამდენი ადამიანი ცხოვრობს საქართველოდან ემიგრაციაში, დაზუსტებით არ ვიცით, მაგრამ, სხვადასხვა გათვლებით, მათი რაოდენობა შეიძლება აღწევდეს 1,4 მილიონს (ანუ, დაახლოებით 40% ადამიანებისა სხვა ქვეყანაშია წასული). მაგალითად,  ვიცით, რომ მხოლოდ გასულ წელს, ემიგრაციაში, ოფიციალურად, 125 ათასზე მეტი ადამიანი წავიდა. 2019 წელს კი, გაეროს შეფასებით, ემიგრაციაში იყო 852 ათასი ადამიანი

 ემიგრანტები თავადაც ითხოვენ მათ ქვეყნებში საარჩევნო უბნების გახსნას.

ამ პატარა გზამკვლევში იპოვით პასუხს ყველა კითხვაზე, როგორ მიიღოთ მონაწილოება არჩევნებში, თუ ცხოვრობთ სხვა ქვეყანაში.

* რა უნდა გავაკეთო, თუ ვცხოვრობ საზღვარგარეთ და მინდა არჩევნებში მონაწილეობა?

ნებისმიერ მოქალაქეს, ვინც ცხოვრობს სხვა ქვეყანაში და იმ ქვეყნის მოქალაქეობასთან ერთად, აქვს საქართველოს მოქალაქეობაც, არჩევნებში მონაწილეობა შეუძლია.

არჩევნებში მონაწილეობის მისაღებად საჭიროა:

იმყოფებოდეთ, ან დადგეთ საკონსულო აღრიცხვაზე, ან, იმ ქვეყანაში, სადაც ხართ, გაიაროთ საარჩევნო რეგისტრაცია საარჩევნო უბანში.

არ შეგეშინდეთ! – საარჩევნო უბანში რეგისტრაციის გავლა არ იწვევს პირის საკონსულო აღრიცხვაზე დადგომას.

"ნახევარი კონტინენტი უნდა გავიარო საარჩევნო ურნამდე". ემიგრანტები არჩევნებში მონაწილეობას ითხოვენ

ხელისუფლება ცვლილებებს არ ჩქარობს – ემიგრანტები ხომ ოპოზიციურად განწყობილი ამომრჩეველია

* იქნებ უკვე ვარ საკონსულო აღრიცხვაზე? როგორ გადავამოწმო?

თუ ფიქრობთ, რომ შეიძლება უკვე იყოთ საკონსულო აღრიცხვაზე, მაგრამ, არ გახსოვთ, ამის გადამოწმება მარტივია.

ეს ინფორმაცია შეგიძლიათ გადაამოწმოთ საგარეო საქმეთა სამინისტროს ვებგვერდზე. ან, შეგიძლიათ მიმართოთ საქართველოს დიპლომატიურ ან საკონსულო წარმომადგენლობას, იმ ქვეყანაში, სადაც ხართ.

ამ ბმულზე იპოვით მათ მისამართს და საკონტაქტო ინფორმაციას)

* როგორ დავდგე საკონსულო აღრიცხვაზე, თუ აღმოჩნდება რომ არ ვარ?

საკონსულო აღრიცხვაზე დადგომა შესაძლებელია რამდენიმე გზით

• ვებ-გვერდის geoconsul.gov.ge საშუალებით
• საელჩოში, ან საკონსულოში მისვლით
• საფოსტო გზავნილის მეშვეობით

ამ ბმულზე უფრო დეტალურ ინსტრუქციას ნახავთ, რა უნდა გააკეთოთ საკონსულო აღრიცხვაზე დადგომისთვის და რა გჭირდებათ ამისთვის

* თუ მაგალითად, როდესმე, საკონსულო დაწესებულებას რაიმე თხოვნით მივმართე, ეს ნიშნავს რომ უკვე ვარ საკონსულო აღრიცხვაზე?

არა!

როდესაც რაიმე საკონსულო მომსახურების მისაღებად მიმართავთ საკონსულოს, ეს არ ნიშნავს, რომ თქვენ ავტომატურად საკონსულო აღრიცხვაზე ხართ. პროცედურების გავლა აუცილებელია.

* ვთქვათ, გავიარე რეგისტრაცია (ანუ, ან უბანში დავრეგისტრირდი, ან საკონსულო აღრიცხვაზე დავდექი)  სად უნდა მივცე ხმა?

საზღვარგარეთ საარჩევნო უბნები უკვე გაიხსნა. ამისთვის ბოლო ვადა 26 სექტემბერი იყო.

წელს, ცესკოს ახალი განკარგულებით, 26 ოქტომბრის არჩევნებისთვის 42 ქვეყნის 53 ქალაქში გაიხსნება – 60 უბანი.  (მიუხედავად იმისა, რომ ემიგრანტები და ოპოზიცია უბნების დამატებას ითხოვდნენ, ცესკომ ეს არ გაითვალისწინა).

რა ჯდება საზღვარგარეთ საარჩევნო უბნების დამატება. ვიზუალურად გაჩვენებთ, როგორ იკარგება ემიგრანტების ხმები

საქსტატის მონაცემებით, მხოლოდ გასულ წელს ქვეყნიდან 163 480 ადამიანი წავიდა. ეს წინა წელთან შედარებით ორჯერ მეტია

უბნები გაიხსნება შემდეგ ქვეყნებში:

• თითო-თითო საარჩევნო უბანი ამ ქვეყნების დედაქალაქებში: ავსტრია, ბელარუსი, ბელგია, ბულგარეთი, დანია, დიდი ბრიტანეთი, ესტონეთი, ირლანდია, ისრაელი, კანადა, კვიპროსი, ლატვია, ლიეტუვა, მოლდოვა, ჰოლანდია, პოლონეთი, პორტუგალია, საფრანგეთი, სლოვაკეთი, სომხეთი, უზბეკეთი, უნგრეთი, ქუვეითი, ყაზახეთი, შვედეთი, შვეიცარია, ჩეხეთი, კატარი, ჩინეთი, ნორვეგია, არაბთა გაერთიანებული საამიროები, ფინეთი, სამხრეთი კორეა, იაპონია, ავსტრალია.
• ორი უბანი: ესპანეთში (მადრიდი და ბარსელონა).
• სამი უბანი: აზერბაიჯანში (სამივე – ბაქო); თურქეთში (ანკარა, სტამბოლი, ტრაპიზონი); იტალიაში (რომი, ბარი მილანი).
• ოთხი უბანი: გერმანიაში (ბერლინი, ფრანკფურტი, მიუნხენი, შტუტგარტი).
• ხუთ-ხუთი უბანი გაიხსნება: აშშ-ში (ნიუ-იორკი – 3, ვაშინგტონი და სან-ფრანცისკო); და საბერძნეთში (ათენი – 3, სალონიკი – 2).

* და, სად ვიპოვო ეს უბნები? სად იქნება?

ცესკოს ინფორმაციით, ამ საარჩევნო უბნების გახსნა იგეგმება დიპლომატიურ წარმომადგენლობებში – ან საკონსულოებში, ან საელჩოს შენობებში.

ამ ბმულზე ნახავთ საქართველოს დიპლომატიური წარმომადგენლობების შესახებ საჭირო ინფორმაციას ქვეყნების მიხედვით.

როგორ მოახერხა მოლდოვამ არჩევნებში ემიგრანტების ჩართვა და გამოუვა თუ არა იგივე საქართველოს

საზღვარგარეთ მცხოვრები მოქალაქეები არჩევნებში მონაწილეობისთვის შესაძლებლობების გაზრდას ითხოვენ

* რა დოკუმენტები დამჭირდება ხმის მისაცემად?

ხმის მისაცემად დაგჭირდებათ საქართველოს მოქალაქის ვადიანი, მოქმედი პასპორტ ან პირადობის დამადასტურებელი მოწმობა.

ხმის მიცემა აკრძალულია ნებისმიერი სხვა დოკუმენტით, მათ შორის, ზემოთ აღნიშნული დოკუმენტაციის ქსეროასლებით.

* შემიძლია თუ არა დისტანციურად მივცე ხმა

არა!

ხმის მიცემა შესაძლებელია მხოლოდ საარჩევნო უბანში პირადად გამოცხადების შემთხვევაში.

* ხმის მიცემა ძალიან მინდა, მაგრამ, სხვა ქვეყანაში არალეგალურად ვარ. რა უნდა გავაკეთო ამ შემთხვევაში?

არ აქვს მნიშვნელობა რომელიმე ქვეყანაში ლეგალურად ხართ თუ უკანონოდ გადაკვეთეთ საზღვარი. ხმის მიცემა ყველას შეუძლია.

უბრალოდ, გახსოვდეთ, რომ ამისთვის ან უბანში უნდა გაიაროთ რეგისტრაცია, ან საკონსულო აღრიცხვაზე დადგეთ. (დაუბრუნდით სტატიის დასაწყისს).

გახსოვდეთ, არჩევნებში თქვენი მონაწილეობა  არ ნიშნავს, რომ თქვენ ვინმე გიპოვით და რაიმე სამართლებრივ პასუხისმგებლობას დაგაკისრებთ, თუნდაც, ქვეყანაში არალეგალურად იყოთ.